جۇڭگو بيلىگى "باتىستىق يدەيالاردى دارىپتەيتىن" جانە "بوتەن زاتتاردى قامتيتىن" كىتاپتاردى باستاۋىش جانە ورتا مەكتەپتەردەگى وقۋ تىزىمىنەن جانە كىتاپحانالاردان الىپ تاستاۋعا بۇيرىق بەردى.
الىنىپ تاستالاتىن مازمۇنداردىڭ قاتارىندا بيلل گەيتس پەن ستيۆ دجوبستىڭ ءومىربايانى بار. ولار قىتايدا "اقش كاپيتاليزمىنىڭ پوستەر بالالارى" رەتىندە تانىمال.
قىتايلىق "Epoch Times" اقپارات قۇرالىنىڭ حابارلاۋىنشا، "شەتەلدىكتەرگە تابىناتىن" بارلىق كىتاپتار مەكتەپتەردىڭ وقۋ تىزىمىنەن شىعارىلادى. بۇل بۇكىل ەل بويىنشا 240 ميلليونعا جۋىق باستاۋىش جانە ورتا سىنىپ وقۋشىلارىنا اسەر ەتەدى.
"Epoch Times" باسىلىمى اقپاراتىنشا، قىتايداعى كىتاپ سورەلەرى جۇڭگو ءتوراعاسى سي ءسزينپيننىڭ سوزدەرىمەن تولتىرىلعان. "بەيجىڭدەگى ورتا مەكتەپ سونىڭ ءبىر مىسالى" دەيدى باسىلىم. سونداي-اق مەكتەپ سي مەن قىتايدىڭ كوممۋنيستىك پارتياسىنىڭ يدەولوگياسىن ناسيحاتتايتىن بىرنەشە كىتاپتاردىڭ، سونىڭ ىشىندە "جۇڭگو ۇلتىنىڭ ۇلى جاسارۋىنىڭ قىتايلىق ارمانى"، ءسيدىڭ سويلەگەن سوزدەر مەن قۇجاتتار جيناعىنىڭ قورىن جيناقتاعان.
اقپاراتقا سايكەس، قىتايدىڭ ءبىلىم بەرۋ جۇيەسى مەن مەكتەپتەردەگى وقۋلىقتاردىڭ مازمۇنى قاتاڭ باقىلانادى جانە كوبىنەسە پارتيانىڭ تاريح نۇسقاسىن كورسەتەدى. وقۋلىقتاردا تەك "پاتريوتتىق" ماتەريالدار بار. كەيبىر تاريحي وقيعالار تۋرالى ايتىلمايدى، مىسالى، 1989 جىلعى تيانانمەن الاڭىنداعى دەموكراتيا نارازىلىقتارى جازىلمايدى.
ەلدەگى تاريحي وقۋلىقتاردا وكيناۆا ارالدارىنداعى جاپونيامەن داۋلى ارالدار، سەنكاكۋ ارالدارى "تەك قىتايعا تيەسىلى" دەپ باسا ايتىلىپ، ۇلتتىڭ تەرريتوريالىق تالابى باسا كورسەتىلەدى.
پىكىر قالدىرۋ