ەلىمىزدە بەيبىت جينالىستار مەن ميتينگىلەر، شەرۋلەر مەن پيكەتتەر جانە دەمونستراسيالار ۇيىمداستىرۋدىڭ وزىدىك ءتارتىبى قالىپتاستقان. ءتىپتى بۇل ءتارتىپتى ءبىز زاڭمەن بەكىتىپ قويعانبىز. قازاقستان رەسپۋبليكاسىنىڭ 2004.12.20. N 13 (2005 جىلعى 1 قاڭتاردان باستاپ كۇشىنە ەنەدى) زاڭىنىڭ 2-بابىنا سايكەس جينالىس، ميتينگ، شەرۋ، پيكەت نەمەسە دەمونستراسيا وتكiزۋ تۋرالى رەسپۋبليكالىق ماڭىزى بار قالانىڭ، استانانىڭ، اۋداننىڭ (وبلىستىق ماڭىزى بار قالانىڭ) جەرگiلiكتi اتقارۋشى ورگانعا ءوتiنiش بەرiلەدi.
جينالىس، ميتينگ، شەرۋ، پيكەت نەمەسە دەمونستراسيا وتكiزۋ تۋرالى ءوتiنiشتەردi ەڭبەك ۇجىمدارىنىڭ، قوعامدىق بiرلەستiكتەردiڭ نەمەسە قازاقستان رەسپۋبليكاسى ازاماتتارىنىڭ جەكەلەگەن توپتارىنىڭ ون سەگiز جاسقا تولعان ۋاكiلدەرi بەرە الادى. وسى زاڭعا سۇيەنىپ ورال قالاسىنىڭ تۇرعىندارى قالادا ميتينگ وتكىزۋگە ارنالعان ەكىنشى ءوتىنىشىن اكىمدىككە تاپسىردى. ۇيىمداستىرۋشىلار ميتينگتى مانشۇك مامەتوۆا اتىنداعى الاڭدا 26 قىركۇيەك كۇنى وتكىزگىسى كەلگەن. الايدا، ورال قالاسىنىڭ ىشكى ساياسات ءبولىمىنىڭ جەتەكشىسى باقىتجان نارىمبەتتىڭ ايتۋىنشا 26 قىركۇيەك كۇنى اكىمدىك باسقا شارا وتكىزۋدى جوسپارلاپ قويعان ەكەن. ميتينگ ۇلتتىق بانكتىڭ قارجى-نەسيەلىك ساياساتىنا قارسىلىق ءبىلدىرۋ ماقساتىندا ۇيىمداستىرىلماق. ەكىنشى مارتە جازىلعان وتىنىشتە ميتينگ وتكىزۋ ۋاقىتى 2015 جىلدىڭ 3- قازانى دەپ كورسەتىلگەن. بۇل تۋرالى «قامشى» پورتالى «توتال.كز-كە» سىلتەمە جاساي وتىرىپ حابارلايدى.
تەڭگەنىڭ قۇلدىراپ كەتۋى مەن ازىق-تۇلىك باعاسىنىڭ كۇرت كوتەرىلۋىنە حالىق تاراپىنان قارسىلىق ءبىلدىرىلۋى ءتيىس بولعان. دەسەدە، قارسىلىق ءبىلدىرۋدىڭ ءوزى وڭاي شارۋا ەمەس. الدىمەن اكىمدىككە ءوتىنىش ءبىلدىرىلۋى ءتيىس. ەگەر اكىمدىك ءسىزدىڭ ءوتىنىشىڭىزدى ماقۇلداماسا، ءسىز زاڭعا قايشى ارەكەت جاساعان بولىپ شىعاسىز. وسىدان كەيىن جەكە ازاماتتاردىڭ قۇقىعىن زاڭ قورعايدى دەگەنگە تولىقتاي سەنىم ارتۋعا بولا ما؟ ارينە اكىمدىكتە وتىرعاندار ءبىر پاراق قۇشاقتاپ، قارسىلىق تانىتامىن دەپ كەلگەندەرگە رۇقسات بەرمەۋگە تىرىسادى. مەيلىنشە ميتينگ وتكىزەتىن الاڭدارعا كونسەرتتىك شارا، نەمەسە جاستار جيىنىن وتكىزىپ باعادى. ونسىز دا ماقساتسىز ىردۋ-دىردۋعا ماس بولعان جاستار مەن تۇرعىنداردىڭ اشۋىن وسىلاي تارقاتۋدى ولار ادەتكە اينالدىرعالى قاشان؟ سول سەبەپتى دە بىزدە «جۇلدىز» دەگەن اتقا يە قاھارماندار پايدا بولا باستاعان. تەلەديدار ءپۋلتىنىڭ تەتىگىن باسا قالساڭىز، انشىلەردەن كوز سۇرىنەدى. قيت ەتسە، سولاردىڭ ءومىرىن اڭدىپ، قازاقتىڭ ءومىرى ءوتىپ بارا جاتىر. ءوز ءومىرىنىڭ قيىندىعىنان ابدەن جالىققان جۇرت جۇلدىزداردىڭ ەرتەگى ومىرىنە تەلمىرىپ ءتانتى بولۋدا. ءبىراق جىپىرلاعان سانسىز جۇلدىزدار اي سەكىلدى جارىق شاشا المايدى. ال، اسپانداعى قارا بۇلتتى ءتۇرىپ تاستاپ، ايدىڭ جارىعىن ءتۇسىرۋ ءۇشىن قازىرگى تۇرمىسىمىزعا قارسىلىق ءبىلدىرىلۋى ءتيىس بولاتىن. ءبىراق ءسال جارىعىراق جۇلدىز كورىپ قالىپ، سونى اي ەكەن دەپ شۇكىرلىك تانىتا بەرەتىن حالىققا داعدارىستىڭ ىزعارى ءالى سەزىلە قويعان جوق. ماماندار 2016 جىل ەسىكتەن ەنە بەرگەندە داعدارىس تۋرالى دابىر باستالادى دەپ وتىر.
انىعىندا ۇلتتىق بانكتىڭ سوڭعى ارەكەتى تىم توسىن بولدى. بۇل تۋرالى «قامشى» پورتالى ارنايى ساراپتاما ۇسىنعان بولاتىن http://qamshy.kz/home/show/1469. ال، وعان قاتىستى قارسىلىقتار ءفورمالدى تۇردە بولسا دا وتكىزىلۋگە ءتيىس بولاتىن. ولاي بولماعاندا ەكونوميكالىق جۇيەنىڭ جايسىزدىعىنا قىڭق ەتپەيتىن قازاققا ميىعىنان كۇلۋشىلەر كوبەيىپ كەتەر ەدى.
اينۇر تولەۋ
