الماتى. قازاقپارت - الماتىدا قازاق حاندىعىنىڭ 550 جىلدىعىنا وراي ۇيىمداستىرىلعان رەسپۋبليكالىق «ۇلى دالا ەلى» تاريحي-مادەني ەكسپەديسياسى بويىنشا ارنايى كۇندەلىك كىتاپ شىعارىلادى. بۇل تۋرالى بۇگىن الماتىدا وتكەن «جەر تاريحى -ەل تاريحى» اتتى دوڭگەلەك ۇستەل بارىسىندا الماتى قالالىق قازاقستان حالقى اسسامبلەياسى ءتوراعاسىنىڭ ورىنباسارى، وسەتين ەتنومادەني بىرلەستىگىنىڭ ءتوراعاسى قازبەك مامسۋروۆ مالىمدەدى. 
«ەلىمىزدە قازاقستان حالقى اسامبلەياسىنىڭ ۇيىتقى بولۋىمەن «ۇلى دالا ەلى» اتتى ەكسپەديسيا ۇيىمداستىرىلعان بولاتىن. ول 11ء-شى قىركۇيەكتە ەلىمىزدىڭ شىعىسىندا، سولتۇستىگىندە، باتىسىندا جانە ورتالىق وڭىرىندە باستاۋ الدى. مۇنداي شارا الماتىدا دا جۇزەگە اسىرىلدى. الماتى قالالىق قازاقستان حالقى اسسامبلەياسىنىڭ مۇشەلەرى، جوعارى وقۋ ورىندارىنىڭ ستۋدەنتتەرى، ارحەولوگتار جانە تاريحشىلاردان قۇرالعان ەكسپەديسيا الماتى قالاسى مەن الماتى وبلىسىندا كوپتەگەن تاريحي ەسكەرتكىشتەردى ارالادى. 

سولاردىڭ ىشىندە جوڭعارلارعا قارسى كۇرەستە ەرلىگىمەن تانىلعان رايىمبەك، ناۋرىزباي جانە باسقا دا قازاق باتىرلارىنىڭ ەسكەركتىشتەرىن كوردىك. سونىمەن قاتار، الماتىنىڭ ىرگەسىندە ورنالاسقان بورالداي ساق جانە ءۇيسىن قورعاندارى كەشەنىنە باردىق. بۇل ءبىز ءۇشىن وتە قىزىقتى بولدى. قازاق حالقىنىڭ تاريحىنان كوپتەگەن مالىمەتتەرگە قانىقتىق. بۇل ءبىز ءۇشىن، جاس ۇرپاق ءۇشىن وتە ماڭىزدى شارا. ەندى تاريحشىلاردىڭ، ارحەولوگتاردىڭ جانە باسقا دا مامانداردىڭ قازاق حالقىنىڭ تاريحى بويىنشا جاساعان دارىستەرى نەگىزىندە ارنايى كۇندەلىك كىتاپ شىعارىلادى»، - دەدى ءوز سوزىندە ق. مامسۋروۆ.