جامبىل وبلىسى بايزاق اۋدانىداعى №28349 اسكەري ءبولىمىنىڭ ءوق-دارى قويماسىندا بولعان جارىلىستاردان 4 ادام قازا تاپتى. بۇل تۋرالى جامبىل وبلىسى وڭىرلىك كوممۋنيكاسيالار قىزمەتىندە وتكەن بريفينگتە قورعانىس ءمينيسترى نۇرلان ەرمەكبايەۆ ءمالىم ەتتى.

قازا تاپقانداردىڭ ەكەۋى كەلىسىم-شارت بويىنشا قىزمەت ەتكەن. سەرجانت مارات مەشىنباي سايلاۋ ۇلى مەن ەفرەيتور رۋسلان جانبولاتوۆ ءجۇرسىنباي ۇلى 1981 جىلى تۋعان. ءۇشىنشى ادام اسكەري كۇزەت قىزمەتكەرى ورازبەك دالىبايەۆ دايرابەك ۇلى 1969 جىلى تۋعان. قازا تاپقان ءتورتىشى ادام اسكەري پروكۋرور ارمان قاپەزوۆ ەكەنى انىقتالدى.

مارات مەشىنباي مەن رۋسلان جانبولاتوۆ ءورت باستالعان العاشقى ساتتەردە ءورت سوندىرۋشىلەر ساپىندا جالىندى وشىرۋمەن اينالىسقان. سول جەردەگى جارىلىستاردىڭ بىرىندە جارالانعان.

ال ورازبەك دالىبايەۆ قويمانى كۇزەتىپ تۇرعاندا جارىلىس بولىپ، سونىڭ سالدارىنان كوز جۇمعان.

جالپى 88 ادام اۋرۋحاناعا جۇگىنگەن. قازىرگى ۋاقىتتا 28 ادام اۋرۋحانادا جاتقانى، ولاردىڭ اراسىندا 6 ادامنىڭ جاعدايى اۋىر ەكەنى، ءىس-تۇسسىز جوعالعانداردىڭ بارى حابارلاندى.

ءمينيستردىڭ ايتۋىنشا، قازىرگى ۋاقىتتا قويمالارداعى ءورت سوندىرىلگەن، جارىلىس قايتالانباعان. ول كەشىگى تۇندە اسكەري بولىمدە 10-نان استام جارىلىس بولعانىن ايتتى.

سونداي-اق ول قويماداعى زاريادتالماعان سناريادتار ارىس اسكەري بولىمىنەن جەتكىزىلگەن قارۋدىڭ قالدىعى ەكەنىن جەتكىزدى.

مينيستر بريفينگتەن سوڭ ازاتتىق راديوسى ءتىلشىسىنىڭ وتستاۆكاعا كەتۋ تۋرالى سۇراعىنا جارىلىس بولعانىن ەستىگەن العاشقى ساتتە وتستاۆكاعا كەتۋ تۋرالى ويلاعانىن، وتستاۆكا تۋرالى ارىز جازاتىنىن، شەشىمدى باسشىلىق قابىلدايتىنىن ءمالىم ەتتى.

كەشە جامبىل وبلىسى بايزاق اۋدانىنداعى اسكەري بولىمدە ساعات 19:00 شاماسىندا قويمالاردىڭ بىرىنەن ءورت شىعىپ، ونىڭ سوڭى جارىلىسقا ۇلاسقان. اپات بولعان جەرگە جاقىن قاينار، بازارباي، ءۇش-بۇلاق، جاڭاتۇرمىس اۋىلدارىنىڭ تۇرعىندارى ەۆاكۋاسيالانعان. تەمىر جول بايلانىسى ۋاقىتشا توقتاپ، تاراز قالاسىنا كىرۋ، شىعۋ شەكتەلگەن.

وسىدان 2 جىل بۇرىن ارىس قالاسىندا اسكەري قويمادا ءىرى جارىلىس بولىپ، 5 ادام قازا تاپقان. ول كەزدە 50 مىڭنان استام ادام تۇراتىن قالا تولىق ەۆاكۋاسيالانعان.