مەملەكەت باسشىسى بۇقارالىق سپورتتى دامىتۋدىڭ ماڭىزدىلىعىن، جاس ۇرپاقتىڭ سپورتتىق جانە شىعارماشىلىق الەۋەتىنە ەرەكشە نازار اۋدارۋ قاجەت ەكەندىگىن اتاپ وتكەن بولاتىن.

قالادا بۇقارالىق سپورتتى دامىتۋ، جاستاردىڭ بوس ۋاقىتىن ءتيىمدى ۇيىمداستىرۋ باعىتىندا ءتيىمدى ءىس-شارالار اتقارىلۋدا.
قالا اكىمىنىڭ باستاماسىمەن العاش رەت قالا مەكتەپتەرى اراسىندا فۋتبول، ۆولەيبول، باسكەتبول، شاحمات سپورت تۇرلەرىنەن «شىمكەنت جاستار ليگاسى» وتكىزىلدى. جاستار ليگاسىنا 140 جالپى ورتا مەكتەپتىڭ 536 كومانداسى قاتىستى. ويىندارعا 8569 وقۋشى قامتىلدى.

سونداي-اق، شىمكەنت قالاسىندا شىعارماشىلىق ۇيىرمەلەر مەن سپورت سەكسيالارىندا شۇعىلدانۋشىلاردىڭ سانىن ارتتىرۋ ءۇشىن ءتيىستى ينفراقۇرىلىمدى جانە قوسىمشا جۇمىس ورىندارىن كوبەيتۋ ماقساتىندا سپورتتىق ۇيىرمەلەردى جان باسىنا شاققانداعى قارجىلاندىرۋ ىسكە اسىرىلۋدا.

بۇگىنگى تاڭدا قالادا 4096 بالاعا 71 سپورت تۇرىنەن تەگىن سپورت سەكسيالارىن ۇيىمداستىرۋ ءۇشىن جەرگىلىكتى بيۋدجەتتەن (جان باسىنا شاققانداعى قارجىلاندىرۋ) 339،8 ملن تەڭگە قارجى باعىتتالدى. بۇل كورسەتكىش 2021 جىلى جالپى بوس بالالاردىڭ قوسىمشا سپورتتىق سەكسيامەن قامتۋ ۇلەسىنىڭ 5،3 %-ىن قۇرايتىن بولادى.

ايتا كەتەيىك، بۇگىندە قالادا مەملەكەتتىك-جەكەشەلىك ارىپتەستىك اياسىندا 5 سپورت كلۋبى جۇمىس ىستەيدى.