«ۋكراينانىڭ شىعىسىنداعى قارۋلى قاقتىعىس بىرنەشە ايدا شەشىمىن تابۋى مۇمكىن»، - دەپ مالىمدەدى اقش-تىڭ مەملەكەتتىك حاتشىسى دجون كەرري MSNBC ەفيرىندە بەرگەن سۇحباتىندا. بۇل تۋرالى «قامشى» پورتالى unian.info-عا سىلتەمە بەرە وتىرىپ حابارلايدى.

«بۇل كۇردەلى ماسەلەنىڭ شەشىمى بار دەپ ويلايمىن. وعان سەبەپ، ءبىز بۇرىنىراقتا تالقىعا سالعان «مينسك» جوسپارىن تولىعىمەن ىسكە قوسۋ ءۇشىن ۋكراينا پرەزيدەنتى پەتر پوروشەنكو، فرانسيا پرەزيدەنتى فرانسۋا وللاند، گەرمانيا كانسلەرى انگەلا مەركەل جانە رەسەي پرەزيدەنتى ۆلاديمير پۋتينمەن باس قوسپاقپىز. ماڭىزدى كەزدەسۋ 2ء-شى قازان كۇنى پاريجدە وتەتىن بولادى»، - دەدى كەرري.

اتالمىش كەزدەسۋدىڭ وتكىزىلۋ مەرزىمى 10-قىركۇيەكتە، پەتر پوروشەنكونىڭ ارىپتەستەرىمەن تەلەفون ارقىلى ورناتقان بايلانىسىندا جوسپارلانعان بولاتىن.

 «ءبىرقاتار سۇراقتارعا جاۋاپ الۋ ءۇشىن الداعى ءۇش اي بويى بىرىگىپ جۇمىس ىستەي الامىز دەگەن ويدامىن. ەگەر سەرىكتەستىككە جول بار بولسا، وندا ۋكراينانىڭ پروگرەسكە جەتۋ جولىندا دا پوتەنسيالى بار!»، - دەپ قورىتىندىلادى كەرري.

ايتا كەتەيىك، اعىمداعى جىلدىڭ 12-مامىرىندا دجون كەرري، ۆلاديمير پۋتين جانە رەسەيدىڭ سىرتقى ىستەر ءمينيسترى سەرگەي لاۆروۆ سوچي قالاسىندا كەزدەسكەن بولاتىن. اشىق تالقىلاۋ ۋكراينا، يران جانە سيريا جاعدايلارىنا ارنالعان بولاتىن.

نازگۇل نازار