ق ر پرەمەر-مينيسترى ا.ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ ۇلتتىق ەكونوميكا ءمينيسترى اسەت ەرعالييەۆ ەكونوميكالىق كورسەتكىشتەردىڭ ورىندالۋى جونىندە حابارلاما جاسادى. «بارلىق كورسەتكىش بويىنشا وڭ ءوسىم 5 وڭىردە – شىمكەنت قالاسىندا، سونداي-اق الماتى، جامبىل، قوستاناي، ماڭعىستاۋ وبلىستارىندا بايقالادى. ال، 6 كورسەتكىش بويىنشا 8 وڭىردە ءوسىم بار. 3 وڭىردە 5 كورسەتكىش بويىنشا ءوسىم تىركەلدى. باتىس قازاقستان وبلىسىندا تەك 3 كورسەتكىش بويىنشا ءوسۋ بايقالدى»، - دەدى اسەت ەرعالييەۆ.

شىمكەنت قالاسىندا نەگىزگى كاپيتالعا سالىنعان ينۆەستيسيا كولەمى 2021 جىلدىڭ 8 ايىندا 201،1 ملرد تەڭگەنى قۇراپ، 2020 جىلدىڭ ءتيىستى كەزەڭىمەن سالىستىرعاندا 135،9 پايىزعا ارتقان. نەگىزگى كاپيتالعا باعىتتالعان ينۆەستيسيانىڭ قۇرىلىمىندا جەكەمەنشىك ينۆەستيسيانىڭ ۇلەسى 72 پايىز بولسا، مەملەكەتتىك ينۆەستيسيانىڭ ۇلەسى – 28 پايىزدى قۇرايدى.

جەكەمەنشىك ينۆەستيسيا ۇلەسىنىڭ ارتۋى ينۆەستيسيالىق شتاب جۇمىسىنىڭ تيىمدىلىگىن كورسەتەدى. اپتا سايىن ءوتىپ جاتقان شتاب وتىرىستارىندا ينۆەستيسيا سالۋعا قىزىعۋشىلىق تانىتقان كاسىپكەرلەردىڭ وزەكتى ماسەلەلەرىن شەشۋ ءۇردىسى قالىپتاستى. ونلاين رەجيمدە ءوتىپ جاتقان جۇمىس كەزدەسۋلەرىندە بيزنەس وكىلدەرى تاپ بولاتىن بيۋروكراتيالىق كەدەرگىلەردى جويۋ جونىندە شۇعىل شەشىمدەر قابىلدانىپ، ينۆەستيسيالىق جوبالاردى ىسكە اسىرۋعا قاجەتتى ينفراقۇرىلىمىن جۇيەلەرىن تارتۋ، جەرگە ورنالاستىرۋ ماسەلەلەرى وڭتايلى شەشىمىن تاۋىپ جاتىر.

مۇنداي قولداۋلاردىڭ ناتيجەسىندە قاڭتار-تامىز ايلارى ارالىعىنداعى كەزەڭدە جىلجىمايتىن مۇلىك وپەراسيالارى 76،3 پايىزعا، كولىك سالاسىنداعى جوبالار 61،9 پايىزعا، ونەركاسىپ جوبالارى 56،1 پايىزعا، كوممەرسيالىق تۇرعىن ۇيلەر قۇرىلىسى 51،7 پايىزعا ورىندالدى.

تۇرعىن ءۇي قۇرىلىسى سالاسىندا بيىلعى جىلى بارلىق قارجىلاندىرۋ كوزدەرى ەسەبىنەن 14 541 پاتەرلى 275 كوپقاباتتى تۇرعىن ءۇيدىڭ قۇرىلىسى جۇرگىزىلۋدە.

جالپى اعىمداعى جىلى 1 ميلليون شارشى مەتردەن استام تۇرعىن ءۇي پايدالانۋعا بەرىلەدى دەپ جوسپارلانعان. جىل سوڭىنا دەيىن تۇرعىن ءۇي كەزەگىندە تۇرعان 1916 وتباسىنا كوممۋنالدىق پاتەرلەر بەرىلسە، جەڭىلدەتىلگەن كرەديتتىك تارتىپپەن 2096 پاتەر پايدالانۋعا بەرىلەدى. حالىقتىڭ از قامتىلعان ساناتتارى ءۇشىن 500 تۇرعىن ءۇي سەرتيفيكاتتارى تابىستالماق.

قالانىڭ بازالىق سەكتورلارىندا وڭ ءوسىم ديناميكاسىن ساقتاپ، تۇرعىنداردىڭ ءال-اۋقات جاعدايىن ارتتىرۋ باعىتىنداعى بۇل جۇمىستار الداعى ۋاقىتتا دا جۇيەلى جالعاسىن تابادى.