اۋعاندىق شەنەۋنىكتەر قۇندىز قالاسىنىڭ تاليباندىقتاردان تارتىپ الىنعانى تۋرالى مالىمدەدى. بۇل تۋرالى «قامشى» پورتالى foxnews.com-عا سىلتەمە جاساي وتىرىپ حابارلايدى.

قۇندىز قالاسىنىڭ اكىمى گامدۋللاح دانيشي قاۋىپسىزدىك ورگاندارى قالا بيلىگىن بۇگىن تۇندە اۋىر كۇرەستىڭ ناتيجەسىندە قايتارا العانىن ايتتى. «قوسىمشا جاردەم-كۇشكە يە بولعان مەزەتتە، ءبىز قۇندىز ىشىندە ماسشتابتى وپەراسيامىزدى باستاپ كەتتىك. ناتيجەسىندە تاليباندىقتار قاشىپ قۇتىلدى»، - دەدى ول، جۋرناليستەرگە بەرگەن سۇحباتىندا.

اۋعانستاننىڭ ءىىم وكىلى سەديك سەديگگي دە قالانىڭ بەيسەنبى كۇنى 3.30-دا قايتارىپ الىنعانى جونىندە العاشقىلاردىڭ ءبىرى بولىپ تۆيتتەردە جازعان بولاتىن. ءبىراق، قالانى تازارتۋ وپەراسياسىنىڭ ءالى بىرنەشە كۇنگە سوزىلۋى مۇمكىن دەدى.

ول «Associated Press-كە» بەرگەن سۇحباتىندا قۇندىز قالاسىن قايتارىپ الۋ بىرىككەن اسكەردىڭ، پوليسيانىڭ جانە تاليباندىقتارمەن ورناتىلعان بلوكپوستاردىڭ كوزىن قالايدا جويۋ دەگەن ماقساتتىڭ عانا ارقاسىندا ىسكە اسقانىمەن ءبولىستى. سونىمەن قاتار، تۇرعىلىقتى حالىققا ارنالعان نەگىزگى قاجەتتىلىكتەر مەن دارى-دارمەكتەر جاقىن ارادا جەتكىزىلەتىنىن ايتتى.

سەديگگي سارسەنبىدەن باستاۋ العان كۇرەستە 200 تاليباندىق قازا تاپقانىن ايتسا، مەملەكەتتىك قۇربان بولعاندار سانى قانشانى قۇرايتىنىن جاريا ەتپەدى.

قۇندىزدىڭ پوليسيا باستىعى سارۆار حۋسايني قازا تاپقان تاليباندىقتاردىڭ مۇردەلەرىنىڭ كوبى قالا كوشەلەرىنەن تابىلعانىن ايتتى. ونىڭ سوزىنە سۇيەنسەك، بۇلىكشىلەردىڭ ءبىرازى الىگە دەيىن قارا حالىقتىڭ ۇيىندە تىعىلىپ وتىرعان كورىنەدى. سەبەبى، قالانىڭ ءتۇرلى ايماقتارىندا اتىستار مەن ۇرىستاردىڭ ورىن الىپ جاتقانى جونىندە ءبىراز قوڭىراۋلار ءتۇسىپ جاتىر ەكەن.

قۇندىز تۇرعىنى زابيوللا قالانىڭ نەگىزگى الاڭىنا جاقىن تۇرادى. ونىڭ ءسوزىن ارقاۋ ەتسەك، قالاداعى بۇلىكشى ارەكەتتەر ءالى جالعاسۋدا. تۋرا ۇيىنەن قوڭىراۋ سوققان ول: «جاعداي مۇلدە ۋشىعىپ كەتتى، مەن جاڭا عانا ءۇيىمنىڭ جانىنان بومبانىڭ جارىلعانىن ەستىدىم»، - دەگەن بولاتىن.

بۇلىكشى ارەكەت باستالعان مەزەتتە قۇندىزعا قانشا اسكەر كەرەكتىگىن بىردەن ايتۋ مۇمكىن ەمەس ەدى. سەبەبى، تاليباندىقتاردىڭ دۇيسەنبى كۇنى كەنەت ۇيىمداستىرعان شابۋىلى ۇكىمەتتى دە، اسكەري قىزمەتتى دە ءبىراز تىعىرىققا تىرەگەن ەكەن.

سارسەنبى كۇنى تاڭەرتەڭ اۋعان اسكەرىنە كومەك رەتىندە اقش-تىڭ اۋە سوققىلارى باستالدى. ءۇش امەريكاندىق اۆياسوققى قالا ماڭىنداعى تاليباندىقتار ورنىققان ايماققا باعىتتالدى. اقش اسكەرىنىڭ باسپا ءسوز حاتشىسى برايان تريبۋس اقش پەن ناتو-نىڭ كواليسيا كەڭەسشىلەرى دە قۇندىز قالاسىنا كەلىپ جەتكەنىن جەتكىزگەن بولاتىن.

نازگۇل نازار