اقش قازىنا دەپارتامەنتى كريپتوۆاليۋتا نارىقتارى مەن ترانزاكسيالارىنا توسقاۋىل قويۋ ءۇشىن شارالار قولدانىپ جاتقانىن حابارلادى جانە 10 مىڭ دوللار نەمەسە ودان دا كوپ اقشا اۋدارۋدى ىشكى كىرىستەر قىزمەتىنە تىركەۋ قاجەت ەكەنىن ايتتى.
"كريپتوۆاليۋتا ءقازىردىڭ وزىندە سالىقتان جالتارۋدى قوسا العاندا زاڭسىز ارەكەتتەردى وڭاي ەتۋ ارقىلى ماڭىزدى قارجىلىق تەكسەرۋلەرگە پروبلەما تۋدىرادى" دەپ اتاپ ءوتتى اقش قارجى حاتشىسى دجانەت يەللەن.
سونىمەن قاتار اقش پرەزيدەنتىنىڭ ىشكى كىرىستەر قىزمەتى تۋرالى ۇسىنىسىندا كريپتو-اكتيۆتەردىڭ وسۋىنە قاتىستى قوسىمشا جاڭا قارجىلىق ەسەپ بەرۋ رەجيمى بار ەكەنى ايتىلدى.
بۇل رەتتەۋدە كريپتوۆاليۋتا، ايىرباستاۋ شوتتارى جانە ساندىق ۆاليۋتانى قابىلدايتىن تولەم قىزمەتى شوتتارى قامتىلاتىن بولادى.
"سونىمەن قاتار، قولما-قول وپەراسيالار سياقتى، نارىقتىق قۇنى 10000 دوللاردان اساتىن كريپتو-اكتيۆتەردى الاتىن كاسىپكەرلەر دە ەسەپ بەرەتىن بولادى" دەپ مالىمدەدى دەپارتامەنت وكىلدەرى.
سوڭعى ءبىر ايدا ءۋولل-ستريتتىڭ كوپتەگەن ساراپشىلارى "اقش قازىنا، باعالى قاعازدار جانە بيرجالار جونىندەگى كوميسسياسىنىڭ رەتتەۋشىلەرى كوپ ۇزاماي كريپتوۆاليۋتانى رەتتەۋ ءۇشىن نەعۇرلىم بەلسەندى ءرول اتقارادى" دەپ دابىل قاققان بولاتىن.
ايتا كەتەيىك، بۇعان دەيىن كريپتوۆاليۋتا نارىعى كورنەكتى قۇلدىراعانى حابارلاندى. كەيبىر قارجىلىق ساراپشىلار ساندىق ۆاليۋتانىڭ تومەندەۋىنىڭ نەگىزگى سەبەپتەرىن ايتتى: ولاردىڭ پىكىرىنشە، Tesla كومپانياسىنىڭ كولىك قۇرالدارىن Bitcoin ارقىلى ساتۋدى توقتاتقانىن جاريالاۋى جانە جۇڭگو بيلىگىنىڭ كريپتوۆاليۋتانى تولەم ءتۇرى رەتىندە قابىلداۋعا بولمايتىنىن مالىمدەۋى ساندىق اكتيۆتىڭ تومەندەۋىنە ايتارلىقتاي ىقپال ەتكەن.
پىكىر قالدىرۋ