پرەزيدەنت قاسىم-جومارت توقايەۆ قازاقستاننىڭ ستراتەگيالىق زەرتتەۋلەر ينستيتۋتىنىڭ (قسزي) ديرەكتورىن اۋىستىردى. بۇل تۋرالى اقوردا سايتى حابارلادى.

"مەملەكەت باسشىسىنىڭ وكىمىمەن زارەما كاۋكەن قىزى شاۋكەنوۆا قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى لاۋازىمىنان بوساتىلدى" دەلىنگەن جارلىقتا.

مەملەكەت باسشىسىنىڭ تاپسىرماسىنا سايكەس ينستيتۋتتىڭ جاڭا ديرەكتورى بولىپ ەركىن تۇقىموۆ تاعايىندالدى.

ەركىن ۆاليتحان ۇلى تۇقىموۆ 1973 جىلى وزبەكستاندا، تەرمىز قالاسىندا تۋعان.

1997 جىلى ۆارشاما حالىقارالىق قاتىناستار ينستيتۋتىن ۇزدىك ءبىتىرىپ، 2004 جىلى ق ر عىلىم اكادەمياسىنىڭ فيلوسوفيا جانە ساياساتتانۋ ينستيتۋتىنىڭ اسپيرانتۋراسىن ءتامامداعان.

ەڭبەك جولىن 1997 جىلى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى سىرتقى ساياسي زەرتتەۋلەر ءبولىمىنىڭ اعا عىلىمي قىزمەتكەرى رەتىندە باستاعان.

2000-2005 جىلدارى قسزي سىرتقى ساياسات ءبولىمىنىڭ مەڭگەرۋشىسى. 2005-2007 جىلدارى ورتالىق ازيا دەموكراتيانى دامىتۋ قورىنىڭ باس ديرەكتورى بولدى. 2007-2008 جىلدارى ق ر پرەزيدەنتى اكىمشىلىگىندە اقپاراتتىق-تالداۋ ورتالىعىنىڭ ستراتەگيالىق تالداۋ سەكتورىنىڭ مەڭگەرۋشىسى، ستراتەگيالىق ازىرلەمەلەر جانە تالداۋ ورتالىعىنىڭ ستراتەگيالىق حالىقارالىق ىقپالداستىق سەكتورىنىڭ مەڭگەرۋشىسى قىزمەتتەرىن اتقاردى.

2008 جىلدىڭ ماۋسىمىندا ق ر سىرتقى ىستەر مينيسترلىگى ورتالىق ازيا دەپارتامەنتى ديرەكتورىنىڭ ورىنباسارى، كەيىننەن دەپارتامەنت ديرەكتورى بولدى. 2010 جىلعى قاڭتار ايىندا قازاقستان رەسپۋبليكاسى قاۋىپسىزدىك كەڭەسى تالداۋ ءبولىمىنىڭ مەڭگەرۋشىسى بولدى. 2018 جىلى قازاقستاننىڭ قازانداعى باس كونسۋلى لاۋازىمىنا تاعايىندالدى.