اقوردادا وتكەن تۇركىتىلدەس مەملەكەتتەر باسشىلارى كەڭەسىنىڭ V-وتىرىسىندا قىرعىزستان رەسپۋبليكاسىنىڭ پرەزيدەنتى المازبەك اتامبايەۆ قازاقستان پرەزيدەنتى نۇرسۇلتان نازاربايەۆتى ىستىقكولدىڭ جاعاسىندا دەمالىپ قايتۋعا شاقىردى. بۇل تۋرالى «قامشى» پورتالى tengrinews.kz-كە سىلتەمە جاساي وتىرىپ حابارلايدى.

جاقىندا اقوردادا تۇركىتىلدەس مەملەكەتتەر باسشىلارى كەڭەسىنىڭ V-وتىرىسى وتكەن بولاتىن. وعان قازاقستان پرەزيدەنتى نۇرسۇلتان ءابىش ۇلى، قىرعىزستان پرەزيدەنتى المازبەك اتامبايەۆ جانە ءازىربايجان رەسپۋبليكاسى پرەزيدەنتى يلحام الييەۆ، تۇركيا جانە تۇركىمەنستان وكىلدەرى قاتىسقان.

بۇل جولى دا، ادەتتەگىدەي قىرعىزستان پرەزيدەنتى المازبەك اتامبايەۆتىڭ بايانداماسى وزگە ارىپتەستەرىنەن گورى اسەرلى ءارى ءازىلدى شىققانى دا جاسىرىن ەمەس.

قىرعىز باسشىسى كەلەسى ءسامميتتىڭ وتكىزىلەتىن ۋاقىتىن ءسوز ەتە وتىرىپ، قازاقستان پرەزيدەنتىنەن شولپان اتادا وتەتىن كەڭەستىڭ ناقتى مەرزىمىن بەلگىلەۋدى ءوتىندى. سونداي-اق، قازاقستان پرەزيدەنتى مەن ءازىربايجان پرەزيدەنتىن ىستىقكول جاعاسىندا دەمالىپ قايتۋعا شاقىردى. قىرعىز پرەزيدەنتىنىڭ «مەنىڭ جوسپارلاۋىم بويىنشا، تامىزدىڭ اياعىندا وتكىزسەك جاقسى بولار ەدى. ىستىقكول جاعاسىندا دەمالىپ قايتۋعا، سۋعا دا شومىلىپ الۋعا بولاتىن ەدى»، دەگەن ءسوزى بيىلعى سامميتتە ايتىلعان «حيت» سوزدەردىڭ ءبىرى بولدى. ەش قىمسىنباستان ءازىلىن ءارى قاراي جالعاعان المازبەك اتامبايەۆ مىرزا، نۇرسۇلتان نازاربايەۆقا كول جاعاسىنان ارنايى رەزيدەنسيا تىكتىرەتىنىن دە ايتقان.

المازبەك اتامبايەۆ، قىرعىزستان پرەزيدەنتى: نۇرسۇلتان ءابىش ۇلى، ءبىز كەلەسى كەڭەستى شولپان-اتا قالاسىندا وتكىزسەك دەپ ۇسىنىس جاساپ وتىرمىز. ءوزىڭىز ءبىر كۇندى تاڭداساڭىز، 15-تامىزدان 25-قىركۇيەككە دەيىنگى ءبىر كۇندى ءقازىر ايتساڭىز. ءبىز سول كۇنى وتكىزەمىز. ءسىز اقساقالسىز عوي.(قىرعىز تىلىندە جادىراڭقى سويلەدى.)

نۇرسۇلتان نازاربايەۆ، قازاقستان پرەزيدەنتى: وندا كەڭەستىڭ وتەتىن ورنىن كەلىسەيىك.(ورىس تىلىندە سويلەپ، وزگە دە كەڭەس مۇشەلەرىنە قارادى)

المازبەك اتامبايەۆ، قىرعىزستان پرەزيدەنتى: ءيا، ناقتى ۋاقىتىن بەلگىلەيىك. نۇرسۇلتان ءابىش ۇلى بەلگىلەسە، دۇرىس بولادى. ول كىسى ول جەرلەردى جاقسى بىلەدى.(بۇل جولى ورىس تىلىندە سويلەدى)

نۇرسۇلتان نازاربايەۆ، قازاقستان پرەزيدەنتى: اۋەجايلاردى دايىنداپ قويادى...

