رەسەيدىڭ مەملەكەتتىك پروپاگانداسىن جۇرگىزەتىن كەزەكتى ءبىر ءجۋرناليستىڭ بايبالامى بۇگىن باستى تاقىرىپقا شىعىپتى.
بۇل اڭگىمەنى بىقسىتقان تينا كاندەلاكي دەيتىن ءوزىنىڭ ۇلتى گرۋزين ايەل. قازاقستانداعى تەمىرجول بەكەتتەرىنىڭ اتاۋى قازاقشالانعانىنا كۇيىپ-پىسكەن ەكەن. قازاقستان "ۋرالسك" دەگەن اتاۋدى "ورال" دەپ، "ساي-ۋتەس" اتاۋىن "سايوتەس" دەپ، "ۋزەن" دەگەن اتاۋدى "وزەن" دەپ وزگەرتكەلى جاتىر، بۇلار ورىس تىلىنە تىيىم سالىپ، ورىس مەكتەپتەرىن جاۋىپ جاتىر دەپ...
پۋتين بيلىگىنىڭ پروپاگانديسى دەپ تانىلعان مەديا تۇلعانىڭ ايدالادا وتىرىپ، وتقا ماي قۇيماق بولعان ءتۇرى. قازاقستانداعى اتاۋلار قازاق تىلىنە كوشىپ جاتقانىمەن، قازاقستاننىڭ ءوزى بىرتىندەپ ورىس ءتىلىنىڭ ەكىنشى وتانىنا اينالىپ بارا جاتقانىن تينا تاتەم قايدان ءبىلسىن؟!
ونىڭ وسى جازباسىنا قازاقستان قوعامىنىڭ ەلەڭ ەتۋىنىڭ ءوزى ءبىزدىڭ ەلدىڭ اقپاراتتىق كەڭىستىگى ورىس تىلىندە سايراپ تۇرعانىن ايدان انىق ءبىلدىرىپ تۇر ەمەس پە؟
تينا تاتەگە قازاقستانعا كەلۋ كەرەك. ءبىزدىڭ قوعام تۋرالى سىرتىمىزدان تون پىشپەي. اۋەجايدان تۇسە سالا كورسىن، قۋانا كۇتىپ كەلگەن قانشا جۋرناليست ءوزىن تانيتىنىن، ولار قاي تىلدە سويلەيتىنىن. كەز-كەلگەن رەستورانىمىزعا كەلىپ، اس ءمازىرىن وقىسىن. ەلىمىزدىڭ ەڭ ءىرى ەكى قالاسى – الماتى مەن استاناداعى اۋلالاردا، مەكتەپتەن شىققان بالالاردىڭ قاي تىلدە شۇيىركەلەسىپ جۇرگەنىن، الدىڭنان شىققان كۇزەتشى، تاكسيست، پوليسەي، قوناق ءۇي قىزمەتكەرى قاي تىلدە امانداساتىنىن، مەترو مەن اۆتوبۋستا قاي ءتىلدىڭ شىنىمەن باسىم ەكەنىن كورسىن. قازىرگى قازاقستان دەگەن اۋىلدى جەرلەرىن ايتپاعاندا نەگىزىنەن ءورىستىلدى قوعام ەكەنىنە كوزى تەز-اق جەتەر ەدى عوي...
تاۋەلسىزدىك العالى تالاي جىل وتسە دە ورىس تىلىنەن اجىراماق تۇگىلى، وعان ودان سايىن جارماسىپ قالعان قازاقستانداي ەلدەن اينالىپ كەتپەي مە، رەسەيدىڭ شىن پروپاگانديسى بولسا.
ارينە، قازىرگى ەكىجۇزدى زاماندا اركىم ءوزىنىڭ كورگىسى كەلەتىن "شىندىعىن" عانا كورەدى. قازاقتىڭ دا وسىنداي "ءوز شىندىعى" بار ەندى، كەشىرەرسىز...
كاندەلاكيگە اقىل ايتپايمىز عوي. ءوزىنىڭ كىندىك قانى تامعان تۋعان ەلىنىڭ، تاريحى تىم تەرەڭنەن كەلە جاتقان تۋعان ۇلتىنىڭ تاعدىرى بارىنەن دە ماڭىزدى ەكەنىن تۇسىنەتىن كەزى كەلەر.
پىكىر قالدىرۋ