رەسەي عارىش اگەنتتىگىنىڭ باسشىسى "ۆاشينگتون رەسەيدىڭ جەر سەرىگىن ۇشىرۋعا كەدەرگى كەلتىرگەن سانكسيالارىن الىپ تاستاماسا، ماسكەۋ حالىقارالىق عارىش ستانسياسىنان شىعىپ كەتەدى" دەدى.
رەسەي پرەزيدەنتى ۆلاديمير پۋتين مەن اقش پرەزيدەنتى دجو بايدەننىڭ وسى ايدىڭ سوڭىندا جەنيەۆادا وتەتىن ءسامميتتى قارساڭىندا روسكوسموس باسشىسى دميتريي روگوزين رەسەي ءدۋماسىندايسوز سويلەدى.
روگوزين ماسكەۋ ءوزىنىڭ كەيبىر جەرسەرىكتەرىن ۇشىرا الماي جاتقانىن ايتتى. ونىڭ سوزىنشە، اقش-تىڭ سانكسيالارىنا بايلانىستى رەسەي ءوزىنىڭ عارىشتىق باعدارلاماسىنا قاجەتتى كەيبىر ميكروچيپتەر جيىنتىعىن يمپورتتاي الماي وتىر.
– بىزدە زىمىراندار جەتەرلىك، ءبىراق ولاردى ۇشىراتىن ەشتەڭە جوق، – دەگەن روگوزين باتىس سانكسيالارى رەسەيدەگى بەلگىلى ءبىر سالانىڭ دامۋىنا ايتارلىقتاي كەدەرگى كەلتىرىپ جاتقانىن مويىندادى.
– بىزدە عارىش اپپاراتتارى نەگىزىنەن تولىق قۇراستىرىلادى، ءبىراق سانكسيالارعا بايلانىستى قاجەتتى جانە ناقتى ميكروچيپتەر جيىنتىعىن ساتىپ الا المايمىز، – دەدى ول.
رەسەي 2014 جىلى قىرىمدى ۋكراينادان اننەكسيالاپ العاننان كەيىن امەريكا قۇراما شتاتتارى جانە باسقا دا باتىس ەلدەرى ماسكەۋگە سانكسيالار سالا باستادى. جاقىندا اقش ماسكەۋگە پرەزدەنتتىك سايلاۋعا ارالاسۋى، كيبەرشابۋىلدار مەن كرەمل سىنشىسى الەكسەي ناۆالنىيدىڭ ۋلانۋىنا بايلانىستى سانكسيا سالعان.
– ەگەر ۆاشينگتون جاقىن ارادا رەسەيدىڭ عارىش مەردىگەرلەرىنە قارسى سانكسيالاردى الىپ تاستاماسا، رەسەي 2025 جىلى حالىقارالىق عارىش ستانسياسىنان (حعس) شىعۋى مۇمكىن، – دەپ مالىمدەدى روگوزين.
1998 جىلى باستالعان حعس كوپ مەملەكەت قاتىسقان جوبا جانە ەكى سەگمەنتتەن تۇرادى: اقش جانە باسقا عارىش اگەنتتىكتەرى ءبىر بولىگىن پايدالانادى، ال ەكىنشى بولىگىن رەسەي عارىشكەرلەرى قولدانادى.
اقش-تىڭ عارىش اگەنتتىگى NASA كەم دەگەندە 2030 جىلعا دەيىن حعس-نى پايدالانۋدى قولدايدى. NASA باسشىسى بيلل نەلسون وتكەن اپتادا CNN-گە "رەسەيدىڭ حعس-دان شىعۋى رەسەي جانە قىتايدىڭ اقش-قا قارسى جاڭا عارىشتىق باسەكەسىن تۋدىرۋى مۇمكىن" دەپ مالىمدەگەن.
وسى جىلدىڭ باسىندا اقش پرەزيدەنتى دجو بايدەن ءوزىنىڭ رەسەيلىك ارىپتەسى ۆلاديمير ءپۋتيندى "كيللەر" دەپ اتاپ، رەسەيگە، ونىڭ ىشىندە ۆاليۋتا-قارىز نارىعىنا سانكسيالار سالعاننان كەيىن، ماسكەۋ مەن ۆاشينگتون اراسىنداعى قاتىناستار قىرعي-قاباق سوعىستان كەيىنگى ەڭ شيەلەنىستى دەڭگەيگە جەتكەن.
