كۇنى كەشەگى جاڭالىقتاردى پاراقتاپ وتىرىپ، بەلارۋس باسشىسىنىڭ  28 تامىزدا «بەلوۆەجسكيي» ااق ەڭبەك ۇجىمىنىڭ وكىلدەرى مەن رياسنو دەريەۆنياسى تۇرعىندارى الدىندا سويلەگەن سوزىنە كوزىم ءتۇستى. وندا ول كىسى ءبۇي دەپتى:
          - «وقۋلىقتاردى تولىق وزگەرتىپ شىعامىز! ءبىز مەكتەپ باعدارلاماسىن جوعارى مەكتەپتە بەرىلەتىن ءبىلىم مەن سونداعى پاندەردى تىقپالاۋدان قۇتقارامىز.   مەكتەپتىڭ باعدارلاماسىنا جوعارى ءبىلىم بەرۋ جۇيەسىنەن تالاي نارسە ەنىپ كەتكەن، بۇل نە ءۇشىن كەرەك؟»

 مەملەكەت باسىنىڭ بۇل پىكىرى قازاقستاندىق اتا-انالاردىڭ دا كوكەيىندە جۇرگەن ءسوز ەدى. سوندىقتان بولار ماعان دا ۇناپ بارادى، جالعاستىرىپ وقۋعا كىرىسكەنىم سول ەدى، وسى ءسات بالا باقشانىڭ سوڭعى "جىلدىعىنا"، بىلايعى جۇرتقا "دايىندىق توپ"-دەگەن اتپەن تانىس ەرەسەك توپقا جاڭا عانا اياق باسقان التى جاسار كەنجە قىزىم ەسىكتەن كىرە داۋىستاپ:

          - اكە، مىنا قاعازدى اپايىم بەردى، اتا-اناڭا بەر دەيدى، وسىلاردى وقيدى ەكەنبىز،-دەپ مەنىڭ قولىما ءبىر جاپىراق قاعازدى ۇستاتتى دا، ويىنشىق اق قونجىعىن قولىنا الىپ ويىنعا كىرىستى. مەن ونىڭ ۇسىنعان قاعازىنا كوز سالىپ ەدىم "2014-2015 وقۋ جىلىندا وقۋ ىس-ارەكەتىنە قاجەتتى وقۋلىقتار مەن قۇرالدار"-دەگەن تاقىرىپشامەن وقىتىلاتىن پاندەر جانە وعان قاجەتتى قۇرالداردىڭ ءتىزىمىن كوردىم. ۇزىن سانى ون ءتۇرلى ساباق، ءارى ولارعا قاجەت ون ءبىر ءتۇرلى ءارقايسىسى الدەنەشە دانادان تۇراتىن قۇرالدار رەتىمەن جازىلىپتى. ءتىپتى، "كىتاپتار قاپتاۋلى بولسىن"- دەگەن ەسكەرتپەنى دە قوسۋدى ۇمىتپاپتى. مەنى تاڭ قالتىرعانى ساباقتاردىڭ سانى مەن ساپاسى بولدى. دايىندىق توبى ءۇشىن وسىنشا دۇنيەنى وقىتۋدىڭ قانشالىقتى كەرەگى بار؟  مىسالى قاراڭىز، "قاراپايىم ماتەتاتيكا"، "ساۋات اشۋ جانە جازۋ"، "ءتىل دامىتۋ"، "بەينەلەۋ ونەرى" سياقتى  ساباقتار وسى توپ ءۇشىن جەتكىلىكتى بولار ەدى-اۋ، ال، "ەكولوگيا"، "ۆالەلوگيا نەگىزدەرى"، "ءوزىن-وزىتانۋ"، "بالالار كوركەم ادەبيەتى"- تەكتەس پاندەردىڭ  ءدال وسى بالاباقشانىڭ سابيلەرى ءۇشىن كەرەگى جوق-اق.  ەندى عانا وڭ مەن سولىن تانىپ كەلە جاتقان، ءارىپتى تاياق دەپ بىلمەيتىن، ۇل مەن قىزدىڭ ايىرماشىلىعىن تۇسىنبەيتىن، تاڭدايىنان انا ءسۇتىنىڭ ءدامى كەتپەگەن بۇلدىرشىن-سابيلەرگە  جاستارىنا لايىق دۇنيە جوق ەمەس بار عوي،  سولاردى نەگە ۇسىنباسقا؟

          مەن تۇسىنەم، بۇنى قۇراستىرۋشىلار: «بۇل پاندەردىڭ اتى تاۋداي بولعانىمەن،  سابيلەرگە ونى بارىنشا قاراپايىم ەتىپ، تەك انىقتاما تۇرعىسىنان ۇيرەتەمىز»،- دەپ ءۋاج ايتۋى مۇمكىن. ءبىراق، سونى بالدىرعاندارعا وقىتۋدىڭ قاجەتى بار ما؟ الدەقانداي ءبىر شاراسىزدىقتان بارىپ وتىرمىز با،-دەگەن سۇراققا كەلگەندە ولاردىڭ بەرەر جاۋابى جوق. بولسا دا تاتىمسىز. مەكتەپ باعدارلاماسى بۇدان دا كۇردەلى. ءتىپتى، قازاق ءالىپبيىن بىلمەيتىن ءبىرىنشى سىنىپ وقۋشىسىنا اعىلشىن ءتىلىن ۇيرەتەمىز، كەزىندە ءبىز ۋنيۆەرسيتەتتىڭ باستاپقى كۋرسىندا وقىعان پاندەردى ورتا مەكتەپ وقۋشىلارى وقىپ ءجۇر. وقۋشىلاردىڭ ساباقتىق جۇكتەمەسى عىلىمي تۇرعىدان بارعان سايىن اۋىرلاسىپ بارادى. ونى وقۋشى ەمەس، وقىتۋشىنىڭ ءوزى دە، اتا-انالار دا زورعا تۇسىنەتىن. ءتىپتى كەيبىرىن مۇلدە تۇسىنە المايتىن، ءتۇسىندىرىپ بەرە المايتىن حالگە جەتتىك. سودان بارامىز دا: "وقۋشىلار جىلدان-جىلعا دارىنسىز بولىپ بارادى، باستارىنا ساباق كىرمەيدى"- دەپ ولاردى جات تا كەپ ايىپتايمىز.   اتا-اناسىنان ءبىر، مەكتەپتەن ەكى، ءوز تۇرعىلاستارىنان ءۇش، جالپى قوعامنان ءتورت تەپىرەش كورگەن، تۇسىنىستىك سەزىنبەگەن، تەك كىنالاۋ مەن ۇرەيلەندىرۋدەن وزگە  ەستىمەگەن، ونىڭ ۇستىنە البىرتتىق پەن اڭقاۋلىق قاتار  قاباتتاسقان ۇرىمتال جاستار   ءتۇرلى ءقاۋىپ پەن قاتەرگە ۇرىنىپ جاتىر. وسىنىڭ ار جاعىندا  مەكتەپ جۇكتەمەسىنىڭ اۋىرلىعىنىڭ اسەرى جوق پا دەگەن سۇراق مەنى مازالاپ كەلەدى. تەك مەنى عانا ەمەس، بارلىق اتا-انالاردى دا سارى ۋايىمعا سالىپ وتىرسا كەرەك.

قاستەر سارقىتقان

اباي اتىنداعى قازۇپۋ دوسەنتى