شىمكەنت قالاسىنداعى بالالار اۋرۋحاناسىنىڭ جانە №1 قالالىق اۋرۋحانانىڭ ماماندارى 13 جاستاعى بالاعا كۇردەلى وتا جاسادى. دارىگەرلەر ءجاسوسپىرىمنىڭ تاماعىندا پايدا بولعان ۇلكەن ىسىكتى حيرۋرگيالىق جولمەن الىپ تاستادى. جاس پاسيەنت ەكى اۋرۋحانانىڭ باس دارىگەرلەرىنىڭ كەلىسىمىمەن تەكسەرىلىپ، اۋرۋحاناعا جاتقىزىلدى. بۇل تۋرالى دەنساۋلىق ساقتاۋ باسقارماسى حابارلادى.

مامانداردىڭ ايتۋىنشا، قالقانشا بەز ايماعىندا مۇنداي كولەمدەگى ىسىكتەر سيرەك كەزدەسەدى، ال ناۋقاستا ديامەترى 10 سم-گە جەتكەن. ونى الىپ تاستاۋ وپەراسياسى ءبىر جارىم ساعاتقا سوزىلدى. №1 قالالىق كلينيكالىق اۋرۋحانانىڭ باس دارىگەرى ابىلاي دونباي جانە بالالار اۋرۋحاناسىنىڭ حيرۋرگيالىق جۇمىس جونىندەگى ورىنباسارى سارىباي سۇلتانعالي باستاعان حيرۋرگتار ىسىكتى زەرگەرلىك دالدىكپەن الىپ تاستادى. دارىگەرلەردىڭ ايتۋىنشا، وپەراسيا ءساتتى ءوتتى. ءقازىر ناۋقاستىڭ جاعدايى جاقسى.

«قالقانشا بەزىنىڭ فۋنكسياسىنىڭ بۇزىلۋىنا بايلانىستى ناۋقاستا ونىڭ مولشەرى جىل سايىن ارتىپ كەلگەن. ناتيجەسىندە ونىڭ ءومىرىنىڭ ءار كۇنى سوڭعى بولۋى مۇمكىن ەدى، ويتكەنى ىسىك قالىپتى دەم الىپ، سويلەۋگە كەدەرگى كەلتىردى»، - دەدى اۋرۋحانانىڭ باس دارىگەرى ابىلاي دونباي.

مۇنداي وپەراسيا بالالار اۋرۋحاناسىندا العاش رەت جاسالدى. حيرۋرگتار حيرۋرگيا كەزىندە بىلىكتى ماماننان باعا جەتپەس تاجىريبە العانىن، ەندى قالقانشا بەزىنە وپەراسيا جاساۋعا دايىن ەكەندەرىن ايتادى.

ايتا كەتەيىك، بيىل بالالار اۋرۋحاناسىندا ەندوكرينولوگيا سالاسى بويىنشا پەدياتريالىق ءبولىم اشىلدى. سونىمەن قاتار، اۋرۋحانا قاراجاتى ەسەبىنەن ەندوكرينولوگ ماماندىعى بويىنشا دارىگەر-رەزيدەنت دايىندالۋدا. جالپى، ءقازىر قالا تۇرعىندارى قالالىق بالالار اۋرۋحاناسىنان مامانداندىرىلعان كومەك الا الادى.