شىمكەنت. قازاقپارات - «ۇلى دالا ەلى» تاريحي-مادەني ەكسپەديسياسى تۇركىستانعا كەلدى.
قازاق حاندىعىنىڭ 550 جىلدىعىنا ارنالعان ەكسپەديسيا قاتىسۋشىلارىن قوجا احمەت ءياسساۋيدىڭ كەسەنەسى الدىندا قوشەمەتپەن قارسى الدى. ەسكە سالا كەتەيىك، بۇل اۋقىمدى اكسيانىڭ باستى ميسسياسى - قازاقستان حالقىنىڭ تاريحي-مادەني جانە رۋحاني مۇراسىن ناسيحاتتاپ، تانۋ نەگىزىندە قازاقستاندىق بىرتەكتىلىك پەن ۇلتتىق بىرلىكتى نىعايتۋ.
ەكسپەديسياعا ولكەتانۋشىلار، ەتنومادەني بىرلەستىكتەردىڭ، مەملەكەتتىك مەكەمەلەردىڭ باسشىلارى، قحا مۇشەلەرى جانە جاستار كوشباسشىلارى قاتىسۋدا.
وڭتۇستىكقازاقستاندىقتار قىزىلوردا وبلىسى دەلەگاسياسىنان ەستافەتالىق كۇندەلىك-كىتاپتى سالتاناتتى تۇردە قابىلداپ الدى، ول ەكسپەديسيا بويىنداعى كەلەسى وبلىسقا بەرىلىپ وتىرىلادى. بۇل كىتاپقا رەسپۋبليكالىق ەكسپەديسيا قاتىسۋشىلارى بولعان جەرلەرىنەن كۇندەلىك جازىپ، قىزىقتى وقيمعالارعا، ەل تاريحىنا باسا نازار اۋدارىپ وتىرادى.
«بۇل كۇندەرى ەكسپەديسيا ءبىزدىڭ وڭىردە بولعان كەزىندە ءبىز كوپتەگەن قىزىقتى وقيعالاردى قامتىپ جازامىز. ءبىز ونى لايىقتى دەرەكتەرمەن تولىقتىرىپ، قازاق حاندىعىنىڭ 550 جىلدىعىنىڭ باستى شارالارى وتەتىن جامبىل وبلىسىنا تاپسىرامىز»، - دەدى رەسپۋبليكالىق ەكسپەديسيا قاتىسۋشىسى كەڭەس ىسمايىلوۆ.
وڭتۇستىك قازاقستاندا ەكسپەديسيا 4 كۇن ايالدايدى. وسى كەزدە دەلەگاسيا قازاق حاندىعىنىڭ قۇرىلۋى، نىعايۋى جانە گۇلدەنۋى تاريحىمەن بايلانىستى بىرنەشە اۋدانداردا بولماق. ماسەلەن، ەكسپەديسيا ەجەلگى تۇركىستان قالاسىنىڭ تاريحي-مادەني ورىندارىندا، وتىرار، ورداباسى، بايدىبەك، سوزاق اۋداندارىندا بولىپ، عىلىمي-تانىمدىق شارالار وتكىزەدى.
ەكسپەديسيا اياسىندا اۋداندار حالقىمەن كەزدەسۋلەر جوسپارلانعان، وندا تۇرعىندارعا ۇلت جوسپارى - «100 ناقتى قادام» تۇسىندىرىلەدى، قازاق حاندىعىنىڭ تاريحى مەن مەملەكەتتىلىكتىڭ باستاۋلارىنا ارنالعان اڭگىمەلەر وتكىزىلەدى.
