قازاقستان، لاتۆيا، يتاليا، بەلارۋس، ەستونيا جانە ۋكراينا ەلدەرىنىڭ ۇلتتىق وليمپيادا كوميتەتتەرى قىسقى وليمپيادا ويىندارىنىڭ مەدالدارىنا يە بولعان سپورتشىلارىنا ەڭ جوعارى سىياقى بەرەدى، دەپ حابارلايدى يتار-تاسس.

التىن مەدەل اكەلگەن قازاقستاندىق سپورتشىلارعا 250 مىڭ دوللار سىياقى تولەنەدى. سونداي-اق كۇمىس مەدال يەگەرى 150 مىڭ دوللار، ال قولادان القا تاققان سپورتشى 75 مىڭ دوللار كولەمىندەگى  سىياقىعا يە بولادى.

ال لاتۆيالىقتار التىن ءۇشىن 192،8 مىڭ دوللار، يتالياندىقتار - 189،8 مىڭ، ەستوندىقتار - 138،5 مىڭ تولەسە، ۋكرايندىق سپورتشىلارعا ءبىرىنشى ورىن ءۇشىن بەرىلەتىن سىياقىنىڭ كولەمى125 مىڭ دوللار بولىپ بەلگىلەندى. رەسەي قۇراماسىنىڭ سپورتشىلارىنا التىن ءۇشىن 4 ملن. رۋبل (شامامەن 113،2 مىڭ دوللار) تابىستالادى ەكەن.

ۇلىبريتانيا، نورۆەگيا، شۆەسيا جانە حورۆاتيا سپورتشىلارىنا سىياقى بەرىلمەۋگە شەشىم قابىلداپتى. شۆەسيالىق ۇوك حابارلاۋىنشا، سپورتشىلاردىڭ وليمپياداعا دايىندالۋىنا قىرۋار قارجى جۇمسالادى. ناقتى ايتقاندا، سپورتشىلاردىڭ جاتتىعۋىنا جىلىنا شامامەن 8 ملن. ەۋرو كەتەدى (11 ملن. دوللار) ەكەن.

مەدال ءۇشىن تولەنەتىن سىياقى جاعىنان وڭتۇستىك كورەيا بيلىگى ەرەكشە ءادىس تاۋىپتى. ەل بيلىگى ءوز سپورتشىلارىنا ەرەكشە ۇسىنىس جاساپ وتىر. اتاپ ايتقاندا، التىن ءۇشىن 62 مىڭ، كۇمىس ءۇشىن 51،67 مىڭ جانە قولا ءۇشىن  36،17  مىڭ دوللار بەلگىلەنگەن ەكەن. وسىعان وراي، ەل بيلىگى سپورتشىلارعا مەدال اكەلگەن جاعدايدا سىياقىنى بىردەن الۋ نەمەسە ءومىرىنىڭ سوڭىنا دەيىن «وليمپيادالىق زەينەتاقى» ەسەبىندە الۋعا تاڭداۋ جاساۋدى ۇسىنىپ وتىر.