شىمكەنت قالاسىنىڭ ءبىلىم باسقارماسىنا قاراستى سايرام كومەكشى مەكتەپ-ينتەرناتى بۇدان بىلاي «سايرام كومەكشى مەكتەپ-ينتەرنات-كوللەدجى ارنايى كەشەنى» كوممۋنالدىق مەملەكەتتىك مەكەمەسى بولىپ قايتا قۇرىلدى.

بۇرىنعى مەكتەپ-ينتەرناتتىڭ ورنىنا تيپتىك ۇلگىدەگى جاڭا عيمارات سالىنۋدا. بۇگىندە عيمارات قۇرىلىسى 95 پايىزعا اياقتالىپ وتىر. وقۋ كەشەنىندە 210 بالا تاربيە مەن ءبىلىم الاتىن بولادى. جوباعا سايكەس وقۋ كەشەنى جاتاقحانامەن، وقۋ عيماراتىمەن، اكت جانە سپورت زالدارىمەن، مەديسينالىق پۋنكتپەن، اسحانامەن قامتىلعان. كەشەننىڭ 35 سىنىپتىق بولمەلەرى وقۋ زاماناۋي جابدىقتارىمەن قامتاماسىز ەتىلەدى.

زاماناۋي ۇلگىدە بوي كوتەرگەن كەشەندە تىگىنشىلىك، اسپازدىق كاسىپتى ۇيرەتۋگە ارنالعان شەبەرحانا بولمەلەرى، ارنايى كۇتىم قاجەت ەتەتىن بالالارعا ارنالعان كوررەكسيالىق وقۋ، سەنسورلىق ءبىلىم الۋ، پسيحولوگ، لوگوپەد مامانداردىڭ سىنىپ بولمەلەرى ارنايى جابدىقتالىپ، جازعى سپورت الاڭى قاراستىرىلعان.

مەكەمە وقۋشىلارىنا ارنالعان ساباقتار قازاق تىلىندە جۇرگىزىلەدى. وقۋشىلارعا كاسىپتىك ماماندىقتار بويىنشا ديپلوم بەرىلەدى. قوسىمشا ءبىلىم بەرۋدە قولونەر ۇيىرمەلەرى جۇمىس ىستەيتىن بولادى.

ايتا كەتەيىك، مەكتەپ-ينتەرناتتىڭ عيماراتى 1916 جىلى سالىنعان. 1935 جىلى قوسىمشا بولمەلەر قوسىلىپ، بالالار ءۇيى بولعان. 1975 جىلى «سايرام كومەكشى مەكتەپ-ينتەرناتى» بولىپ وزگەرتىلدى. مەكەمەنىڭ فۋنكسيونالدىق مىندەتتەرىنە ارنايى وقىتۋدى قاجەت ەتەتىن بالالاردىڭ پسيحوفيزيكالىق كەمشىلىكتەرىن تۇزەتۋ، ولاردىڭ فۋنكسيونالدىق ساۋاتتىلىعىن ارتتىرۋ، ەڭبەككە باۋلۋ جانە قوعامدىق ومىرگە بەيىمدەۋ كىرەدى.