شىمكەنت قالاسىنىڭ تۋريزم سالاسىندا ءبىلىم الىپ جاتقان ستۋدەنتتەر ەندى تۇركيادا تاجىريبە الماسا الادى. شىمكەنت قالاسىنىڭ تۋريزم جانە سىرتقى بايلانىستار باسقارماسى مەن «Visit Shymkent» تۋريستىك اقپاراتتىق ورتالىعىنىڭ قىزمەتكەرلەرى ءىسساپار اياسىندا انتالياداعى تۋريزم اكادەمياسىنىڭ رەكتورى زافەر بيككەنوگلۋمەن كەزدەسىپ، كەلىسسوزدەر جۇرگىزدى. انتالياداعى تۋريزم اكادەمياسى حالىقارالىق دەڭگەيدەگى قوناقجايلىلىق پەن تۋريزم يندۋسترياسى ءۇشىن جوعارى بىلىكتى مامانداردى دايىندايتىن بىرەگەي وقۋ ورىندارىنىڭ ءبىرى بولىپ سانالادى.

كەزدەسۋ بارىسىندا تۋريستىك قارىم-قاتىناستى جاقسارتىپ، جاستاردىڭ ءوزارا تاجىريبە الماسۋى، سونداي-اق، بىلىكتىلىكتەرىن ارتتىرا وتىرىپ، وقۋعا قولداۋ كورسەتۋ جونىندە كەلىسىم ورنادى. ناتيجەسىندە قالاداعى جوعارى وقۋ ورىندارىنىڭ اراسىنداعى كەلىسىم نەگىزىندە ەكى جاقتى وقۋ جوسپارىن جۇزەگە اسىرا وتىرىپ، حالىقارالىق دەڭگەيدەگى 2 ديپلوم الۋعا مۇمكىندىك بەرىلمەك. ول ءۇشىن تۇركيا تاراپى شىمكەنت قالاسىنىڭ تۋريزم سالاسى بويىنشا ءبىلىم بەرەتىن جوعارى وقۋ ورىندارىمەن كەلىسىمگە كەلۋگە ءازىر. ودان وزگە، ستۋدەنتتەر انتاليا قالاسىنداعى ورنالاستىرۋ ورىندارىندا 5 ايلىق وندىرىستىك ىس-تاجىريبەدەن ءوتىپ، حالىقارالىق دەڭگەيدەگى سەرتيفيكات الادى.

الداعى ۋاقىتتا اكادەميا باسشىلىعى باسقارما، وقۋ ورىندارى جانە تۋريستىك بيزنەس وكىلدەرىمەن مەموراندۋمعا تۇرعان جاعدايدا ءتۇرلى ءىس-شارالارعا قولداۋ كورسەتىپ، بىرلەسە جۇمىس جۇرگىزۋگە دايىن.