قازىردە قازاقستاندىق شوۋ-بيزنەس وكىلدەرىنىڭ ءبىرازى كاسىپكەر اتانىپ ءجۇر. ولاردىڭ كەيبىرى جەكە ستۋديا، پروديۋسەرلىك ورتالىق اشىپ السا، ەندى بىرەۋلەرى مەيرامحانا بيزنەسىن جاقسى جانداندىرۋدا. بۇل تۋرالى "قامشى" پورتالى نۇر.كز-كە سىلتەمە جاساي وتىرپ حابارلايدى.
ءانشى التىناي جورابايەۆا جۋرناليستەرگە بەرگەن سۇحباتتارىنىڭ بىرىندە “قازاقستان تەمىر جولى” كومپانياسىمەن بىرلەسە ىستەيتىن وتباسىلىق كاسىبى بار ەكەنىن ايتىپ قالعان.
ءارتىستىڭ پروديۋسەرى ءارى جارى ءسابيت ءابدىحالىقوۆقا حابارلاسقانىمىزدا، ول بۇل اقپاراتتى راستادى. “اقبۋرا نس” جاۋاپكەرشىلىگى شەكتەۋلى سەرىكتەستىگىن ءسابيتتىڭ تۋىستارى بىرلەسىپ باسقارادى ەكەن. سەرىكتەستىك جولاۋشىلارعا ارناپ پويىز توسەنىش-جامىلعىلارىن تىگۋمەن اينالىسادى.
ءانشى روزا ءالقوجا الماتى قالاسىنان «مەن سىيعا تارتقان ورامال» دەگەن اتاۋمەن ورامال دۇكەنىن اشقان بولاتىن. دۇكەننىڭ اشىلۋ سالتاناتىندا كاسىپكەر ونەرپاز ءوزىن قۇتتىقتاپ كەلگەن قوناقتارعا ورامال ۇلەستىردى. ءانشى بولاشاقتا كاسىبىن ۇلتتىق برەندكە اينالدىرۋدى جوسپارلاپ وتىر.
بۇرىنعى “KZ” توبىنىڭ مۇشەسى، ءانشى رۇستەم نۇرجىگىت تە شىعارماشىلىعى مەن جەكە كاسىبىن قاتار الىپ ءجۇر. ونىڭ الماتىدا بۇقار جىراۋ-بايتۇرسىنوۆ جانە اۋەزوۆ-جاندوسوۆ كوشەلەرىنىڭ قيىلىسىندا ورنالاسقان «Coffeetime» اتتى كوفەحانالارى بار. جاس كاسىپكەر قىزمەت ساپاسىنا قاتتى ءمان بەرەدى ەكەن.
“كەلۋشىلەر تەك كوفە ءىشىپ كەتپەي، ءلاززات الىپ، دەمالىپ قايتسا ەكەن”، – دەيدى ءانشى جىگىت.
ەل اۋزىندا مايرا ءىلياسوۆا مەن تانىمال اقىن اينۇر تۇرسىنبايەۆا پاتەرلەرىن جالعا بەرەدى دەگەن ماعلۇمات بار.
مايرا ءىلياسوۆا بۇل تابىس كوزىن ەشكىمنەن جاسىرمايدى، ءتىپتى جەكە پروديۋسەرلىك ورتالىعىنان دا قارجى تاۋىپ، بالا-شاعاسىنىڭ، نەمەرەلەرىنىڭ بولاشاعىنا قازىردەن ويلايتىنىن العا تارتادى.
جاس ءانشى دينارا قىرىقبايەۆا دا - وتاندىق نارىقتا ءوز ورنىن تاپقان كاسىپكەر. ونىڭ توي مەن ءار ءتۇرلى ساۋىق كەشتەرىن ۇيىمداستىراتىن، ادەمىلەپ بەزەندىرەتىن يۆەنت اگەنتتىگى بار.
ەستەرىڭىزگە سالا كەتەيىك، ۇلىقپان جولداسوۆتىڭ ۇلى بولاتتىڭ ۇيلەنۋ تويىن بەزەندىرۋ- قىرىقبايەۆانىڭ قولاستىنداعى جۇمىسشىلارعا تاپسىرىلعان بولاتىن.
