قازاقستان رەسپۋبليكاسىنىڭ تاۋەلسىزدىگىنە 30 جىلدىعىنا وراي جانە «ءبىرتۇتاس ۇلت – ءبىرتۇتاس اسكەر» باعدارلاماسى اياسىندا «ايبىن – 2021» VII رەسپۋبليكالىق اسكەري-پاتريوتتىق جاستار جيىنىنىڭ اشىلۋ سالتاناتى ونلاين فورماتتا ءوتتى.

سالتاناتتى شاراعا ق ر پرەمەر-مينيسترىنىڭ ورىنباسارى ە.توعجانوۆ پەن ءبىرقاتار ۆەدوموستۆو وكىلدەرى قاتىستى. ال، رەسپۋبليكانىڭ بارلىق وڭىرىنەن وزىق شىعىپ، ىرىكتەلگەن اسكەري-پاتريوتتىق كلۋبتار بەينە-كونفەرەنسيا ارقىلى بايلانىستى. ولاردىڭ قاتارىندا ق ر قك اسكەري بولىمدەرىنىڭ، اسكەري مەكتەپتەر مەن ءبىلىم باسقارمالارىنا قاراستى مەكتەپتەردەن قۇرالعان 74 كوماندا بار.

شىمكەنت قالاسىنىڭ قورعانىس ىستەرى جونىندەگى دەپارتامەنتى مەن قالالىق ءبىلىم باسقارماسىنىڭ ۇيىمداستىرۋىمەن شىمكەنتتىك جاس ساربازدار بەينە-بايلانىسقا كورمە ورتالىعىنان شىقتى. جيىنعا شىمكەنت قالاسى اكىمىنىڭ قورعانىس ىستەرى جونىندەگى كەڭەسشىسى ت.بيدايبەكوۆ، شىمكەنت قالاسى قورعانىس ىستەرى دەپارتامەنتى باسشىسىنىڭ تاربيە جانە يدەولوگيا جۇمىستارى جونىندەگى ورىنباسارى ر.مادياروۆ، شىمكەنت قالاسى ءبىلىم باسقارماسىنىڭ باسشىسى ج.تاجييەۆا قاتىستى.

شىمكەنت قالاسىنداعى ءبىلىم مەكەمەلەرى اراسىنان ىرىكتەۋ كەزەڭىنەن سۇرىنبەي وتكەن №52 مەكتەپ-ليسەيدىڭ «بارىس»، №68 جالپى ورتا مەكتەبىنىڭ «سۇڭقار»، №99 مەكتەپ-گيمنازيانىڭ «ارىستان» اسكەري-پاتريوتتىق كلۋبتارى مەن «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى بەينە-بايلانىس ارقىلى ق ر پرەمەر-مينيسترىنىڭ ورىنباسارى ە.توعجانوۆتىڭ قۇتتىقتاۋ ءسوزىن تىڭدادى.

جاستار اراسىنداعى اسكەري-پاتريوتتىق تاربيەنى جەتىلدىرۋ، ق ر قارۋلى كۇشتەرىنىڭ مارتەبەسىن كوتەرىپ، اسكەري قىزمەتتى ناسيحاتتاۋعا باعىتتالعان سايىس رەسپۋبليكانىڭ تۇكپىر-تۇكپىرىندە 6-22 قازان ارالىعىندا ارنايى كەستەگە سايكەس وتكىزىلىپ، 30 قازاندا قورىتىندىسى جاريالانباق. شىمكەنت قالالىق ءبىلىم باسقارماسىنان قاتىسىپ وتىرعان ءار اسكەري-پاتريوتتىق كلۋبتىڭ قۇرامىندا 10 ۇل، 5 قىز بالا بار. ولار زياتكەرلىك ويىنى، چەللەنجدەر بايقاۋى، شىعارماشىلىق، ونەرتاپقىشتىق، سپورتتىق جانە العاشقى مەديسينالىق كومەك كورسەتۋ سىندى ءتۇرلى سايىستاردا ب ا ق سىنايدى.