بۇگىنگى كۇنى قازاقستاندا وڭىرلەردى دامىتۋ بويىنشا قارقىندى جۇمىستار ءجۇرىپ جاتىر. اسىرەسە استانا قالاسىندا كوزگە كورىنەر اۋقىمدى جۇمىستار جەتەرلىك.

ونىڭ ىشىندە تۇرعىن ءۇي قۇرىلىسى، جىلۋ مەن ەلەكتورمەن جابدىقتاۋ، تۇرعىن ءۇي — كوممۋنالدىق شارۋاشىلىق ۇيىمدارىن جەتىلدىرۋ مەن كولىك-لوگيستيكالىق الەۋەتىن نىعايتۋ جانە جاڭا وندىرىستىك كاسىپورىنداردى ىسكە قوسۋعا قاتىستى ءبىرقاتار جۇمىستار اتقارىلۋدا.

ق ر پرەزيدەنتى قاسىم-جومارت توقايەۆتىڭ «ادىلەتتى قازاقستان: ءبارىمىز جانە ءارقايسىمىز ءۇشىن. ءقازىر جانە ءاردايىم» سايلاۋالدى باعدارلاماسىندا: «مەملەكەت جاڭا تۇرعىن ۇيلەر سالادى، بارلىق وڭىردەگى جەرگىلىكتى ينفراقۇرىلىم مەن ينجەنەرلىك كوممۋنيكاسيالاردى جاڭارتادى. ءبىز ساپالى جۇمىس ورنىن قامتاماسىز ەتەمىز، ءار ازاماتتىڭ ءوزىن دامىتۋىنا تەڭ مۇمكىندىك جاسايمىز. مۇنىڭ ءبارى وڭىرلەردى تۇرعىندار مەن ينۆەستيسيالار ءۇشىن تارتىمدى ەتەدى»، — دەگەن بولاتىن.

بۇگىنگى تاڭدا پرەزيدەنتتىڭ تاپسىرماسىن بۇلجىتپاي ورىنداپ، حالىقتى جايلى تۇرمىس، قوڭدى ال-اۋقاتپەن قامتاماسىز ەتۋ ماقساتىندا استانا تاراپىنان دا ءبىرشاما جۇمىستار اتقارىلىپ، ءوڭىردىڭ دامۋىنا ەلەۋلى ۇلەس تە قوسىلىپ جاتىر.

ەلوردا اكىمدىگىنىڭ رەسمي سايتى جازعانداي: «بۇل باعدارلامانىڭ ماقساتى – بازالىق قىزمەتتەرگە حالىقتىڭ تەڭ قولجەتىمدىلىگىن قامتاماسىز ەتۋ، تۇرعىن ۇي-كوممۋنالدىق جاعدايدى جاقسارتۋ جانە تۇرعىن ءۇي قۇرىلىسىن دامىتۋ، سونداي-اق كولىكتىك بايلانىستى قامتاماسىز ەتۋ جانە ەلدىڭ كولىكتىك-ترانزيتتىك الەۋەتىن جوعارىلاتۋ ەسەبىنەن ازاماتتاردىڭ قولايلى ءومىر ءسۇرۋ ورتاسىن قۇرۋ».

ەلورداداعى سوڭعى ناتيجەلەردىڭ ىشىندە ەڭ ءبىر اۋىز تولتىرىپ ايتارلىق جايىت، ەلوردا حالقىنىڭ 99،9 پايىزى، ياعني تۇگەلگە جۋىعى ورتالىقتاندىرىلعان سۋمەن قامتۋ جۇيەسىنە قوسىلعان تۇعىن. ال جول-كولىك ينفراقۇرىلىمىن دامىتۋ ماقساتىندا جەرگىلىكتى ماڭىزى بار اۆتوموبيل جولدارىن سالۋعا جانە رەكونسترۋكسيالاۋعا 82،5 ملرد. تەڭگە ءبولىندى. اعىمداعى جىلى 13 كم جاڭا جول سالۋ جانە 55 كم اۆتوجولعا ورتاشا جوندەۋ جۇرگىزۋ جوسپارلانىپ وتىر ەكەن.

