اقتاۋلىق دامير تورەباي كۇمىستەن ءتۇرلى اشەكەي بۇيىمدار جاسايدى. سۋرەت سالۋعا قابىلەتى مول دامير جاستايىنان زەرگەرلىك بۇيىم جاساۋمەن اينالىسادى. ول جۇرگەنوۆ اتىنداعى قازاق ۇلتتىق ونەر اكادەمياسىن زەرگەلىك ءىس ماماندىعى بويىنشا ءتامامداعان.

اقتاۋ قالاسى اكىمى باسپا ءسوز قىزمەتىنىڭ حابارلاۋىنشا، بيىل دامير «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ  2017-2021 جىلدارعا ارنالعان مەملەكەتتىك باعدارلاماسى اياسىندا قايتارىمسىز گرانتقا يە بولدى. بەرىلگەن قاراجاتقا قاجەتتى قۇرال- جابدىقتار الىپ، شاعىن  شەبەرحانا اشقان.

-«زەرگەرلىككە عانا ەمەس، كىشكەنتايىمنان سۋرەت سالۋعا، ءمۇسىن جاساۋعا، اعاش ويۋعا قۇمارلىعىم بولاتىن. زەرگەرلىكتىڭ قىر-سىرىن جەتە مەڭگەرۋ ماقساتىندا وسى سالانى تاڭدادىم. ادەمى بۇيىمدار جاساۋعا قىزىعامىن جانە بۇيىمداردى تەك كۇمىسپەن جاسايمىن»، - دەيدى دامير تورەباي.

ءقازىر شەبەر قىز-كەلىنشەكتەرگە ارنالعان  ۇلتتىق ناقىشتاعى ساقينا، سىرعا، بىلەزىكتەر جاسايدى. ەسكى بۇيىمداردى جاڭا ۇلگىدە جاساپ شىعارۋعا تىرىسادى. جاس كاسىپكەر بولاشاقتا شەبەرحاناسىن كەڭەيتىپ، ۇلتتىق مۇرانى الەمگە پاش ەتكىسى كەلەدى.