«يرينا كايراتوۆنا» دەگەن توپتىڭ كەزەكتى كونسەرتى ءوتىپتى. كونسەرتتىڭ سوڭىندا ساۋكەلە تاعىپ، ۇلتتىق كيىممەن ساحنادا سىزىلىپ تۇرعان قىزدار كەنەت ساۋكەلەلەرىن جەرگە قويىپ، شاشتارىن جالبىراتىپ، باستارىن شايقاپ جىن ۇرعانداي بيلەۋگە كوشتى. ەسىرگەندە، وسىلاي ەسىردى.

بۇعان دەيىن بۇل توپتىڭ ءبىر مۇشەسى ەلىمىزدىڭ كوك تۋىن ساحناعا ۋماجداپ الىپ شىعىپ، «بىرەۋدىڭ قىمباتتى كوك تۋى...»، دەپ ساندىراقتاپ، ونى «تۇكىرگەنىم بار!» دەگەندەي كورەرمەندەرگە لاقتىرماق بولعان. ءوزى ساحناعا ماس كۇيدە شىعىپ، بىلاپىت سويلەگەن. سول كەزدە لايىقتى جازاعا تارتىلماعاندىقتان، بۇل توپ ءالى دە بىلگەندەرىن ىستەپ ءجۇر. 

– بۇلاردى، ءبىر سوزبەن ايتقاندا، «رۋحاني مۇگەدەكتەر» دەر ەدىم. سەمىزدىكتى قوي عانا كوتەرەدى دەمەكشى، كەي ادامعا ب ا ق بەرىلسە، كوتەرە الماي قالادى. «يرينا كايراتوۆنا» دا سولاي. بۇعان دەيىن تۋىمىزدى بىلعادى. مەيلى، ساحنادا بىلگەنىن ىستەپ، كەرەمەت بوپ جۇرە بەرسىن. ءبىراق قازاقتىڭ ۇلتتىق قۇندىلىقتارىنا تيىسپەسىن. ساحناداعى الگى قازاق قىزدارىنىڭ نامىسى قايدا؟

قازاقتىڭ قورلانباعان نەسى قالدى؟ ونسىز دا ءتىلىمىز قورلانىپ ءبىتتى، كيىمىمىز، تۋىمىز تاپتالدى. حالىقتى قاشانعى اشىندىرا بەرەدى؟ كۇندەردىڭ كۇنى مۇنىڭ ءبارىنىڭ بىتەتىن كەزى كەلەدى. بۇل توپ حالىقتان كەشىرىم سۇراۋى كەرەك. نەگىزىندە، ۇلتتىق قۇندىلىعىمىزعا قاتىستى ارنايى باپ، زاڭ بار. سول بويىنشا بۇلاردى جاۋاپقا تارتسا، باسقا دا ءانشىسىماقتارعا ساباق بولار ەدى، – دەيدى Qamshy.kz پورتالىنىڭ سۇراعىنا جاۋاپ بەرگەن جۋرناليست، قوعام بەلسەندىسى جان احمادييەۆ.

اكتەر بەكجان تۇرىستىڭ سوزىنشە، قازاقتىڭ اندەرىن قارايتىن كوركەمدىك كەڭەس جوق. ساحنادا تۇرىپ، شەكتەن شىعا بەرەتىندەر كوبەيدى. كەيدە سولاردى توقتاتۋدىڭ ورنىنا، «ە، جاڭىلىسقان ەكەن»، دەپ قورعاپ جاتامىز.

ەڭ وكىنىشتىسى، سوندايلاردىڭ ءانىن تىڭداپ، تىرلىگىنە ەلىكتەيتىندەر – جاستار. بۇل نە ءوزى، ءوسىپ كەلە جاتقان جاس ۇرپاقتى ادەيى بۇزۋ ما؟

بايقاساڭىز، ۇلتتىق قۇندىلىقتارىمىزدى مازاق ەتكەندەر نە كەشىرىم سۇراپ، ارى كەتسە ايىپپۇل تولەپ قۇتىلاتىن جامان ءۇردىس پايدا بولدى. قازاق زاتىمىز بىرەۋلەرگە مازاق بولاتىنداي نە جازدىق؟