استاناداعى ساۋدا ويىن-ساۋىق ورتالىقتارىنىڭ بىرىندە ورنالاسقان «كينوپارك» جەلىسىنىڭ قىزمەتكەرىن تەپكىلەگەن قۋانىش تۋراكەلدييەۆ ق ر پرەمەرى كانسەلياريىنىڭ باس ينسپەكتورى بولات تۋراكەلدييەۆتىڭ ۇلى بولىپ شىقتى. بۇل تۋرالى «قامشى» پورتالى  informburo.kz-كە سىلتەمە جاساي وتىرىپ حابارلايدى.

استاناداعى «سارى ارقا» ويىن-ساۋىق ورتالىعىندا ورنالاسقان «كينوپارك» جەلىسىندە ەسەپشى قىزدى تەپكىلەگەن قۋانىش تۋراكەلدييەۆ ق ر پرەمەرىنىڭ كانسەلياريىندە باس ينسپەكتور بولىپ قىزمەت اتقاراتىن بولات تۋراكەلدييەۆتىڭ ۇلى بولىپ شىققان. بۇل اقپاراتتى ق ر پرەمەر-مينيسترىنىڭ باسپا ءسوز قىزمەتىندەگىلەر دە راستاعان.

عالامتور جەلىسىندە بەلگىسىز جىگىتتىڭ قىزمەتكە كوڭىلى تولماعاندىقتان ەسەپشى قىزدى تەۋىپ جىبەرگەن ۆيدەوسى جارىق كورگەنى تۋرالى وسىعان دەيىن جازعان بولاتىنبىز. ال الەۋمەتتىك جەلىدە تارالعان بۇل ۆيدەو كوپشىلىكتىڭ اشۋىن تۋعىزعان. كەيىن قۇزىرلى ورگان قىزمەتكەرلەرى «كاراتاريستتىڭ» ءاتى-جونىن ناقتىلاعاندا ەسەپشى قىزدى تەپكەن جىگىتتىڭ 22 جاستاعى قۋانىش تۋراكەلدييەۆ ەكەنى انىقتالعان.

قازىرگى تاڭدا قۋانىش تۋراكەلدييەۆتىڭ الەۋمەتتىك جەلىلەردەگى بارلىق پاراقشالارى وشىرىلگەنىمەن، ونىڭ سۋرەتىن «زا تەبيا، باكە» جاريالاعان.

ال «كينوپارك» جەلىسىنىڭ PR قىزمەتكەرى ەرلان بۇحاربايەۆ اتالمىش ينسيدەنتكە قاتىستى اقپارات بەرۋدەن باس تارتقان.

«مەن ءقازىر دەنساۋلىعىما بايلانىستى جۇمىستا ەمەسپىن. ءبىراق، بۇگىن كەشكە دەيىن جۇمىسقا بارامىن. كەشكە حابارلاسايىقشى، سوسىن سويلەسەرمىز. مەن ءقازىر نە بولىپ جاتقانىنان بەيحابارمىن. ناقتى ەشنارسە ايتا المايمىن ءقازىر»،-دەيدى بۇحاربايەۆ.

ال جاپا شەككەن ەسەپشى قىزدىڭ دەنساۋلىعىنا قاتىستى «كينوپارك» وكىلى «ەش الاڭداماڭىزدار، ءبىز بارلىعىن قاداعالايمىز. سول ءۇشىن دە كەشكە حابارلاسىڭىزدار. مەن سىزدەرگە ناقتى جاۋاپتار بەرەتىن بولامىن» دەگەن.

الايدا كەشكە حابارلاسقان informburo.kz جۋرناليستەرى ەرلان بۇحاربايەۆتان ماردىمدى جاۋاپ الا الماعان.

تەك ۋادە بويىنشا حابارلاسقان جۋرناليستكە «وي، مەن ءقازىر بوس ەمەسپىن، دەنساۋلىعىما بايلانىستى دەمالىستامىن. ەرتەڭ حابارلاسىڭىزدار دەدىم عوي. بولدى، بولدى.. راحمەت!»،-دەپ جاۋاپ قاتقان بۇحاربايەۆ مىرزا.

ال «كينوپارك» جەلىسىنىڭ وزگە دە قىزمەتكەرلەرى جاپا شەككەن ەسەپشى قىز سول وقيعادان كەيىن جۇمىسقا مۇلدە كەلمەگەنىن ايتادى.

ءتۇيىن: ەستەرىڭىزدە مە، ەلباسى نۇرسۇلتان نازاربايەۆ بىلتىر الماتىعا كەلگەندە «جۇگەنسىز كەتكەن شەنەۋنىكتەردىڭ بالالارىن» تارتىپكە سالۋدى تالاپ ەتكەن ەدى عوي. قىزمەتى ماردىمسىز قۇقىق قورعاۋ ورىندارى مەن باي-باعلانعا ءالى كەلمەيتىن قۇزىرلى ورىنداردىڭ قىزمەتىن ىسكە العىسىز دەپ ىرەپ سالعان. سولاي ەكەنى وتىرىك ەمەس قوي. اكە-شەشەسىنىڭ اتاعى مەن جوعارعى قىزمەتىنە ماسايراپ جۇرگەن بيلىك باسىنداعىلاردىڭ بالالارىنىڭ ەركەلىگىن ەل قاشانعى كوتەرسىن؟ بىلتىر الماتى قالاسىندا دوكەي اكەسىنە سەنگەن ءدوڭباس «شۋماحەر» شاتاق قىلىپ ەدى. ەندى كارىم ءماسىموۆتىڭ كانسەلياريىنىڭ باس ينسپەكتورى بالاسىن باسىمەن جىبەرگەن ەكەن. كەيبىر دەرەكتەرگە سۇيەنسەك، «كاراتيست» تەرگەۋ يزولياتورىنا قامالعان. تەرگەۋ جۇمىستارى جۇرگىزىلۋدە. دەگەنمەن قازاقستاندا  كوك قاعازدىڭ قۇزىرەتى «زاڭنان» دا قۇدىرەتتى ەكەنىن ءبىز جاقسى بىلەمىز. سوندىقتان ءتيىستى جازا تاعايىندالۋى ءتيىس دەپ ەسەپتەيمىز...

نۇرگەلدى ءابدىعاني ۇلى

«قامشى» سىلتەيدى