ال، اقجول مەيىربەكوۆتىڭ وتباسىلىق كاسىبى بولىپ ەسەپتەلەتىن تۋريستىك فيرماسى تۋرالى جۇرتشىلىق استە بىلە بەرمەيدى. ونەر يەسىنىڭ بۇل كاسىپتى دوڭگەلەتىپ وتىرعانىنا 15 جىلدان اسقان. تانىمال ءارتىس بيزنەسىنىڭ ارقاسىندا الەمنىڭ ءبىراز جەرىن ارالاپ كەلگەن كورىنەدى.
قازاقستاندىق شوۋ-بيزنەستىڭ تاعى ءبىر وكىلى نۇرلان ءابدۋلليننىڭ استانادا “ابدۋللا” اتتى ۇلكەن مەيرامحاناسى بار. ءارتىستىڭ ءوزى بۇل كاسىبىن بىرنەشە اداممەن ءبولىسىپ وتىرعانىن ايتادى.
“بيزنەستى جۇرگىزىپ وتىرعان بىرنەشە پارتنەر (ارىپتەس) جىگىتتەر بار عوي”، – دەيدى ابدۋللين اڭگىمەنى باسقا ارناعا اۋدارعىسى كەپ. ءانشى جەكە كاسىبى تۋرالى اشىپ ايتقىسى كەلمەسە دە، ءبىراز ءىستىڭ باسىن قايىرىپ جۇرگەن سىڭاي تانىتتى.
ۇلتتىق ويىنشىقتار شىعارۋمەن اينالىساتىن ءقىدىرالى بولمانوۆتىڭ وسى كاسىپپەن تابىس تاۋىپ جۇرگەنىنە بەس جىلدىڭ ءجۇزى بولعان.
تىرلىككە ەپتى بولمانوۆ جان جارى قاراقات ءابىلدينانىڭ جەكە مەكتەپ-ستۋدياسىن اشۋعا دا اتسالىسقان. قازىردە قاراقات ستۋدياسىنىڭ قارلىعاشتارى ءتۇرلى حالىقارالىق جارىستارعا قاتىسىپ، جۇلدەلى ورىندار يەلەنۋدە.
بولمانوۆتىڭ ويىندا ءالى تالاي جوبا بار. سولاردىڭ ءبىرى – دارىندى بالالار مەكتەبىن اشۋ ەكەن. ايتا كەتەرلىگى، جاقىندا بولمانوۆتار وتباسى تاعى ءبىر وتاندىق ءونىمدى اينالىمعا شىعاردى. ول – قۋات كوزى بىرنەشە ەسە كوپ باتارەيكالار.
توقتار سەرىكوۆتىڭ ات باپتايتىن قاسيەتى تىڭدارماندارىنا تاڭسىق ەمەس. ءارتىس جەكە شارۋاشىلىعىن اشىپ، قازىردە ساحنادا كوپ كورىنبەيتىن بولدى. سوعان قاراعاندا، توقتاردىڭ شىعارماشىلىعىنان گورى شارۋاشىلىعى كوپ پايدا اكەلەتىن سىڭايلى.
اقىلبەك جەمەنەي دە كاسىپكەر ارىپتەستەرىنەن قالىسپاي، “Zhemeney records” ستۋدياسىن اشىپ، ءتىپتى “Zhemeney” برەندىمەن تىكتىرىلگەن پيدجاگىن وتاندىق تەلەارنالاردىڭ بىرىندە ۇسىنىپ ۇلگەردى. ءارتىستىڭ كيىم وندىرەتىن كاسىبى ەرلەرگە ارنالعان كيىم تىگۋمەن اينالىسپاق.
ال ءانشى شاكيزادا ءان ايتۋدان بولەك، ءبىراز جىل بويى “ل-كاپيتال” ينۆەستيسيالىق كومپانياسىندا قارجى كەڭەسشىسى بولىپ قىزمەت اتقارادى. نارىقتا قۇندى قاعازداردى ساتۋعا بىلەك سىبانا كىرىسكەن ءارتىس بوس ۋاقىتىندا ساحنالىق ارىپتەستەرىنە اقشامەن بايۋ جولدارىن ايتىپ جۇرەدى.
“ساحنادا جۇرگەن سوڭ، جاڭا كويلەك كەرەك. حالىق الدىنا ادەمى بوپ شىققىڭ كەلەدى. ونىڭ ءبارى اقشاعا كەلىپ تىرەلەدى. بالا-شاعا دەگەن تاعى بار. ولارعا دا كومەكتەسكىڭ كەلەدى. ءبىر انمەن كۇن كورۋ مۇمكىن ەمەس”، – دەدى شاكيزادا ءبىزدىڭ ساۋالىمىزعا.
