وڭىردە جەر قاتىناستارى سالاسىندا ءتارتىپ ورناتۋ جۇمىستارى جالعاسۋدا. اقمولا وبلىسىنىڭ پروكۋراتۋرا ورگاندارى جەردىڭ پايدالانىلۋىنا جۇيەلى قاداعالاۋ جۇرگىزەدى، بۇل يگەرىلمەگەن جانە زاڭسىز بەرىلگەن ۋچاسكەلەردى مەملەكەتكە قايتارۋعا مۇمكىندىك بەرەدى.

جىل باسىنان بەرى 40-تان استام تەكسەرۋلەر مەن تالداۋلار جۇرگىزىلدى، ولاردىڭ ناتيجەلەرى بويىنشا ونداعان جەر ۋچاسكەلەرى مەملەكەتتىك مەنشىككە قايتارىلدى. نەعۇرلىم ءتان بۇزۋشىلىقتار جەردى نىسانالى ماقساتى بويىنشا پايدالانباۋعا، سونداي-اق جەرگىلىكتى اتقارۋشى ورگانداردىڭ ساۋدا-ساتتىقتان تىس ۋچاسكەلەردى بەرۋىنە بايلانىستى.

"مۇنداي جاعدايلاردا پروكۋراتۋرا قاداعالاۋ اكتىلەرىن قابىلدايدى، ولاردىڭ ناتيجەلەرى بويىنشا جەر مەملەكەتكە قايتارىلادى جانە زاڭ تالاپتارىنا سايكەس بولىنەدى"، — دەپ اتاپ ءوتتى وبلىس پروكۋرورىنىڭ ورىنباسارى مارات باقتىبەك ۇلى. ماسەلەن، اقكول اۋدانىندا دەمالىس بازالارىن قۇرۋعا ارنالعان، ءبىراق ەشقاشان يگەرىلمەگەن ورمان قورىنىڭ 13 ۋچاسكەسى بويىنشا جالداۋ شارتتارى بۇزىلدى. ەرەيمەنتاۋ اۋدانىندا ءۇش ءىرى اۋىل شارۋاشىلىعى ۋچاسكەسى قايتارىلدى، وسىعان ۇقساس فاكتىلەر جارقايىڭ جانە بۋراباي اۋداندارىندا انىقتالدى.

سونداي-اق، پروكۋراتۋرا ينۆەستيسيالىق جوبالار مەن باۋ-باقشا ءوسىرۋ تۇرىندەگى جەرلەردى ءبولۋ كەزىندە بۇزۋشىلىقتاردى انىقتادى. مىسالى، زەرەندى اۋدانىندا 250 گەكتارعا دەيىنگى 30 ۋچاسكە ساۋدا-ساتتىقتان تىس بەرىلدى، بۇل زاڭ تالاپتارىنا قايشى كەلەدى. وسى فاكتىلەر بويىنشا شاعىم جۇمىستارى جۇرگىزىلۋدە. جايىلىم تاپشىلىعى ماسەلەسىن شەشۋگە ەرەكشە نازار اۋدارىلدى. قايتارىلعان اۋىل شارۋاشىلىعى القاپتارىنىڭ ءبىر بولىگى مال جايۋ ءۇشىن قوعامدىق پايدالانۋعا بەرىلەدى. تەك ەكى جىلدىڭ ىشىندە وبلىستا جايىلىم تاپشىلىعىن 100 مىڭ گەكتارعا قىسقارتۋعا مۇمكىندىك تۋدى.

سونىمەن قاتار، پروكۋراتۋرانىڭ باستاماسىمەن "بۋراباي" مەملەكەتتىك ۇلتتىق تابيعي پاركىنىڭ جەرلەرىن قايتارۋ بويىنشا اۋقىمدى جۇمىستار جالعاسۋدا. بۇرىن جەرگىلىكتى اتقارۋشى ورگاندار ساياباقتىڭ شەكارالارىن زاڭسىز وزگەرتىپ، جۇزدەگەن ۋچاسكەلەردى قۇرىلىسقا بەردى. قابىلدانعان شارالاردىڭ ارقاسىندا ونداعان گەكتار قايتارىلدى جانە يگەرىلمەگەن جەرلەردى الىپ قويۋ بويىنشا سوت جۇمىستارى جالعاسۋدا. "جەر زاڭناماسىنىڭ ساقتالۋىن ءقاداعالاۋ-بىزدىڭ قىزمەتىمىزدىڭ باسىم باعىتتارىنىڭ ءبىرى. اۋماقتىڭ كوپ بولىگى اۋىل شارۋاشىلىعىندا پايدالانىلاتىن اگرارلىق ءوڭىر ءۇشىن ءاربىر گەكتار جەردىڭ قوعامعا پايداسىن تيگىزۋى ماڭىزدى"، - دەپ اتاپ ءوتتى وبلىس پروكۋرورىنىڭ ورىنباسارى. جەر قاتىناستارى سالاسىنداعى قوعامدىق مۇددەلەردى قورعاۋ جونىندەگى جۇمىس تۇراقتى نەگىزدە جالعاسۋدا.