2024 جىلعا قاراي پەداگوگتەردىڭ جالاقىسى 2 ەسەگە ارتادى. بۇل تۋرالى مينيستر اسحات ايماعامبەتوۆ ءبىلىم جانە عىلىم مينيسترلىگىنىڭ القا ماجىلىسىندە ايتتى.
– مەملەكەت باسشىسىنىڭ بەرگەن تاپسىرماسىنىڭ شەڭبەرىندە، 2024 جىلعا قاراي پەداگوگتەردىڭ جالاقىسى 2 ەسەگە ارتادى. ونىڭ بارلىعى مەكتەپتەردى كادرلارمەن تولىق جابدىقتاۋعا مۇمكىندىك بەرەدى، – دەدى مينيستر.
سونداي-اق ايماعامبەتوۆ الدىڭعى جىلى پەداگوگ مامانداردى دايارلاۋدا مەملەكەتتىك گرانتتىڭ كولەمى 1 ملن تەڭگەگە دەيىن ۇلعايتىلعانىن جەتكىزدى.
– جوعارى جانە جوعارى وقۋدان كەيىنگى ءبىلىم بەرۋدە كادرلار دايارلاۋعا ارنالعان مەملەكەتتىك تاپسىرىس كولەمىنىڭ جىل سايىن ءوسۋى بايقالادى. وزدەرىڭىز بىلەتىندەي، وسىنىڭ الدىندا مەملەكەتتىك گرانتتىڭ قۇنى 340-440 مىڭ تەڭگە بولعان. الدىڭعى جىلى مەملەكەت باسشىنىڭ قولداۋىنىڭ ارقاسىندا وسى مەملەكەتتىك گرانتتىڭ كولەمىن 1 ملن تەڭگەگە دەيىن ۇلعايتتىق. بۇل ءوز كەزەگىندە ۋنيۆەرسيتەتتەرگە ماتەريالدىق-تەحنيكالىق جاعدايىن جاقسارتۋعا جانە پەداگوگتاردىڭ، وقىتۋشىلاردىڭ جالاقىسىن كوتەرۋگە مۇمكىندىك بەردى. 2019 جىلى قىركۇيەكتە مينيسترلىككە قاراستى ۋنيۆەرسيتەتتەر پەداگوگتەرىنىڭ جالاقاسىن 20 پايىزعا كوتەرسە، 2020 جىلى قىركۇيەك ايىندا تاعى دا 20 پايىزعا كوتەردى. ءالى دە بۇل جۇمىستى جالعاستىرۋىمىز كەرەك، – دەدى ايماعامبەتوۆ.
ونىڭ ايتۋىنشا، بۇگىنگى كۇنى جوعارى وقۋ ورىندارى پەداگوگتەرىنىڭ جالاقىسى وتە تومەن.
– مەكتەپتەرمەن جانە كوللەدجدەرمەن سالىستىرعان كۇننىڭ وزىندە بۇل كورسەتكىش باسەكەگە قابىلەتتى ەمەس. سوندىقتان بۇل جۇمىستى جالعاستىرۋ – بارلىق رەكتوردىڭ الدىندا تۇرعان نەگىزگى پارىزىنىڭ ءبىرى، – دەدى مينيستر.
پىكىر قالدىرۋ