ەندى ەلوردالىقتار ۇيىنە كوگىلدىر وتىن قوسۋ ءۇشىن پايىزسىز نەسيە الا الادى. مۇنداي مۇمكىندىكتى Halyk Bank ۇسىنىپ وتىر. جۋىردا عانا نۇر-سۇلتان قالاسىنىڭ اكىمدىگى، Halyk Bank جانە "ECOJER" قاۋىمداستىعى ءوزارا ىنتىماقتاستىق تۋرالى مەموراندۋمعا قول قويدى. ونىڭ اياسىندا تۇرعىن ۇيلەردى گازداندىرۋعا جاردەمدەسۋ بويىنشا جوبا ىسكە قوسىلىپ، Halyk Bank العاشقى ءجۇز تۇرعىنعا ۇيلەرىن گازبەن جابدىقتاۋدىڭ ورتالىق جەلىلەرىنە قوسۋ ءۇشىن پايىزسىز كرەديت بەرمەك.
حالىق ەكولوگيالىق تازا كوگىلدىر وتىنعا كوشۋدى جەدەلدەتۋى ءۇشىن قارجىلىق ىنتالاندىرۋدىڭ قوسىمشا شارالارىن ەنگىزۋ اسا ماڭىزدى. وسىعان بايلانىستى الەۋمەتتىك جاۋاپتى ءىرى قارجى ينستيتۋتى رەتىندە Halyk Bank ۇيلەرىنە گاز قوسقىسى كەلەتىن ءبىرىنشى ءجۇز ابونەنتكە پايىزسىز كرەديت بەرە وتىرىپ "ECOJER" قاۋىمداستىعىنىڭ باستاماسىن قولدادى.
Halyk Bank باسقارما ءتورايىمى ءۇمىت شاياحمەتوۆانىڭ ايتۋىنشا، Halyk Bank ەكولوگيانى جاقسارتۋعا جانە اۋا باسسەينىن تازارتۋعا بايلانىستى ءبىرقاتار باستامالاردى قولدايدى.
– بۇگىندە ەكولوگيا ماسەلەسى وتە وزەكتى، اسىرەسە ءىرى وتاندىق مەگاپوليستەر ءۇشىن. ءبىز نۇر-سۇلتان قالاسىنداعى تۇرعىن ۇيلەردى گازداندىرۋ جوباسىن قولداۋعا دايىن ەكەنىمىزدى مالىمدەدىك. جوبا قوسۋ جۇمىستارىنىڭ بارلىق كولەمىنە ەسەپتەلگەنىن اتاپ وتكىم كەلەدى، ياعني بانك گازدى تۇرعىن ۇيگە جەتكىزۋدەن باستاپ، بارلىق قاجەتتى گاز كوممۋنيكاسيالارىن قوسۋعا جانە قاجەتتى جابدىقتى ورناتۋعا پايىزسىز قارىز بەرەدى. بۇل – ءبىزدىڭ ەلوردانىڭ اۋە باسسەينىن ساۋىقتىرۋعا قوسقان ۇلەسىمىز. ءبىز ءوز تاراپىمىزدان ەلوردانىڭ بيزنەس-قوعامداستىعىن ءبىزدىڭ باستامامىزعا قوسىلۋعا شاقىرامىز، – دەپ اتاپ ءوتتى ءۇمىت شاياحمەتوۆا.
اتالمىش اكسيا Halyk Bank-تىڭ العاشقى ەكولوگيالىق باستاماسى ەمەس. وتكەن جىلى قارجىلىق ۇيىم الماتى قالاسىنىڭ اكىمدىگىنە وڭتۇستىك استانانى گازداندىرۋ بويىنشا قولداۋ كورسەتىپ، حالىقتىڭ الەۋمەتتىك وسال توپتارىنا جاتاتىن 92 تۇرعىن ءۇيدى گازعا تەگىن قوسقان بولاتىن. ولاردىڭ اراسىندا از قامتىلعان وتباسىلار، كوپبالالى جانە مۇگەدەك بالالارى بار وتباسىلار، تولىق ەمەس وتباسىلار بار.
– بۇل قىستى ءبىزدىڭ ءبىرقاتار وتباسىلارىمىز كوگىلدىر وتىنمەن جىلىتىلاتىن جىلى ۇيلەردە قارسى الدى، – دەيدى Halyk Bank باسقارما ءتورايىمى.
نۇر-سۇلتان قالاسىندا پايىزسىز كرەديت بەرۋ باعدارلاماسىنىڭ شارتتارى بويىنشا تۇرعىندار 750 000 تەڭگەگە دەيىنگى سوماعا، 18 ايعا دەيىن جىلدىق 0 پايىزبەن كرەديت الا الادى. قارىزدى ۇيىمداستىرعانى ءۇشىن ۇستالىناتىن كوميسسيا مولشەرى الىنعان سومانىڭ نەبارى 0،1 پايىزىن قۇرايدى.
وسىلايشا، جۇزدەن استام وتباسى گازعا كوشۋگە مۇمكىندىك الىپ، ءوز جاعدايىن ەداۋىر جاقسارتادى. بۇل – ءوز كەزەگىندە اتموسفەراعا زياندى شىعارىندىلاردى ازايتۋعا ىقپال ەتەدى.
"ECOJER" قاۋىمداستىعى كەڭەسىنىڭ ءتورايىمى لاززات رامازانوۆا الەۋمەتتىك ماڭىزى بار جوبا مەملەكەت باسشىسىنىڭ ەلوردانى گازداندىرۋ جونىندەگى تاپسىرماسىن ورىنداۋدى قولداۋ ماقساتىندا ىسكە اسىرىلىپ جاتقانىن اتاپ ءوتتى.
پىكىر قالدىرۋ