بۇگىن، 24 قازاندا ماڭعىستاۋ وبلىسىنىڭ اكىمى نۇرداۋلەت قيلىباي رەسپۋبليكا كۇنى قارساڭىندا جاڭاوزەن قالاسىندا «كاسكور-ماشزاۆود» ءجشس-نىڭ جاڭا زاۋىتىنىڭ اشىلۋ سالتاناتىنا قاتىستى.
شاراعا مۇناي-گاز سالاسىنىڭ ارداگەرلەرى، ۇلتتىق كومپانيالار مەن كاسىپورىن باسشىلارى، ءماسليحات دەپۋتاتتارى، مەملەكەتتىك ورگانداردىڭ وكىلدەرى قاتىستى.
ءوڭىر باسشىسى ءوز سوزىندە مەملەكەت باسشىسى قاسىم-جومارت توقايەۆتىڭ ونەركاسىپتىك نەگىزدى نىعايتۋ جانە ەكونوميكانى ءارتاراپتاندىرۋ جونىندەگى تاپسىرمالارىنا سايكەس، وڭدەۋ سالاسىن دامىتۋ – ءوڭىر ەكونوميكاسى ءۇشىن ستراتەگيالىق ماڭىزى بار باعىت ەكەنىن اتاپ ءوتتى.
«بۇل زاۋىتتىڭ ىسكە قوسىلۋى – جاڭاوزەن قالاسىنىڭ ەكونوميكالىق الەۋەتىن ارتتىرۋعا، جاڭا جۇمىس ورىندارىن اشۋعا جانە جەرگىلىكتى تۇرعىنداردى تۇراقتى تابىسپەن قامتاماسىز ەتۋگە مۇمكىندىك بەرەدى. زاۋىت ەلىمىزدىڭ مۇناي-گاز سالاسى ءۇشىن ماڭىزدى ءونىم وندىرەتىن وتاندىق كاسىپورىنعا اينالاتىنىنا سەنەمىز»، – دەدى نۇرداۋلەت قيلىباي.
جاڭا كاسىپورىن جىلىنا 540 مىڭ دانا سورعى شتانگاسىن، 51 مىڭ توننا سورعى-كومپرەسسورلىق قۇبىرلاردى جانە فۋتەروۆكالى سورعى-كومپرەسسورلىق قۇبىرلاردى وندىرۋگە قاۋقارلى. ءوندىرىس ىسكە قوسىلعان سوڭ 250 جاڭا جۇمىس ورنى اشىلادى دەپ جوسپارلانۋدا.
سالتاناتتى ءىس-شارادا سالا ارداگەرلەرى مەن ءوندىرىس قىزمەتكەرلەرىنە وبلىس اكىمىنىڭ جانە كاسىپورىننىڭ العىس حاتتارى مەن مەرەيتويلىق مەدالدار تابىستالدى.
ماڭعىستاۋ وبلىسى اكىمىنىڭ باسپا ءسوز قىزمەتى
