الماتى. قازاقپارات - بۇگىن الماتىدا «قايرات» فۋتبول كلۋبىنىڭ الەمدىك ستاندارتتارعا ساي ەتىپ سالىنعان نەگىزگى جاتتىعۋ بازاسىنىڭ سالتاناتتى اشىلۋ ءراسىمى ءوتتى.
«فۋتبولدى دامىتۋ ءۇشىن وعان ءتيىستى ينفراقۇرىلىم، ادىستەمە جانە ناقتى دامۋ جوسپارى كەرەك. ءبىز «قايرات» كلۋبىندا ولاردىڭ بار ەكەندىگىن كورىپ تۇرمىز. مەن كوپ ۇزاماي فۋتبولشىلارىمىز الەمنىڭ ەڭ تانىمال فۋتبول بىرىنشىلىكتەرىندە ونەر كورسەتەدى دەپ سەنەمىن»، -دەدى سالتاناتتى راسىمدە الماتى اكىمى باۋىرجان بايبەك.

سونىمەن قاتار قالا باسشىسى بۇقارالىق سپورتتى دامىتۋ - ۇلتىڭ ساۋلىعىنا تىكەلەي ىقپال ەتەتىندىگىن ايتتى.

«مەملەكەتىمىز بۇل سالاعا ۇلكەن ءمان بەرەدى. سوندىقتان دا ەلىمىزدە ءىرى-ىرى حالىقارالىق جارىستار وتكىزىلىپ، حالىقارالىق ستاندارتتارعا ساي سپورت نىساندارى سالىنىپ جاتىر. جارىستاردان باسقا ۋاقىتتاردا ولاردا قالا تۇرعىندارىنا ارنالعان سپورتتىق جانە مادەني شارالار ءوتىپ تۇرادى. ال مىنا بازا جەكە بيزنەسمەندەردىڭ دەمەۋشىلىگىمەن سالىنعان. ولار وسىلايشا ەلىمىزدە سپورتتىڭ دامۋىنا ءوز ۇلەستەرىن قوسىپ جاتىر»، - دەدى ول. 

ءوز سوزىندە كلۋب ۇجىمىن قۇتتىقتاي وتىرىپ، ق ر مادەنيەت جانە سپورت ءمينيسترىنىڭ سپورت جانە دەنە شىنىقتىرۋ ىستەرى جونىندەگى كوميتەتىنىڭ ءتوراعاسى ەلسيار قاناعاتوۆ فۋتبولدىڭ قازاقستاندا تانىمال ويىنداردىڭ ءبىرى ەكەندىگىن جانە ونىڭ بۇقارالىق سپورتتى دامىتۋ ەرەكشە ورىن الاتىندىعىن اتاپ كورسەتتى.  

ال جاتتىعۋ بازاسىنا كەلەر بولساق، مۇندا تابيعي كوگالدان جاسالعان ءۇش فۋتبول الاڭى جانە جاساندى كوگالدان جاسالعان ەكى فۋتبول الاڭى بار.  ولاردىڭ ءبىرى جابىق تۇردە جاسالعان. سونىمەن قاتار، مۇندا اۋماعى 9،5 مىڭ شارشى مەتر بولاتىن اكىمشىلىك عيمارات سالىنعان. 

«ءبىز قۇرىلىستىڭ اياقتالىپ، بازانىڭ قولدانىسقا بەرىلگەنىن ماقتان ەتەمىز. بۇدان ءتورت جىل بۇرىن مۇنداي «بازا سالامىز» دەگەن يدەياعا ەشكىم سەنبەپ ەدى. مىنەكي، بۇگىن ءبىز فۋتبول ارداگەرلەرىنە بەرگەن ۋادەمىزدى ورىندادىق. ءبىز وسى نىسانمەن كلۋبتىڭ ينفراقۇرىلىمدارىن قۇرۋ كەزەڭىن تولىق اياقتادىق. ەندى بىزدە بۇل بازامەن قاتار، بالالارعا ارنالعان ءۇش فۋتبول اكادەمياسى جانە جاسوسپىرىمدەرگە ارنالعان ءبىر مەكتەپ-ينتەرنات جۇمىس ىستەيدى» - دەدى ءوز سوزىندە «قايرات» فۋتبول كلۋبىنىڭ قاداعالاۋشى كەڭەسىنىڭ ءتوراعاسى قايرات بورانبايەۆ.  

ونىڭ ايتۋىنشا، بازانىڭ قۇرىلىسى مەن ارلەۋ جۇمىستارىنا قازاقستاندا جاسالعان تابيعي ماتەريالدار قولدانىلعان. جاتتىعۋ كەشەنى 12 گەكتار جەردى الىپ جاتىر.  

«بۇل جەردە، اسىرەسە الاڭدارعا كوپ كوڭىل ءبولىندى. بۇل جۇمىستاردى يتالياندىق جانە شوتلاندىق كومپانيالاردىڭ ماماندارى اتقاردى. ەكى الاڭ جىلىتۋ جۇيەسىمەن قامتاماسىز ەتىلگەن. ال جاساندى الاڭ بامبۋك وسىمدىگىنەن جاسالعان. مۇندا «قايرات» كومانداسىنىڭ 22 ويىنشىدان تۇراتىن نەگىزگى جانە قوسالقى قۇرامى جاتتىعاتىن بولادى»، -دەدى ق. بورانبايەۆ.

ايتا كەتەلىك، سالتاناتتى شاراعا ەلىمىزدىڭ فۋتبول سالاسىنىڭ وكىلدەرى جانە «قايرات» كومانداسىنىڭ ارداگەرلەرى قاتىستى.