قوعام قايراتكەرى ارمان شورايەۆ الەۋمەتتىك جەلىدەگى پاراقشاسىندا وزىنە قاتىستى قۋعىن–سۇرگىن باستالعانىن مالىمدەدى.

ونىڭ ايتۋىنشا، بيلىك ارىپتەستەرى مەن جاقتاستارىنا قىسىم جاساعان.

"جاپ–جاڭا قازاقستاننىڭ جاڭاشىل بيلىگى مەنىڭ اينالامداعى ادامدارعا، ارىپتەستەرىمە، جاقتاستارىما ءتۇرلى سەبەپتەرمەن قىسىم جاساۋدى باستاپ كەتتى. جۋرناليست رەتىندە جاساعان جۇمىستارىمنان ءمىن ىزدەپ، ارحيۆ اقتارۋعا كوشتى. كوپتەگەن جوبالاردى بىرگە جۇزەگە اسىرعان پىكىرلەستەرىمدى زاڭسىز تەرگەپ-تەكسەرۋدە. كەيبىرەۋىن ءتىپتى زاڭسىز شەتەلگە شىعارماي، زاڭسىز تىنتۋلەر جاساۋدا. سونداعى كوزدەگەندەرى مەنىڭ اۋىزىمدى جابۋ! مەن وسى ازاماتتىق اشىق ۇستانىمعا كوشكەندە الدىمنان نە شىعاتىنىن ءبىلىپ كەلگەن اداممىن، شىراقتارىم! مەنىڭ ۇستانىمىمنان اينىتام دەپ تەككە تەرلەمەڭدەر! مەنىڭ اينالامدى زاڭسىز تىمىسكىلەپ، ادۆوكاتتاردان "ارمان بيلىككە كەلسىن، جولىقسىن، اناۋىن قويسىن، مىناۋىن قويسىن" دەگەن سالەمدەمە جولداعاننان تۇك شىقپايدى!" – دەدى شورايەۆ.

سونىمەن قاتار، ول قارجىلىق مونيتورينگ اگەنتتىگى تەكسەرىس جۇرگىزىپ جاتقان  "قازاقستان بارىسى" جوباسى جايلى دا ايتتى.

"مەن جۇزەگە اسىرعان "قازاقستان بارىسى" جوباسىن دا تىلگە تيەك ەتىپسىڭدەر، اينالايىندار، يدەيا مەنىكى بولعانىمەن، بۇل جوبا ءقازىر حالىقتىڭ قازىناسىنا اينالعان. اتالارىڭنىڭ اسى مەن ناۋرىزدا عانا ەستەرىڭە تۇسەتىن قازاق كۇرەسىن، تۇيە بالۋانداردى ەلگە تانىتىپ، سونداي جوبا جاساساڭدار، سەندەرگە كىم قوي دەدى؟! مەنى قارالاپ، جەمقور قىلىپ، حالىقتىڭ الدىندا قارابەت قىلۋدى كوزدەگەن ەكەنسىڭدەر، اق جول! ءبىر قۋاناتىنى – ءقازىر حالىق وزگەرگەن، كوزى اشىق، بيلىك نە ايتسا سوعان قۇلدىق ۇرمايتىن قوعام قالىپتاسىپ كەلە جاتىر! سول ءۇشىن دە سەندەردىڭ ساپارلارىڭ قىسقا! سايلاۋدا ادىلدىكتىڭ كوزىن ويىپ تۇرىپ داۋىسىمدى ۇرلاپ الدىڭدار، ءبىراق مەنىڭ ازاماتتىق كوزقاراسىم مەن ءسوز بوستاندىعىمدى ۇرلاي المايسىڭدار!قۇرمەتتى دوس-جاران، نيەتتەس-پىكىرلەستەر، بيلىكتىڭ جاڭا ستيلدەگى قۋعىن-سۇرگىنى مەن سوۆەتسكيي شاڭ باسقان قىسىمىنا قىنجىلاتىن مەن ەمەس، مەن اقپىن" –  دەپ جازدى شورايەۆ.