شىمكەنت قالاسىندا جىل باسىنان بەرى 55 مىڭعا جۋىق ادام كت زەرتتەۋىنەن وتكەن. ولاردىڭ باسىم بولىگى پنيەۆمونياعا شالدىققان جانە كوروناۆيرۋس دياگنوزى راستالعان ناۋقاستار. بۇل تۋرالى قالالىق دەنساۋلىق ساقتاۋ باسقارماسى حابارلادى.

كومپيۋتەرلىك توموگرافيا اپپاراتى قالاداعى 21 مەديسينالىق ۇيىمدا بار. ال، قالالىق ينفەكسيالىق اۋرۋحانا مەن №2 جانە №3 اۋرۋحانالاردا كت اپپاراتى تاۋلىك بويى جۇمىس ىستەيدى.

كومپيۋتەرلىك توموگرافيا اپپاراتى وكپەسى قابىنعان ناۋقاستاردى ەمدەۋدە زور سەپتىگىن تيگىزەدى. كت-دياگنوستيكاسى دارىگەرلەردىڭ پاتولوگيانىڭ بار-جوعىن 100 پايىز دالدىكپەن انىقتاۋعا، ەمدەۋدىڭ ءتيىمدى تاكتيكاسىن ازىرلەۋگە مۇمكىندىك بەرەدى.

بۇگىندە دارىگەرلەرىمىز ناۋقاستارعا ەمدەۋدىڭ ءتيىمدى تاكتيكاسىن قولدانا وتىرىپ، وكپەنىڭ زاقىمدانۋ پايىزى 80-90 عا جەتكەن ازاماتتاردى جازىپ شىعارۋدا.

كومپيۋتەرلىك توموگرافيا (كت) - ءارتۇرلى اۋرۋلاردى دياگنوستيكالاۋدىڭ زاماناۋي ادىستەرىنىڭ ءبىرى. بۇل زەرتتەۋ ءادىسىنىڭ نەگىزى رەنتگەن ساۋلەلەرىنىڭ ارەكەتى بولىپ تابىلادى. قۇرىلعى پاسيەنتتىڭ اينالاسىندا اينالادى جانە بىرنەشە سۋرەتكە تۇسىرەدى، ونى كومپيۋتەر وڭدەيدى جانە دارىگەر قورىتىندىلايدى. كومپيۋتەرلىك توموگرافيا ادامنىڭ ىشكى اعزالارى مەن تىندەرىنىڭ اۋرۋلارىن دياگنوستيكالاۋ ءۇشىن جۇرگىزىلەدى.