جاقىندا قازاقستاندا مۇمكىندىگى شەكتەۋلى بالالاردىڭ تاماعى مەن كيىم-كەشەگىنە مەملەكەتتىك قازىنادان بولىنگەن قارجىنىڭ قولدى بولعاندىعى انىقتالعان. بۇل تۋرالى «قامشى» پورتالى Total.kz-كە سىلتەمە جاساي وتىرىپ حابارلايدى.

ق ر باس پروكۋراتۋراسى باسپا ءسوز قىزمەتىنىڭ  مالىمەتتەرىنە سۇيەنسەك، مەملەكەتتىك قازىنادان بولىنگەن قارجىنى جىمقىرۋ فاكتىلەرى ەلىمىزدىڭ بەس وبلىسىندا  انىقتالعان.

سونىمەن، الماتى قالاسىندا ورنالاسقان كەمتار بالالارعا ارنالعان پسيحونيەۆرولوگيالىق پاتولوگيا ورتالىعىنىڭ ديرەكتورى مەن ەسەپشىسى ورتالىقتىڭ تاماققا بولىنەتىن قارجىسىنان 546 105 تەڭگەنى جەكە مۇددەگە پايدالانعان. اتالمىش فاكتى بويىنشا ءقازىر سوت ساراپتامالىق تەرگەۋ جۇمىستارى جۇرگىزىلۋدە.

سونىمەن قاتار، شىمكەنت قالاسىنداعى مامانداندىرىلعان بوبەكتەر ۇيىنەن 3،9 ميلليون تەڭگە (ازىق-تۇلىك، گيگيەنالىق زاتتار، كيىم-كەشەكتەرگە بولىنگەن) ءدال وسىنداي جولمەن قولدى بولعان. سوتقا دەيىنگى تەرگەۋ جۇمىستارىنىڭ قورىتىندىسى بويىنشا، اتالمىش بوبەكتەر ءۇيىنىڭ قويما مەڭگەرۋشىسى ساككۋلييەۆا شارتتى تۇردە 5 جىلعا  باس بوستاندىعىنان ايىرىلعان.

سونداي-اق، كامەلەت جاسقا تولماعاندارعا الەۋمەتتىك جەڭىلدىكتەر ءۇشىن بولىنگەن قاراجات تا ورتا جولدا قولدى بولعاندىعى بەلگىلى بولدى. تەرگەۋ جۇمىستارىنىڭ ناتيجەسىندە از قامتىلعان جانە مۇمكىنشىلىگى شەكتەۋلى بالالارعا بولىنگەن 3،9 ميلليون تەڭگە مەملەكەت قازىناسىنا قايتارىلعان.

ال، قوستاناي وبلىسىندا  اتا-اناسىنىڭ قامقورلىعىنسىز قالعان 15 كەمتار بالا جالپى سوماسى 1،6 ميلليون تەڭگەنى قۇريتىن، مەملەكەتتەن ءبولىنۋى ءتيىس الەۋمەتتىك جاردەمىن الماعان.

ال، اتىراۋ وبلىسىندا پروكۋرورلار مۇمكىنشىلىگى شەكتەۋلى 33 بالاعا 900 مىڭ تەڭگە كولەمىندەگى الەۋمەتتىك جاردەماقىسىن قايتارىپ بەرگەن.

مۇنداي فاكتىلەر ماڭعىستاۋ جانە الماتى وبلىستارىندا دا تىركەلگەن.

ق ر باس پروكۋراتۋراسىنىڭ ارنايى تەكسەرۋىنىڭ ناتيجەسىاندە 3129 بالانىڭ كونستيتۋسيالىق قۇقىعى قورعالعان جانە اتالمىش فاكتىلەر بويىنشا 11 قىلمىستىق ءىس قوزعالىپ، 706 ادام جاۋاپقا تارتىلعان.