پرەزيدەنت قاسىم-جومارت توقايەۆ جامبىل وبلىسىندا بولعان جارىلىستارعا بايلانىستى شۇعىل جينالىس وتكىزدى. بۇل تۋرالى اقوردا سايتى حابارلادى.

– كەشە جامبىل وبلىسىنىڭ بايزاق اۋدانىندا توتەنشە وقيعا بولدى. قارۋلى كۇشتەرىمىزدىڭ ءوق-دارىسى ساقتالاتىن قويمانىڭ بىرىنەن ءورت شىقتى. ارتىنان بىرنەشە جارىلىس بولدى. جەرگىلىكتى تۇرعىندار امان-ەسەن. وكىنىشكە قاراي، اسكەري قىزمەتشىلەر مەن قۇتقارۋشىلار اراسىندا ادام شىعىنى بار. ولار قىزمەتتىك مىندەتىن اتقارۋ بارىسىندا ەرلىكپەن قازا تاپتى. قايتىس بولعان ازاماتتاردىڭ وتباسىنا قايعىلارىنا ورتاقتاسىپ، كوڭىل ايتامىن. جاراقات العان ادامداردىڭ تەزىرەك ساۋىعىپ كەتۋىن تىلەيمىن، – دەدى پرەزيدەنت.

پرەزيدەنت قازا تاپقان ازاماتتاردىڭ وتباسىلارىنا كومەك كورسەتۋ بويىنشا ناقتى تاپسىرمالار بەردى.

– مەملەكەتتىك ۋاكىلەتتى ورگاندار قازا تاپقان ازاماتتاردىڭ وتباسىلارىنا كومەك كورسەتۋدىڭ بارلىق شارالارىن قابىلداۋى قاجەت. جۇمىلدىرىلعان بارلىق سالا ماماندارىنىڭ جانكەشتىلىگىنىڭ ارقاسىندا جاعداي باقىلاۋعا الىنىپ، ودان دا كوپ شىعىنعا جول بەرىلمەدى. قۇتقارۋشىلارعا، دارىگەرلەرگە، پوليسيا، پروكۋراتۋرا جانە اكىمدىك قىزمەتكەرلەرىنە العىس ايتامىن. دەگەنمەن ءورتتىڭ سالدارى قيىنعا سوقتى. ادامدار زارداپ شەكتى. كوپتەگەن ازامات باسپاناسىن تاستاپ كەتۋگە ءماجبۇر بولدى. ەلدى مەكەندەردىڭ ينفراقۇرىلىمىنا زاقىم كەلىپ، ءبىرقاتار عيماراتتار قيراپ قالدى. وسىعان بايلانىستى شۇعىل شارالار قابىلداندى. ءبىراق ءالى دە كوپ قالپىنا كەلتىرۋ جۇمىستارىن جۇرگىزۋ كەرەك، – دەدى ق.توقايەۆ.

پرەزيدەنت ورتالىق جانە جەرگىلىكتى ورگانداردىڭ جۇمىسىن دۇرىس ۇيلەستىرۋ كەرەك ەكەنىن ايتتى. قاجەتسىز كەدەرگىلەردى جويىپ، ۋاقىت ۇتتىرماي جەدەل قيمىلاۋدى، ەڭ ءبىرىنشى كەزەكتە اۋىل تۇرعىندارىن ءوز ۇيلەرىنە قايتارۋ شارالارىن قولعا الۋدى تاپسىردى.

تاعى ءبىر ماڭىزدى ماسەلە رەتىندە اپاتتىڭ سەبەپتەرىن انىقتاۋ قاجەت ەكەنىن ايتتى. بۇنداي جاعدايلاردىڭ الدىن الۋ بويىنشا ناقتى شارالار قابىلداۋدى تاپسىردى.

پرەزيدەنت 2 جىل بۇرىن ارىستا بولعان جارىلىستى ەسكە الىپ، قارۋ-جاراق قويمالارىندا ءالى دە شەشىلمەگەن ءتۇيىندى ماسەلەلەردىڭ بار ەكەنىن ايتتى. پرەزيدەنت ارىس وقيعاسىنان كەيىن ارنايى تاپسىرما بەرگەنىن، ەندى وسى باعىتتاعى جۇمىستاردى جەدەلدەتىپ اياقتاۋعا تاپسىرما بەردى.

توقايەۆ جامبىل وبلىسىنداعى توتەنشە وقيعاعا بايلانىستى ءبىرقاتار شارالاردى شۇعىل قولعا الۋدى تاپسىردى.

– ءبىرىنشى، توتەنشە جاعدايدىڭ سالدارىن جويۋ ءۇشىن ۆەدومستۆوارالىق مەملەكەتتىك كوميسسيا قۇرىلسىن. وعان پرەمەر-مينيستردىڭ ورىنباسارى رومان سكليار باسشىلىق ەتسىن. رومان ۆاسيليەۆيچ، سىزگە ءقازىر جينالىس اياقتالعان سوڭ جامبىل وڭىرىنە شۇعىل بارۋدى تاپسىرامىن. جۇمىستىڭ باسى-قاسىندا بولىپ، بارلىق شارالاردى وقيعا ورنىنان ۇيىمداستىرىڭىز. ەكىنشى، قازا بولعان ازاماتتاردىڭ وتباسىن الەۋمەتتىك قورعاۋ جانە زارداپ شەككەن تۇرعىندارعا كومەك كورسەتۋ ءۇشىن بارلىق قاجەتتى شارالار قابىلدانسىن. ءۇشىنشى، دەنساۋلىق ساقتاۋ مينيسترلىگى توتەنشە وقيعا سالدارىنان جاراقات العان ازاماتتارعا جان-جاقتى مەديسينالىق كومەك كورسەتۋدى ۇيىمداستىرسىن، – دەدى پرەزيدەنت.

باس پروكۋراتۋرا مەن ىشكى ىستەر مينيسترلىگىنە وقىس وقيعانىڭ ءمان-جايىن جانە كىنالىلەردى انىقتاۋ ءۇشىن سوتقا دەيىنگى تەرگەۋ امالدارىن مۇقيات جۇرگىزۋدى قامتاماسىز ەتۋدى، ىشكى ىستەر مينيسترلىگىنە مۇددەلى مەملەكەتتىك ورگاندارمەن بىرلەسىپ، قوعامدىق ءتارتىپتى، ازاماتتاردىڭ قاۋىپسىزدىگى مەن دۇنيە-مۇلىكتىڭ ساقتالۋىن قامتاماسىز ەتۋ ءۇشىن كەشەندى شارالار قابىلداۋدى تاپسىردى.