بۇگىن شىمكەنت قالاسى ءماسليحاتىنىڭ دەپۋتاتتارى ءال-فارابي اۋدانىندا اتقارىلىپ جاتقان جۇمىستاردىڭ بارىسىمەن تانىستى. اۋدان اكىمى راشيد مىڭبايەۆ قۇرىلىسى قارقىندى ءجۇرىپ جاتقان نىساندارداعى جۇمىس بارىسىن باياندادى.

حالىق قالاۋلىلارى ەڭ الدىمەن تومەنگى وتىرار شاعىناۋدانىنىڭ 38، 40، 13/1 جانە 13/1 ا اۋلالارىندا سوعىلىپ جاتقان بالالار الاڭشالارىنا باردى. بۇگىندە وندا اباتتاندىرۋ جۇمىستارى جۇرگىزىلۋدە. اتالعان اۋلالاردا تۇرعىنداردىڭ جايلىلىعى ءۇشىن ورىندىقتار، باستىرما، قوقىس جاشىكتەرى، زاماناۋي ۇلگىدەگى ويىن ەلەمەنتتەرى ورناتىلۋدا.

سونداي-اق، ءماسليحات دەپۋتاتتارى دەمەۋشى ەسەبىنەن سالىنىپ، مامىر ايىندا پايدالانۋعا بەرىلگەن الىمبەتوۆ كوشەسى 45 ۆ مەكەنجايدا ورنالاسقان سپورت الاڭشاسىن كوردى. ءال-فارابي اۋدانىندا سەرىك ءتولباسوۆتىڭ دەمەۋشىلىگىمەن جالپى 7 سپورت الاڭشاسىن سالۋ جوسپارلانعان. ونىڭ 4ء-ى حالىق يگىلىگىنە بەرىلسە، 3ء-ى كۇز مەزگىلىندە سالىنباق.

قالالىق ءماسليحات دەپۋتاتتارى دانابەك يسابەكوۆ، ايگەرىم جۇماعۇلوۆا، قايرات سۇلەيمەنوۆ جىلىتۋ ماۋسىمىنا دايىندىق جۇمىستارىن تەكسەرۋ ماقساتىندا «قۋاتجىلۋورتالىعى-3» جىلۋ قازاندىعىن دا ارالاپ كوردى. جىلىتۋ قوندىرعىلارى مەن قازاندىقتاردىڭ تەحنيكالىق جىلىتۋ جۇيەسىمەن تانىستى.