المازبەك اتامبايەۆ، قىرعىزستان پرەزيدەنتى: ونىڭ ۇسىتىنە سۋعا شومىلىپ، دەمالىپ قايتار ەدىڭىزدەر. ءدال مەزگىلى بولادى. (ءبارى كۇلدى)

يلحام الييەۆ، ءازىربايجان پرەزيدەنتى: مەن قارسى ەمەسپىن. ءتىپتى جاقسى ەمەس پە؟

نۇرسۇلتان نازاربايەۆ، قازاقستان پرەزيدەنتى: ءبىز بۇل ماسەلەنى شەشەمىز. سىرتقى ىستەر مينيسترلەرى كەلىسسىن. تاقىرىپ سولاي قالاتىن بولدى عوي، «سپورت»؟..

المازبەك اتامبايەۆ، قىرعىزستان پرەزيدەنتى: ءبىز ۇلتتىق سپورت تۇرلەرىنەن شارالار ۇيىمداستىرىپ، قىزىقتى ەتىپ وتكىزەتىن بولامىز.

يلحام الييەۆ، ءازىربايجان پرەزيدەنتى: ءوزىمىز دە سول جارىستارعا قاتىسامىز، ءيا؟! ونىڭ ۇستىنە جاقسى دەمالىپ قايتامىز عوي.

(پرەزيدەنت مىرزالاردىڭ اڭگىمەسى ىقشامدالىپ الىندى)

ءتۇيىن1: بۇل جولعى كەڭەستىڭ سوڭىنداعى اڭگىمەلەردەن نە تۇيدىك؟ المازبەك اتامبايەۆ ءوز ەلىنىڭ وسىپ-وركەندەۋى ءۇشىن نەدەن بولسا دا تايىنبايتىنىن تاعى ءبىر مارتە كورسەتتى. ول وسىنداي كەلەلى جيىندا ءوزىنىڭ باسىن ءيدى، ودان ارلانبادى. ءوزىن قۇددى نۇرسۇلتان ءابىش ۇلىنىڭ ءبىر «ءمينيسترى» سەكىلدى كورسەتتى. اتامبايەۆ نازاربايەۆتىڭ الدىندا قانشا يىلسە دە، ءوز پايداسىنان جەڭىلگەن ەمەس. كەرىسىنشە الداپ-سۋلاپ، ارقادان قاعىپ ءجۇرىپ قىرۋار قارجى، ينۆەستيسيا تارتۋدىڭ حاس شەبەرىنە اينالدى.

ال بۇل جيىنداعى قازاقستان پرەزيدەنتىنىڭ ورنى اۋەلدەن بەلگىلى. ول بۇكىل تۇركى جۇرتىنىڭ اقساقالى. ءبارىنىڭ اقىلشىسى. قازاقستاندى ورتا ازياداعى قۋاتتى مەملەكەتتەردىڭ قاتارىنا قوسقان باسشى. وعان ەشكىم شەك كەلتىرە المايدى. الايدا، قىرعىزستان پرەزيدەنتىنىڭ اعا دەپ ءيىلىپ، ءوزىنىڭ قىرعىز تىلىندە سويلەپ، ەمەۋرىن تانىتقانىنا قاراماستان رەسەيدىڭ مەملەكەتتىك تىلىندە جاۋاپ قاتتى. ءيا، ول كىسى قىرعىزشا سويلەسىن دەپ تۇرعانىمىز جوق. تەك ءتىلى مەن ءدىنى، مادەنيەتى ورتاق قىرعىز باۋىرىنا قازاقتىڭ قوڭىر تىلىمەن جاۋاپ قاتپاعانى اتتەگەن-اي، دەگىزگەنى جاسىرىن ەمەس.

بۇل ەكەۋىنىڭ ورىسشا شۇيىركەلەسكەنىن سىرتتاي باقىلاپ وتىرعان ءازىربايجان پرەزيدەنتى ميىعىنان كۇلىپ، باس يزەگەننەن باسقا ەش نارسە كورسەتپەدى.

ءتۇيىن2: بۇل قازاقستان مەن قىرعىزستان جانە وزگە دە پوست-كەڭەستىك مەملەكەتتەر باسشىلارىنىڭ قۇلدىق قامىتتان ارىلماعانىنىڭ كورىنىسى ەمەس پە؟

نۇرگەلدى ءابدىعاني ۇلى

http://tengrinews.kz/tv/novosti/politika/4958/