بۇگىن اق تۇيەنىڭ قارنى جارىلعان كۇن. سەبەبى 17 جىلدان بەرى ارمان بولعان اباي ۇلتتىق مەكتەبى اشىلماق،- دەپ قۋانا حابارلادى مەسەنات، ءتىل جاناشىرى دۋلات تاستەكەي الەۋمەتتىك جەلىدەگى پاراقشاسىندا. 
ونىڭ ايتۋىنشا، اقشاعا قۇنىققان ازاماتتاردىڭ كەسىرىنەن مەكتەپ ءوز تەرريتورياسىنان ايىرىلعان كورىنەدى. ەندى جاڭا مەكتەپ بۇرىنعى “بوبەك” قورىنىڭ تەرريتورياسىندا بوي كوتەرمەك.
«نەسىن جاسىرايىق، 2007 جىلى اقشاعا قۇنىققان، پيعىلى بار ازاماتتاردىڭ كەسىرىنەن تەرريتورياسىنان ايىرىلعان التىن ۇيا مەكتەبىمىزدىڭ كەيىنگى جىلدارداعى جاعدايى كوڭىل كونشىتەتىندەي ەمەس ەدى. 17 جىل بويى ەلىمىزدىڭ ءار ايماعىنان كەلگەن وقۋشىلار ەسكى عيماراتتا وقىپ، توزىعى جەتكەن جاتاقحانادا تۇرىپ كەلدى. جاڭا جەرگە كوشۋ تۋرالى بىرنەشە مارتە باستاما كوتەرىلسە دە، ناتيجەسى بولمادى. جاڭا قازاقستاندا عانا جاڭا مەكتەبىمىزگە قول جەتكىزەتىن بولدىق. اق تۇيەنىڭ قارنى جارىلعان كۇن بولدى بۇگىن. ەندى، دارىندى دا تالانتتى، اقىلدى ءىزباسارلارىمىز بۇيىرسا 2025 جىلدىڭ كۇزىنەن باستاپ، زاماناۋي مەكتەپتە وقيدى. مەكتەپتىڭ عيماراتىنا عانا ەمەس، ءبىلىمى مەن تاربيەسىنە دە ەرەكشە نازار اۋدارىلادى.
مەكتەپ ميسسياسى سىني تۇرعىدان ويلاۋعا، قوعامعا ىزگى نيەتپەن قىزمەت ەتۋگە قابىلەتتى، ادال جانە جاۋاپتى قازاقستاننىڭ بولاشاق كوشباسشىلارىن تاربيەلەۋ بولماق.
بولاشاقتا اباي ۇلتتىق مەكتەبىنەن زەيىنى اشىق، كوكىرەگى وياۋ، ۇلتتىق مۇددە جولىندا ەڭبەك ەتەتىن ليدەرلەر شىعاتىنىنا ءشۇبا جوق. وسى جولدا بىزدە ايانىپ قالمايمىز، ۇشقان ۇيامىزعا قولىمىزدان كەلەر دۇنيەنىڭ بارلىعىن جاسايمىز. جاڭا مەكتەبىمىز بۇرىنعى “بوبەك” قورىنىڭ تەرريتورياسىندا بوي كوتەرەدى»،-دەدى مەسەنات دۋلات تاستەكەي.
اباي ۇلتتىق مەكتەبىنىڭ ىرگەتاسىن قالاۋ راسىمىنە 1988 جىلعى مەكتەپ تۇلەگى، ق ر وقۋ-اعارتۋ ءمينيسترى، ءبىرقاتار زيالى قاۋىم وكىلدەرى جانە ق ر پارلامەنتى سەناتىنىڭ ءتوراعاسى ماۋلەن اشىمبايەۆ قاتىسقان. ماۋلەن ساعاتحان ۇلى مەكتەپ نىق بوي كوتەرۋى ءۇشىن ناقتى تاپسىرمالار بەردى.
«ەلىمىزدە ءبىلىم بەرۋ ساپاسىن ارتتىرۋعا ۇنەمى باسىمدىق بەرىلەدى. جوبانىڭ باستى ماقساتى ابايدىڭ «تولىق ادام» تۇجىرىمداماسىنا تابان تىرەي وتىرىپ، ۇلتقا قىزمەت ەتەتىن پاتريوت ازاماتتاردىڭ جاڭا بۋىنىن تاربيەلەۋ. بۇل وقۋ ورداسى ورتا ءبىلىمنىڭ ۇلتتىق برەندىن قالىپتاستىرۋعا قوسىلعان ۇلكەن ۇلەس. ءاربىر وقۋشىنىڭ ءبىلىم الىپ، جان-جاقتى دامۋى ءۇشىن قولايلى ورتا تۋدىرۋ ءۇشىن اۋقىمدى جۇمىس ىستەلمەك»،-دەدى ق ر پارلامەنتى سەناتىنىڭ ءتوراعاسى.
پىكىر قالدىرۋ