ەلوردانى قايتا قۇرۋ بويىنشا اۋقىمدى جۇمىستار «استانا – جايلى قالا» ماستەر-جوسپارى اياسىندا جۇرگىزىلدى. قالانىڭ تۇرعىندارى مەن قوناقتارى ءۇشىن بوس ۋاقىتىن ءتيىمدى ءارى دەنساۋلىعىنا پايدالى وتكىزۋگە جاڭا تارتىمدى ورىندار اشىلدى.

سوڭعى جىلدارى ەلوردادا 900-دەن استام اۋلا مەن قوعامدىق كەڭىستىك اباتتاندىرىلدى. ونىڭ ىشىندە كوپىر استى كەڭىستىكتەر، «تەاتر» بۋلۆارى («جاستار» سارايىنان مۋزىكالىق جاس كورەر­مەن تەاترىنا دەيىن)، «Demalys promenade»، قۇتقارۋشىلاردىڭ، مۇعالىمدەردىڭ، مەديسينا قىزمەتكەرلەرىنىڭ قۇرمەتىنە ارنالعان گۇلزارلار، كوشە سپورتى كوليزەيى بار.

سونىمەن قاتار «بەيبىتشىلىك جانە كەلىسىم سارايى» اۋماعىندا امفيتەاتر، قالانىڭ وڭ جاعالاۋىندا تاعى ءبىر جاياۋ جۇرگىنشىلەر جولى، «ۆسترەچا» ساۋدا ءۇيى جانىنداعى قوعامدىق كەڭىستىك، «بەيبىتشىلىك جانە كەلىسىم» ساياباعى، قالالىق الاڭ، جەلەكجولدار سالىندى.

اباتتاندىرۋ كەزىندە ەلدى مەكەندەرگە ەرەكشە نازار اۋدارىلادى. ەلدى مەكەندەردىڭ وزىندە 300-گە جۋىق اۋلا مەن قوعامدىق كەڭىستىك اباتتاندىرىلىپ، كوكتال اۋماعىندا 16 گەكتاردى الىپ جاتقان ساياباق كوپشىلىككە ۇسىنىلدى.

قوعامدىق كەڭىستىكتەر مەن اۋلا اۋماقتارىندا اركىم ءوز قالاۋى بويىنشا سەرۋەندەي الادى. قالا تۇرعىندارىنا باسكەتبول، فۋتبول الاڭدارى، workout-ايماقتار، اتكەنشەكتەردە دەمالىپ، شىعارماشىلىق تالانتىن پاش ەتۋگە ارنالعان ساحنالاردا وزگەلەردىڭ ونەرلەرىن تاماشالاۋ مۇمكىندىك بەرىلەدى.

2023 جىلى «ۇركەر»، «تەلمان» ەلدى مەكەندەرىندەگى، ش.ايتماتوۆ كوشەسىندەگى، ج.تاشەنوۆ جانە ت.حۋسەين كوشەلەرىنىڭ قيىلىسىنداعى، اباي داڭعىلىندا گۇلزارلاردى اباتتاندىرۋ جوسپارلانىپ وتىر. سول سياقتى كۇيشى دينا كوشەسىنەن مۇستافين كوشەسىنە دەيىن، جۇرگەنوۆ كوشەسى، 28/1، قوشقاربايەۆ كوشەسى، 45، قورداي جانە تايقازان كوشەلەرىنىڭ قيىلىسىندا، ك.ازىربايەۆ كوشەسى، 10-14 جانە ت.ب. ابىلايحان داڭعىلىنىڭ بويىندا ساياباقتار بولادى. كىشى تالدىكولدە ەكوپارك سالىنادى. ەكوپارك جوباسى اۋماقتى اباتتاندىرۋدى، سۋ بالانسىن ساقتاي جانە تولىقتىرا وتىرىپ، رەكرەاسيالىق ايماق قۇرۋدى كوزدەيدى.

باس قالاداعى كۇرمەۋى قيىن وزەكتى ماسەلەنىڭ ءبىرى – كوپ جىلدان بەرى قۇرىلىسى تۇرالاپ قالعان تۇرعىن ۇيلەر. سوڭعى ۋاقىتتا ءۇيلى بولۋدى ارمانداپ جۇرگەن ۇلەسكەرلەردىڭ ءۇمىتى اقتالىپ، تۇيتكىلدىڭ ءتۇيىنى تارقاپ كەلە جاتىر. بيىلدىڭ وزىندە استانالىق ۇلەسكەر وتباسىلاردىڭ 90%-عا جۋىعىنىڭ ماسەلەسى شەشىلدى.

جىل سوڭىنا قاراي ۇلەسكەرلەر سانى شامامەن 16 مىڭنان 2 مىڭ وتباسىعا دەيىن قىسقارادى. ماسەلەن، 2019 جىلدىڭ جازىندا قۇرىلىسى ۇزاققا سوزىلعان 150 كوپپاتەرلى تۇرعىن ءۇي بولسا، بۇگىنگە دەيىن ولاردىڭ 120-نىڭ ماسەلەسى شەشىلدى. قۇرىلىسى ۇزاققا سوزىلعان قالعان 30 ءۇي بويىنشا قادامدىق ءىس-شارالار جوسپارى بار. وندا 2 مىڭعا جۋىق وتباسى باسپاناسىن كۇتىپ ءجۇر.

قۇرىلىسى تۇرالاپ قالعان تۇرعىن ءۇي ماسەلەسىن شەشۋ – مەملەكەت باسشىسىنىڭ تىكەلەي باقىلاۋىندا. مۇنداي ۇيلەردىڭ بىرىندە ادەتتە تەك شۇڭقىرى عانا قازىلعان، ەندى بىرىندە قارجىلىق اۋديت، جوبالىق-سمەتالىق سەكىلدى قۇجاتتاماسى جوق ەدى، سول سياقتى ءبىر پاتەردى ەكى-ۇش وتباسىعا ساتقان جايتتار دا بولدى، تاعى بىرىندە قاڭقاسى تۇرعىزىلعان ءۇي اپاتتى كۇيدە بولدى.

مىسالى، «تەرريتوريا كومفورتا-1» تۇرعىن ءۇي كەشەنىنىڭ قۇرىلىسى 2004 جىلى باستالدى. الايدا ءۇيدى تەحنيكالىق تەكسەرۋ بارىسىندا عيماراتتىڭ اپاتتى جاعدايدا ەكەنى بەلگىلى بولدى. بۇرىنعى قۇرىلىس سالۋشى تەحنيكالىق نورمالارعا ساي كەلمەيتىن بەتون ماركاسىن قولدانىپ، پليتالار اراسىندا سايكەستىك بولمادى. قۇرىلىسشىلاردىڭ ايتۋىنشا، بۇل ءۇي پايدالانۋعا بەرىلگەندە ۇزاققا بارماي قيراپ، تۇرعىندار ءۇيىندىنىڭ استىندا قالار ەدى. وسىدان كەيىن ونىڭ بلوكتارى بۇزىلىپ، ورنىنا جاڭا تۇرعىن ءۇي كەشەنى سالىندى، ناتيجەسىندە تۇرعىندار كوپتەن كۇتكەن باسپاناسىنا يە بولدى.

دەرەككوز: استانا اقشامى