الماتى – نۇر-سۇلتان رەيسى ۇشاعىندا جولاۋشى جانجال شىعاردى، دەپ حابارلادى FlyArystan باسپا ءسوز قىزمەتى.
وقيعا 30 مامىردا بولعان. جانجالدىڭ شىعۋىنا جولاۋشىنىڭ اۆياكومپانيا قىزمەتكەرلەرى تالابىن ورىنداماعانى جانە تاسىمالداۋ ەرەجەلەرىن ساقتاماعانى سەبەپ بولعان. جولاۋشى اشۋ-ىزامەن قىزمەتكەردى يتەرىپ، بورتقا كىرگەنى انىقتالدى.
"جانجال شىعارعان جولاۋشىنى ۇشاقتان شىعارۋعا بايلانىستى رەيس كەشىكتى. جولاۋشىعا تىركەۋ كەزىندە جانە بورتقا وتىرعىزۋ ءراسىمى كەزىندە جۇگىن تىركەمەسە، رەيسكە جىبەرىلمەيتىنى تۋرالى ەكى مارتە ەسكەرتىلدى. ويتكەنى تاسىمالداۋ ەرەجەلەرىنە سايكەس بورتقا ءبىر قول جۇگى بار جولاۋشىلار عانا جىبەرىلەدى" دەلىنگەن حابارلامادا.
كومپانيانىڭ باسپا ءسوز قىزمەتى بۇل وقيعانىڭ باسقا جولاۋشىلارعا قولايسىزدىق تۋعىزعانىن اتاپ ءوتتى.
"اۆياكومپانيا ەرەجەلەرىن ساقتاماعان جاعدايدا ءبىز اۆياسيالىق قاۋىپسىزدىك راسىمدەرىن ۇستانۋعا ءماجبۇرمىز. جولاۋشىنى بورتتان شىعارعان كەزدە ءبىز اۋە كەمەسى مەن جولاۋشىلاردى قايتا تەكسەرۋگە ءتيىسپىز" دەپ اتاپ ءوتتى FlyArystan-نىڭ باسپا ءسوز قىزمەتى.
پىكىر قالدىرۋ