قازاقستاندا تاماق جەتكىزۋ قىزمەتىنە قاتىستى جاڭا تالاپتار بەكىتىلدى. كۋرەرلەر دەنساۋلىعى تۋرالى انىقتاما الۋ ءۇشىن مەديسينالىق تەكسەرۋدەن، گيگيەنالىق دايىندىقتان وتۋگە مىندەتتەلدى.  

بيىل 1 قاڭتاردان باستاپ قازاقستاندا تاماق جەتكىزۋ قىزمەتىنە قاتىستى جاڭا تالاپتار بەكىتىلدى. ستاندارتقا سايكەس، كۋرەرلەردە مەديسينالىق تەكسەرۋدەن وتكەنى تۋرالى بەلگىسى بار بەلگىلەنگەن ۇلگىدەگى جەكە مەديسينالىق كىتاپشا بولۋى كەرەك. سونداي-اق ولار كاسىبي گيگيەنالىق دايىندىقتان وتۋگە جانە جالپى قابىلدانعان نورمالار مەن مىنەز-قۇلىق ەرەجەلەرىن باسشىلىققا الۋعا ءتيىس.

“وسى ستاندارتتى قولدانۋدان قوعامدىق تاماقتاندىرۋ ونىمدەرىن جەتكىزۋ نارىعىنداعى تالاپتاردىڭ اشىقتىعى مەن بىرىزدىلىگى قامتاماسىز ەتىلەدى، تۇتىنۋشىلاردىڭ كورسەتىلەتىن قىزمەتتەرگە دەگەن سەنىم دەڭگەيى ارتادى جانە قازاقستاندا ازىق-تۇلىك قاۋىپسىزدىگى جۇيەسىنىڭ نىعايۋىنا ىقپال ەتەدى"، – دەپ مالىمدەدى ساۋدا جانە ينتەگراسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى.

بۇدان بولەك، قوعامدىق تاماقتانۋ ونىمدەرىن تۇتىنۋشىلارعا جەتكىزۋ كەزىندە جانە تاپسىرىستاردى بەرۋ پۋنكتەرىندە قاپتامانى تاسىمالداۋ بارىسىندا سىرتقى زاقىمدانۋىن انىقتاۋ ءۇشىن تاپسىرىستاعى ءونىمدى تەكسەرۋ مۇمكىندىگى بەرىلۋى كەرەك.

قابىلدانعان ستاندارت مەيرامحانالاردىڭ، ءدامحانالاردىڭ، لوگيستيكالىق كومپانيالاردىڭ جانە كۋرەرلەردىڭ تاماق جەتكىزۋ قىزمەتىنىڭ ساپاسىن ارتتىرماق.