ورال. قازاقپارات - 1 قازان كۇنى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە «ۋنيۆەرسيتەت جانە شەتەلدىك كومپانيالار: ارىپتەستىك جانە مۇمكىندىكتەر، پەرسپەكتيۆالىق دامۋ» تاقىرىبىندا فورۋم وتكىزىلدى.
فورۋمعا قاتىسقان وبلىس اكىمىنىڭ ورىنباسارى ناريمان تورەعالييەۆتىڭ اتاپ وتكەنىندەي، ەلباسىنىڭ «100 ناقتى قادام» ۇلت جوسپارىن جۇزەگە اسىرۋ ءۇشىن باسەكەگە قابىلەتتى ماماندار دايارلاۋدىڭ ماڭىزى زور. بۇل رەتتە جوعارى وقۋ ورىندارى جۇمىس بەرۋشىلەرمەن، سونىڭ ىشىندە شەتەلدىك كومپانيالارمەن الەۋمەتتىك ارىپتەستىكتى دامىتا ءبىلۋى قاجەت.

جيىندا «كاسپيان پرودجەر ينجينيرينگ ەند كانسالتينگ» ج ش س باس ديرەكتورى كريشي نينو گايتانو باتىسقازاقستاندىق ۋنيۆەرسيتەتپەن كادرلار دايارلاۋداعى بايلانىسى جونىندە اڭگىمەلەسە، جاڭگىر حان اتىنداعى بقاتۋ-دىڭ بيىلعى تۇلەكتەرى ماليكا ساۋداشيەۆا، نۇرلىبەك ايانوۆ جانە باسقالار اتالعان كومپانيانىڭ قولداۋىمەن يتاليادا جوعارى بىلىكتى مامانداردان ءدارىس الىپ، تاجىريبەدەن وتكەندىگىن جەتكىزدى. بولاشاقتا وسىنداي كومپانيالاردىڭ قۇرامىندا جۇمىس جاساۋعا ىقىلاستى ەكەندىكتەرىن جاسىرعان جوق. بۇدان ءبىر جىل بۇرىن باتىسقازاقستاندىق ۋنيۆەرسيتەت پەن  «كاسپيان پرودجەر ينجينيرينگ ەند كانسالتينگ» ج ش س اراسىندا ىنتىماقتاستىق جونىندەگى مەموراندۋمعا قول قويىلعان بولاتىن. فورۋمدا ىنتىماقتاستىقتىڭ ءبىر جىلعى العاشقى ناتيجەلەرى جاريا ەتىلىپ، مۇنداي جۇمىستاردىڭ الداعى ۋاقىتتا جالعاساتىنى ايتىلدى. جالپى، جاڭگىر حان اتىنداعى بقاتۋ 23 شەتەلدىك كومپانيامەن ءوزارا ءتيىمدى بايلانىس جاساۋ ماقساتىندا مەموراندۋمعا قول قويعان.

فورۋم سوڭىندا جوو ستۋدەنتتەرىن قازىرگى ەڭبەك نارىعىنا  جان-جاقتى دايارلاۋدى جەتىلدىرۋ باعىتىندا ۇسىنبا قابىلدانىپ، Proger S.p.A يتاليا كومپانياسىنىڭ اتقارۋشى ۆيسە-پرەزيدەنتى ميكەلاندجەلو تورتورەللا مەن «كاسپيان پرودجەر ينجينيرينگ ەند كانسالتينگ» ج ش س باس ديرەكتورى كريشي نينو گايتانوعا ۋنيۆەرسيتەتتىڭ قۇرمەتتى پروفەسسورى اتاعى بەرىلدى.

«مەملەكەت باسشىسىنىڭ «نۇرلى جول - بولاشاققا بارار جول» اتتى جولداۋىندا ەلىمىزدى ودان ءارى يندۋستريالاندىرۋ، ەكونوميكامىزدى دامىتۋ باعىتىندا بىلىكتى جاس ماماندار دايارلاۋ قاجەتتىگى اتاپ كورسەتىلگەن بولاتىن. بۇگىنگى تاڭدا ءار جوعارى وقۋ ورنى جاستارعا ءبىلىم بەرىپ قانا قويماي، ولاردىڭ باسەكەگە قابىلەتتى بولىپ، وزدەرى نيەت ەتكەن كاسىپورىندارعا ورنالاسۋىنا كۇش سالۋى قاجەت. بۇل ءۇشىن، ارينە، وسىنداي ناقتى ىستەر اتقارىلۋى كەرەك»، دەدى ۋنيۆەرسيتەت رەكتورى نۇرلان سەرعالييەۆ