ونى كوزى قاراقتى وقىرمان مەن كورەرمەن وتە جاقسى تانيدى.سەبەبى ول ءوزىنىڭ مۇڭ-مۇقتاجىن عانا ەمەس، ءوزى قۇرالپى جەتىمدەردىڭ قوعامداعى قازىرگى جاعدايى تۋرالى جۇرگەن جەرىندە ءسوز ەتكەندى قۇپ كورەدى. وسى ەلدىڭ ازاماتى رەتىندە استى  قازىناعا تولى وتاندا جەتىمدىك كورگەنى ءۇشىن قاتتى اشىنادى.  بىرەۋ ونى  «اناسىن سوتقا بەرگەن بالا» دەپ اتاسا، ەندى بىرەۋلەر  الگى تەلەديدارعا ءجيى شىعاتىن  سەرىك ەمەس پە ەدى دەپ تاني كەتەدى. ول تۋرالى «قامشى » پورتالى دا  ءسوزدىڭ تيەگىن اعىتىپ كورگەن بولاتىن http://old.qamshy.kz/؟p=24854.  الماتى قالاسىنداعى تۇرىپ جاتقان جاتاقحاناسىنان شىعارىپ جىبەرەتىن بولعاندىقتان، ىقپالدى ادامداردىڭ كومەگىنە ءزارۋ ەكەنىن اقپارات الاڭىنا  كەلىپ ايتىپ كەتىپ ەدى. سول سەرىك  كەنجەبەك رەداكسيامىزعا كەشە تاعى كەلىپتى. ءتۇرى جۇدەۋ. كۇزدىڭ سۋىعى مەن قوعامنىڭ قاتالدىعىنا ابدەن قالتىراعانى بايقالادى. جۇمىس تاپپاي ءجۇر ەكەن. جاتاقحاناسىنا اي سايىن 15 مىڭ تەڭگە تولەپ تۇرىپ جاتسا كەرەك. «جاناشىر ادامدار وسى ۋاقىتقا دەيىن قارىز بەرىپ، بولمەمنىڭ اقىسىن تولەپ كەلدىم. ەندى ەلدەن قاشانعى اقشا الا بەرەمىن. ەر جىگىتپىن عوي. ماڭداي تەرىممەن نان تاپقىم كەلەدى. ءبىراق ەكى قولعا ءبىر كۇرەك تابىلماي تۇر. جوعارعى ءبىلىمىم جوق. سوندىقتان قاعاز «كەمىرىپ»، پەرنەتاقتانىڭ تۇيمەلەرىن شەرتەتىن جۇمىس ىزدەپ جۇرگەن جوقپىن. جىگىتكە ادال جۇمىستىڭ بارلىعى قولايلى عوي. سوندىقتان قانداي جۇمىس بولسا دا، جاساي بەرەمىن. تەك سول جۇمىس تابىلماي تيتىعىمدى شىعاردى»،-دەيدى سەرىك. وسىلايشا قازاقتىڭ ءبىر بالاسى الىپ شاھاردىڭ قاي بۇرىشىندا  ەكى قولىنا ءبىر كۇرەك تابىلار دەپ  سابىلىپ ءجۇر. الەۋمەتتىك جەلىلەردە كاسىپ اشىپ، جۇمىسىن دوڭگەلەتىپ جاتقان قىز-جىگىتتەردى ءجيى كورەمىز عوي. بالكىم، سول ازاماتتاردىڭ سەرىككە ءبىر سەپتىگى ءتيىپ قالار. بالا كەزىنەن تاعدىردىڭ تەپكىسىن كورگەن ۇلعا ۇلتتىق جاناشىرلىق تانىتساق قايتەدى؟ ول جۇمىستان بەزىپ، الاقان جايىپ وتىرعان جوق. ول جۇمىس ىزدەپ ءجۇر. كوشەدە قول اياعى بالعاداي بولسا دا الاقان جايۋمەن كۇنەلتىپ جۇرگەندەرگە دە جاناشىرلىق تانىتىپ جاتامىز عوي. وعان قاراعاندا سەرىكتىڭ تالپىنىسى بار. ەندى قالىپتاسىپ كەلە جاتقان ازامات سىنىپ كەتپەۋى ءتيىس دەپ ەسەپتەيمىن. ءسىز قالاي ويلايسىز؟

اينۇر تولەۋ