سەيسەنبى، 5 قازان كۇنى وبلىس اكىمى وڭداسىن ءورازاليننىڭ توراعالىعىمەن وبلىستىق توتەنشە جاعدايلاردىڭ الدىن الۋ، جويۋ جونىندەگى جانە وبلىستىق تەررروريزمگە قارسى كومسيسسيالاردىڭ بىرلەسكەن وتىرىسى ءوتتى.

جيىنعا وبلىس پروكۋرورى، قۇقىق قورعاۋ ورگاندارى، توتەنشە جاعداي دەپارتامەنتى مەن سالاعا جاۋاپتى باسقارما باسشىلارى قاتىستى. وتىرىستا سۋعا شومىلۋ جانە ءورت ءقاۋىپتى ماۋسىمدارى، قىسقى كەزەڭگە اۆتوموبيل جولدارىن دايىنداۋ، ماسەلەلەرى قارالدى.

وبلىستىق توتەنشە جاعدايلار دەپارتامەنتىنىڭ باستىعى م.امانبايەۆتىڭ ايتۋىنشا، ءورت ءقاۋىپتى كەزەڭدە وبلىس اۋماعىنىڭ دالا القاپتارىندا جالپى 5500 گەكتاردان استام اۋماقتا 240 جانۋ وقيعاسى بولعان. سونىمەن قاتار، سوڭعى 2 جىلدا جازعى مەزگىلدە سۋعا شومىلۋ ماۋسىمىندا قابىلدانعان شارالارعا قاراماستان، سۋداعى قايعىلى جاعدايلار ورىن العان. سۋدا قازا تابۋدىڭ نەگىزگى سەبەپتەرى تىيىم سالىنعان جەرلەردە ماس كۇيىندە شومىلۋ، جۇزە الماۋ جانە بالالاردى قاراۋسىز قالدىرۋ بولىپ وتىر.

وبلىستىق قۇقىقتىق ستاتيستيكا جانە ارنايى ەسەپكە الۋ جونىندەگى باسقارما باستىعى س.ابدەنوۆتىڭ بايانداماسىندا كورسەتىلگەندەي، ازاماتتاردى وزەكتى اقپاراتپەن قامتاماسىز ەتۋ ماقساتىندا كوميتەتپەن qamqor.gov.kz سايتىندا اقپاراتتىق سەرۆيس قۇرىلعان. اقپاراتتىق سەرۆيستە ينتەرنەت جەلىسىنە قولجەتىمدىلىگى بار ازاماتتار 20-عا جۋىق قۇقىقتىق ستاتيستيكا، قىلمىستار تۋرالى وتىنىشتەردى باقىلاۋ، قىلمىستىلىق كارتاسى، جول-كولىك وقيعالارى كارتاسى، اكىمشىلىك قۇقىق بۇزۋشىلىققا شاعىم جاساۋ سىندى اقپاراتتىق قىزمەتتەردەن وزىنە قاجەتتى مالىمەتتەردى الا الادى.

ايماق باسشىسى بايانداماشىلاردى تىڭداپ، جاۋاپتى سالا باسشىلارىنا توتەنشە جاعدايلاردىڭ الدىن الۋ جانە قىسقا دايارلىق جۇمىستارىن جۇرگىزۋ جونىندە ءبىرقاتار ناقتى تاپسىرمالار بەردى.