شىمكەنت قالاسىنىڭ دەنساۋلىق ساقتاۋ باسقارماسىنىڭ باسشىسى ب.پوزيلوۆ پەن ءبىلىم باسقارماسىنىڭ باسشىسى ج.تاجييەۆانىڭ قاتىسۋىمەن اقپاراتتىق-كوممۋنيسيالىق ورتالىعىندا بالالارعا سالىناتىن ۆاكسيناسيا تۋرالى بريفينگ ءوتتى.

دەنساۋلىق ساقتاۋ باسقارماسى باسشىسىنىڭ ايتۋىنشا، ەلىمىزدە كوروناۆيرۋسقا قارسى سالىنىپ جاتقان ۆاكسينانىڭ بارلىعى 18 جاستان اسقاندارعا ارنالعان.

«بالالارعا ۆاكسينا سالىنادى ەكەن دەگەن قاۋەسەت حالىقتى ۇرەيلەندىرىپ جاتىر. ۆاكسينانىڭ بالالارعا سالىناتىنىن راستايتىن ەشقانداي رەسمي قۇجات جوق. سوندىقتان مۇنداي اڭىز اقپاراتتى تاراتۋدى دوعارۋ كەرەك. ونىڭ بارلىعى حالىقتى الاڭداتۋ ماقساتىندا جاسالىپ جاتىر دەپ ويلايمىن. ال اعىمداعى جىلدىڭ 15-قىركۇيەگىنەن باستاپ ەلىمىزدە تۇماۋعا قارسى ەكپە سالدىرۋ جۇمىستارى باستالدى. بۇل ۆاكسينا تۇرعىلىقتى مەكەن-جايى بويىنشا كەلىسىم بەرگەن جاعدايدا ءقاۋىپ قاتەر توبىنداعى ازاماتتارعا تەگىن سالىنادى. بارلىق قالا تۇرعىندارىن «وقۋشىلارعا كوۆيدكە قارسى ۆاكسينا سالىنادى» دەگەن قاڭقۋ سوزدەرگە سەنبەۋگە شاقىرامىن»،- دەدى ب.پوزيلوۆ.

قالانىڭ باس دارىگەرى شىمكەنتتە ەپيدەميالوگيالىق جاعدايدىڭ تۇراقتالعاندىعىن اتاپ ءوتتى. بۇگىندە 1134 ازامات ستاسيوناردا ەم قابىلداۋدا. توسەك-ورىن تولىمدىلىعى 45% قۇرايدى، 1366 توسەك ورنى بوس. ال قالا بويىنشا بۇگىندە I كومپونەنتپەن 443 287 ادامعا، ءىى كومپونەنتپەن 375 000 ادامعا ۆاكسيناسيالاۋ جاسالدى.
ءوز كەزىندە ءبىلىم باسقارماسىنىڭ باسشىسى ج.تاجييەۆا كەز-كەلگەن ۆاكسينا اتا-انانىڭ رۇقساتىنسىز سالىنبايتىنىن جانە تارالىپ جاتقان اقپاراتتاردىڭ جالعان ەكەنىن ايتتى.

بۇگىنگى تاڭدا قالاداعى 203 مەكتەپتە 233 مىڭنان اسا وقۋشى وقيدى. بارلىق ءبىلىم بەرۋ مەكەمەلەرىندە سانيتارلىق تالاپ قاتاڭ ساقتالعان.