وڭىرلەردە ينفەكسيالىق توسەك-ورىنداردى قىسقارتۋ جۇمىسى جۇرگىزىلىپ جاتىر. بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي مالىمدەدى.

«25 تامىزدان بەرى الماتى، نۇر-سۇلتان، شىمكەنت قالالارىندا، اتىراۋ، قاراعاندى، تۇركىستان، ماڭعىستاۋ وبلىستارىندا كوروناۆيرۋس ينفەكسياسىن جۇقتىرعان ناۋقاستاردى ەمدەۋگە ارنالعان ينفەكسيالىق بولىمشە رەتىندە اشىلعان 57 نىسان جابىلدى. جالپى توسەك-ورىن قورى 12 211 توسەك-ورىنعا قىسقاردى»، - دەدى الەكسەي سوي.

ماسەلەن، شىمكەنت قالاسىندا 2 397 ينفەكسيالىق توسەك ورىن جابىلىپ، 5 496 توسەك-ورىن رەزەرۆكە قويىلدى. قالادا 22 تامىز-13 قىركۇيەك ارالىعىندا ينفەكسيا جۇقتىرۋ دەرەگى تومەندەگەنىن كورۋگە بولادى.

ءقازىر 15 ينفەكسيالىق ستاسيوناردا بارلىعى 2 183 ورىن بار، توسەك-ورىن تولىمدىعى 36%-دى قۇرايدى، 1391 توسەك-ورىن بوس. ينفەكسيالىق ستاسيوناردا 791 ناۋقاس ەمدەلۋدە، جانساقتاۋ بولىمىندە – 158 ناۋقاس ەم قابىلداۋدا. وتكەن تاۋلىكتە 217 ادام اۋرۋىنان ايىعىپ، ۇيىنە شىعارىلدى.

جالپى جىل باسىنان بەرى شىمكەنتتە 32 770 ادام كۆي جۇقتىرعان. 31 708 ادام جازىلىپ شىقتى، 1157 ادام وكىنىشكە وراي قايتىس بولدى.

بۇگىندە كوروناۆيرۋسقا قارسى ۆاكسيناسيالاۋ بويىنشا شىمكەنت 2-ورىندا تۇر. ەگۋ ناۋقانى باستالعالى بارلىعى 463 001 ادام ۆاكسيناسيالاندى. ونىڭ ىشىندە 387 478 ادام ۆاكسينانىڭ ەكى كومپونەنتىن دە العان. بۇل ەكپە الۋعا بولاتىن ساناتتاعىلاردىڭ 86،1 پايىزىن قۇرايدى.