تۇرمەدە وتىرعان قايرات ساتىبالدى نەمەرە اعاسى، قازاقستاننىڭ بۇرىنعى پرەزيدەنتى نۇرسۇلتان نازاربايەۆقا ءۇشقوڭىر جايلاۋىنداعى رەزيدەنسيانى سىيعا تارتقان. بۇل تۋرالى ازاتتىق راديوسى مالىمدەدى. 

2014 جىلى الماتى وبلىسى قاراساۋ اۋدانى شامالعان اۋىلىنداعى جەكە بولىنگەن 7 گەكتارداي اۋماقتا ءزاۋلىم ساراي سالىنعان. 2016 جىلعى رەسمي تىركەۋ كەزىندە بۇل جىلجىمايتىن مۇلىك قايرات ساتىبالدىنىڭ مەنشىگى بولىپ جازىلعان.

“بيىل ءساۋىردىڭ ورتاسىندا ساتىبالدىنىڭ اتىندا تۇرعان جايلاۋداعى رەزيدەنسيا نەمەرە اعاسى، قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ يەلىگىندەگى "ەلباسى" قورىنىڭ مەنشىگىنە وتكەن”، – دەلىنگەن زەرتتەۋدە.

مەملەكەتتىك جىلجىمايتىن مۇلىك كاداسترى مەن "ازاماتتارعا ارنالعان ۇكىمەت" پورتالىنىڭ جاۋابىندا مۇلىكتىڭ مەنشىك قۇقىعى سىيعا تارتۋ شارتى بويىنشا وزگەرگەنى ايتىلعان.

ەسكە سالايىق، قايرات ساتىبالدى بىلتىر قىركۇيەكتە سەرىكتەرىمەن بىرگە 40 ميلليارد تەڭگەنى تالان–تاراجعا سالدى دەگەن ايىپپەن 6 جىلعا سوتتالعان بولاتىن. استانا قالاسى №2 بايقوڭىر اۋداندىق سوتىنىڭ ۇكىمىندە ساتىبالدىنىڭ مۇلكىن تاركىلەۋ دە جازىلعان. ءبىراق قانداي مۇلىك ەكەنى انىق كورسەتىلمەگەن.

جەر كاداسترى دەرەكتەرىندە 12،5 گەكتار جەردە ورنالاسقان سالتاناتتى ساراي مەن كوتتەدجدەر ساتىبالدىنىڭ بەيرەسمي ايەلى اسەل باقتيار قىزىنىڭ يەلىگىندە ەكەنى كورسەتىلگەن.

"بىلتىر قاراشادا جەمقورلىققا قارسى كۇرەس اگەنتتىگى قايرات ساتىبالدىنىڭ ۇستىنەن ەكىنشى قىلمىستىق ءىس قوزعاپ، تەرگەپ جاتىرمىز دەدى. اگەنتتىك ساتىبالدى مەن ونىمەن بايلانىسى بار ادامداردان 1 ميلليارد دوللاردان استام قاراجات قايتارىلعانىن ايتتى، ءبىراق ازىرگە تەرگەۋ اياقتالعانى تۋرالى رەسمي حابارلانبادى. دەمەك قىلمىستىق جازاعا تارتىلىپ، مۇلكى تاركىلەنگەن ادامنىڭ اتىنداعى مۇلىكتىڭ باسقا تۇلعانىڭ يەلىگىنە اۋىسقانىنا كۋا بولىپ وتىرمىز"، – دەلىنگەن ماتەريالدا.

ايتا كەتەيىك، بۇعان دەيىن قايرات ساتىبالدىنىڭ قاماۋدا وتىرىپ الماتىداعى ءزاۋلىم قوناق ءۇيدى ساتىپ العانى جونىندە اقپارات تاراعان بولاتىن. الايدا انتيكور بۇل اقپاراتتى جوققا شىعاردى.