ازەربايجاندا اسكەري تىكۇشاق قۇلاپ، 14 ادام قازا تاۋىپ، تاعى 4 ادام جارالاندى. بۇل تۋرالى ازەربايجان مەملەكەتتىك شەكارا قىزمەتىنىڭ باسپا ءسوز ورتالىعى حابارلادى.

مەملەكەتتىك شەكارا قىزمەتىنىڭ حابارلاۋىنشا، اپات 30 قاراشا كۇنى جەرگىلىكتى ۋاقىت بويىنشا ساعات 10.40-تا گاراگەيبات ايماعىنداعى حىزين اۋدانىندا ورنالاسقان ۇشۋ-جاتتىعۋ پوليگونىندا بولعان.

تىكۇشاقتىڭ قۇلاۋىنا قاتىستى قىلمىستىق ءىس قوزعالدى. ءقازىر تەرگەۋ رەسپۋبليكانىڭ باس پروكۋراتۋراسىنىڭ باقىلاۋىندا. 

ازەربايجان مەملەكەتتىك شەكارا قىزمەتىنىڭ باسشىسى گەنەرال ەلچين گۋلييەۆ تىكۇشاقتىڭ اپاتقا ۇشىراۋىنا سىرتقى فاكتورلاردىڭ قاتىسى جوق ەكەنىن ايتتى. سونداي-اق زارداپ شەككەندەردىڭ اۋرۋحانادا ەمدەلىپ جاتقانىن جانە ولاردىڭ جاعدايى قالىپتى ەكەنىن مالىمدەدى.

– اپات تۋرالى ەستىگەننەن كەيىن وقيعا ورنىنا باردىم. سول جەردەن پرەزيدەنت يلحام الييەۆكە بايانداما جاسادىم. الييەۆ وقيعانى قوسىمشا زەرتتەۋ، مارقۇمداردى جەرلەۋ جانە جارالىلاردى ەمدەۋ جونىندە تاپسىرما بەردى. ۇشقىش ءبىزدىڭ تاجىريبەلى ۇشقىشتارىمىزدىڭ ءبىرى بولاتىن. تىكۇشاق تا ءىس جۇزىندە جاڭا ەدى. ءقازىر بىردەڭە دەپ تە ايتا المايمىز. ءبىراق بۇل اپاتقا سىرتقى كۇشتەردىڭ ەش قاتىسى جوق دەپ ايتۋعا بولادى، – دەدى ەلچين گۋلييەۆ.