ەلدىڭ بارلىق ايماقتارىن تەڭدەي جەتىلدىرىپ، تۇرمىسقا قاجەتتى جاعدايدى حالىققا جاساپ بەرۋ قازاقستان پرەزيدەنتى قاسىم-جومارت توقايەۆتىڭ باستى ماقساتتارىنىڭ ءبىرى جانە سول ماقساتتى جۇزەگە اسىرۋ ءۇشىن ەلىمىزدە «قۋاتتى وڭىرلەر – ەلدى دامىتۋدىڭ درايۆەرى» ۇلتتىق جوباسى قابىلدانىپ، رەسپۋبليكانىڭ تۇكپىر-تۇكپىرىندە ىسكە اسا باستادى.

وسى رەتتە 2023 جىلى «قۋاتتى وڭىرلەر – ەلدى دامىتۋدىڭ درايۆەرى» ۇلتتىق جوباسى اياسىندا ينجەنەرلىك-كوممۋنيكاسيالىق ينفراقۇرىلىم وبەكتىلەرىن سالۋعا استانادا 22،6 ملرد. تەڭگە قاراستىرىلىپ، ەلوردا دا ءوز تاراپىنان جوبانى ىسكە اسىرۋ ماقساتىندا جۇمىسقا كىرىسىپ كەتكەن بولاتىن.

ايتا كەتۋ كەرەك، رەسپۋبليكالىق بيۋدجەتتىڭ ترانسفەرتتەرىنەن جوبانى ىسكە اسىرۋعا تەك 6،7 ملرد تەڭگە قاراستىرىلسا، ال 5،0 ملرد تەڭگە مەملەكەتتىك قۇندى قاعازدار شىعارۋ ەسەبىنەن قارىز قاراجاتى بولىپ تابىلادى. جوبا اياسىندا جەرگىلىكتى بيۋدجەت قاراجاتى ەسەبىنەن 10،9 ملرد تەڭگە ءبولىنىپ، جوسپاردى ىسكە اسىرۋعا جۇمسالماق ەكەنىن دە ايتا كەتۋ كەرەك.

استانادا «قۋاتتى وڭىرلەر – ەلدى دامىتۋدىڭ درايۆەرى» ۇلتتىق جوباسىن ناسيحاتتاۋ جۇمىستارى دا قارقىندى جۇرگىزىلىپ جاتىر. ەستەرىڭىزدە بولسا، ۇستىمىزدەگى جىلى تامىز ايىندا اتالعان جوبانى ىسكە اسىرۋ ماقساتىندا استانا قالاسىنىڭ ەڭبەك موبيلدىلىگى ورتالىعىندا سولتۇستىك قازاقستان وبلىسىنىڭ جامبىل اۋدانىنا قونىس اۋدارۋ بويىنشا كەڭەس ءوتىپ، تۇرعىندارعا ءبىرشاما جەڭىلدىكتەر مەن كومەكتەر بەرىلەتىنى ايتىلعان. اتاپ ايتقاندا، باسپانا ساتىپ الۋ ءۇشىن سەرتيفيكات، ءۇي جالداۋعا قاراجات پەن قايتارىمسىز گرانتتار جانە وتباسىنىڭ ءار ءبىر مۇشەسىنە سۋبسيديا بەرۋ مەن تۇراقتى جۇمىسقا تۇرعىزۋعا كومەكتەسۋ قاراستىرىلعانى ايتىلعان.

وسى رەتتە استانادا جىل سايىن وڭىرلىك اۋىل شارۋاشىلىعى جارمەڭكەلەرى دە ءوتىپ تۇراتىنىن ايتا كەتكەن ءجون. وڭىرلەردىڭ جارمەڭكەسىندە تۇركىستان، اتىراۋ مەن جامبىل، الماتى جانە جەتىسۋ وبلىستارى، قوستاناي، پاۆلودار مەن اباي، شقو جانە قاراعاندى، ۇلىتاۋ، سقو، اقوبە، سونداي-اق اقمولا وبلىستارى وزدەرىنىڭ جەرگىلىكتى ونىمدەرىن استانالىقتارعا ۇسىنىپ، ەلدى قۋانتىپ وتىراتىنى بەلگىلى. مۇنداي باستاما ايماقارالىق بايلانىستى نىعايتىپ، وڭىرلەردىڭ ساۋدا ساتتىعى مەن كاسىپكەرلىگىن دامىتۋعا وڭ ىقپال ەتەتىنى ءسوزسىز.

جوعارىدا ايتىپ وتكەن بارلىق مىسالدار «قۋاتتى وڭىرلەر – ەلدى دامىتۋدىڭ درايۆەرى» ۇلتتىق جوباسى بۇگىندە باس قالادا دا ءوز ناتيجەسىن بەرە باستاعانىنىڭ ايقىن كورىنىسى دەۋگە بولادى.