ق ر ۇكىمەتى اعىمداعى ايدىڭ 7-نە دەيىن اكسيزدىك ونىمدەرگە قاتىستى قولدانىلاتىن ناقتى شەشىمدەردى قابىلدايدى. پارلامەنت ءماجىلىسىنىڭ پلەنارلى وتىرىسىندا ق ر ۇلتتىق ەكونوميكا ءمينيسترى ەربولات دوسايەۆ مىرزا وسىلاي دەپ مالىمدەگەن.   بۇل تۋرالى «قامشى» پورتالى zakon.kz-كە سىلتەمە جاساي وتىرىپ حابارلايدى.

قازاقستانداعى سالىقتان جالتارۋ، كەدەندىك باقىلاۋدىڭ نەگىزگى پروبلەمالارىن تالقىلانعان ءماجىلىستىڭ پلەنارلى وتىرىسىندا دەپۋتات ۆلاديسلاۆ كوساريەۆ شەكارادان زاڭسىز وتكىزىلگەن الكوگولدىك تاۋارلاردىڭ ماسەلەسىن كوتەرگەن. كوتەرگەندە ءجاي كوتەرگەن جوق. ارزان اراقتىڭ قازاقستاندىق نارىقتى جاۋلاپ الۋىنا بايلانىستى وتاندىق وندىرۋشىلەردىڭ ساۋداسى باسەڭدەپ قالعانىن ايتتى.

— مەنىڭ سىزدەرگە ايتايىن دەگەنىم، ءبىزدىڭ ەلىمىزدەگى الكوگولدىك سۋسىندار ءوندىرىسىنىڭ كورسەتكىشى سوڭعى جىلدارى كۇرت تومەندەپ كەتكەن. ويتكەنى وتاندىق وندىرۋشىلەر، كورشىلەس رەسەيدەن اكەلىنەتىن ارزان ىشىمدىكتەرگە باسەكەلەس بولا الماي جاتىر. بىزدە زاڭسىز اكەلىنگەن ارزان اراقتار نارىقتى جاۋلاپ العان. مىسالى، جاسىراتىنى جوق، ءقازىر كادىگى اق اراقتىڭ ەڭ  ارزانى دۇكەندەردە 450-اق تەڭگە تۇرادى. ال وتاندىق اكسيزدىك ونىمدەردىڭ باعاسى 2،5 مىڭ تەڭگە. مەن سىزگە كەيىن سول جەرلەردىڭ مەكەن-جايىن دا كورسەتىپ بەرەمىن. ال بۇل ارزان ىشىمدىكتەر قايدان كەلگەن؟ ارينە، زاڭسىز كىرگىزىلگەن. سونىڭ سالدارىنان، قازاقستاندىق وندىرۋشىلەر دە مەملەكەت بيۋدجەتىنە قۇياتىن سالىق مولشەرىن 5-7 ەسەگە تومەندەتكەن. ويتكەنى ءوندىرىس تۇرالاپ تۇر. بۇل دا جاقسى ەمەس. ءبىز اكسيزدەردى سول بۇرىنعى كورسەتكىشىندە ۇستاپ تۇرۋىمىز كەرەك،-دەيدى دەپۋتات كسواريەۆ مينيستر دوسايەۆقا.

ۇلتتىق ەكونوميكا ءمينيسترى دەپۋتاتتىڭ ساۋالىنا توسىعان جوق. جاۋاپ بەردى. بەرگەندە دە قانداي. ق ر ۇكىمەتىنىڭ ءوزى ءقازىر اكسيزدەر ماسەلەسىن قاراستىرىپ جاتىر ەكەن جانە جاقىن ارادى بۇل ماسەلەنى شەشەدى-مىس.

— ءقازىر ءبىز اكسيزدەرگە قاتىستى ماسەلەنى ۇكىمەتتە قاراستىرىپ جاتىرمىز. سونداي-اق، «قازالكو» اسسوسياسياسىمەن بىرلەسە وتىرىپ جۇمىستار جۇرگىزۋدەمىز. ولار جاقىن ارادا بىزگە بارلىق ەسەپ-قيساپتارىن وتكىزەدى. ال 2016 جىلعا قاراي وتاندىق الكوگولدىك سۋسىن ءوندىرىسى قايتا قولعا الاىپ، ءوندىرىستى جوعارىلاتۋ جوسپارلانىپ وتىر. مەن قايتالاپ ايتامىن، ءدال وسى زاڭ جوباسىنىڭ ەكىنشى قارالىمىنا دەيىن، ياعني 7-قازانعا دەيىن ۇكىمەت ناقتى قانداي شارالار قولدانۋ كەرەكتىگىن ايقىندايتىن بولادى،-دەدى ءمينيسترى ەبولات دوسايەۆ.

وسىلايشا دەپۋتات كوساريەۆ ءمينيسترى ەربولات مىرزاعا ارزان اراقتىڭ قايدا ساتىلاتىنىن ايتىپ بەرۋگە ۋادە ەتكەن.

دۇرىس! وتە دۇرىس ماسەل كوتەرگەن دەپۋتات كوساريەۆ ارزان ىشىمدىكتىڭ جولىن كەسۋ ارقىلى وتاندىق وندىرۋشىلەردىڭ ءورىسىن كەڭەيتۋدى كوزدەسە كەرەك. ءبىر جاعىنان قازىناعا كەلىپ تۇسەتىن سالىق تا ازايىپ قالعان. ال ءدال وسىنداي قارجىلىق قيىندى قوس بۇيىردەن قىسقان كەزەڭدە اپتەپ-ۇپتەپ پايدا كورىپ قالۋدىڭ بارلىق امالى دا كادەگە اساتىنى بەلگىلى. تەك ءبىر ءىشىمدى قىجىلداتاتىنى – پارلامەنت پەن ۇكىمەتتىڭ باسقا شارۋالارى قالماعانداي، ارزان اراقتىڭ «ادرەسىن» ىزدەگەندەي، «ولپى-سولپى قالجىڭدى» پارلامەنت قابىرعاسىندا ايتىسقانى قاي ساسقانى؟!

سانا تۇيسىگى تۇسىنگەنگە – كەزەك كۇتتىرمەس زاڭ جوباسى – شەتەلدەگى 5 ميلليون قانداستىڭ تەزىرەك اتاجۇرتىنا ورالۋىنا توسقاۋىل بولىپ تۇرعان – كەيبىر كەدەرگىلەردى الىپ تاستاۋ ەمەس پە؟ ال ءبىزدىڭ جارىمجان شەنەۋنىكتەر ىشكىلىكتەن وزگە ماسەلە تاپپاعانداي، ونى سالىق تولەۋدەن جالتارۋدىڭ كولەڭكەسىمەن كولەگەيلەي وتىرىپ تالقىعا سالعانى كەرەمەت ەكەن. ەرلى-زايىپتىلار اراسىنداعى جىنىستىق قاتىناسقا سالىق تولەۋ تۋرالى بەيساۋات ۇسىنىس، پارلامەنتتەگى ارزان اراق ماسەلەسى، ەندى نە قالدى؟ نە بولسا دا، پارلامەنتتىڭ وسى شاقىرىلىمى ەل ەسىندە جاقسى ساقتالاتىنى ءسوزسىز.

نۇرگەلدى ءابدىعاني ۇلى

 «قامشى» سىلتەيدى