ەسترادا ءانشىسى اشا (اقبوتا) ماتاي تۇرمىسقا شىعاردىڭ الدىندا قۇربىلارىن جيناپ، كەرەمەت كەش وتكىزدى. بۇل تۋرالى «قامشى» پورتالى NUR.KZ-كە سىلتەمە جاساي وتىرىپ  حابارلايدى.

ءانشى ارمان قوڭىربايەۆ پەن اشا ماتايدىڭ ۇيلەنۋ تويى جاقىن ارالىققا جوسپارلانعان. ال جۇلدىزدى جۇپتىڭ ۇيلەنۋ تويىنان بۇرىن وتكەن اشانىڭ كوڭىلدى كەشىنە ونىڭ ەڭ جاقىن قۇربىلارى مەن شوۋ-بيزنەستەگى ارىپتەستەرى قاتىستى.

اشا ماتايدىڭ “ديەۆيچنيگىنە” جينالعان تانىمال ادامداردىڭ ىشىندە لۋينا، ماقپال يسابەكوۆا، رانو وماروۆا، “قازاقستان ارۋى – 2013″ اتانعان ايداي يسايەۆالار بار.

ءبىر قىزىعى، اشانىڭ قۇربىلارى كوڭىلدى كەشكە ەرەكشە وبراز تاڭداپتى. ياعني، بولاشاق قالدىڭدىقتان باستاپ بارلىق قۇربىلارى ءۇندىنىڭ ۇلتتىق كيىمىن تاڭداعان. ءتىپتى، اشانىڭ ءوزى دە ۇندىشە بي بيلەپ بەردى.

اشا ماتايدىڭ قازاقى ءسالت-داستۇر ۇمىت بولا باستاعان شاقتا ءۇندىنىڭ ۇلگىسىن ۇگىتتەۋىنەن قاراپايىم حالىق ۇلگى الماسا ەكەن دەپ تىلەيىك. قىزدىق عۇمىردا تاعدىرعا ءبىر -اق رەت جازىلعان شاتتانار كۇنىن باسقا ەلدىڭ قاڭسىعىمەن  تاڭسىق كورىپ تويلاتۋى – اشانىڭ قازاقى تاربيەدەن الىستاۋ ەكەنىنىڭ دالەلى.  قازاقتا «ديەۆيچنيك» ياعني، قىزدار جينالىپ، سىر ءبولىسىپ، وتىرىس قۇرۋ جىگىتتىڭ قايىن جۇرتىنا «ۇرىن» بارعان ساتىندە ۇيىمداستىرىلعان. قىزدار ۇزاتىلار قىزدىڭ شاش باۋىن كوتەرىپ، قالىڭدىق كويلەگىن كورىپ، ءماز بولىساتىن. ەندىگى جەردە سول اسىل سالتىمىزدىڭ ءوز بوياۋىن بىلعاپ، ءۇندىنىڭ ۇلگىسىندەگى «قىز وتىرىس» قىستىرىلىسىپ كەلە جاتىر. ەلگە ۇلگى بولار، كوشكە كورىك بولار «جۇلدىزدارىمىز» بوتەننىڭ سالتىن  ناسيحاتتاۋمەن اينالىسىپ جاتىر.