الماتى.  قازاقپارات - «الماتى تۋر-2015» حالىقارالىق ۆەلوجارىسىنىڭ دەڭگەيى جىلدان جىلعا جوعارىلاپ كەلەدى. مەن جارىس وتەتىن جولدى ءوزىم تەكسەرىپ شىقتىم. 
تراسسا جارىس وتكىزۋگە ساقاداي ساي. بۇگىن الماتىدا وتكەن ارنايى باسپا ءسوز ءماسليحاتى بارىسىندا «الماتى تۋر-2015»  حالىقارالىق ۆەلوجارىسىنىڭ ديرەكتورى، حالىقارالىق ۆەلوسيپەدشىلەر وداعىنىڭ كوميسسارى دجەك ۆاتسون وسىلاي ءمالىم ەتتى.

«مەن ۆەلوجارىستىڭ ۇيىمداستىرۋ كوميتەتىندە بىرنەشە جىلدان بەرى جۇمىس ىستەپ كەلەمىن. «الماتى تۋر» ۆەلوجارىسىنىڭ دەڭگەيى جىلدان جىلعا جوعارىلاپ كەلەدى. مەن بۇعان وتە ريزامىن. مەن  جاقىندا الماتىعا كەلىپ كەتكەن ەدىم. ۇيىمداستىرۋ كومتەتى قىرۋار جۇمىستار اتقاردى. مۇندا حالىقارالىق ۆەلوسيپەدشىلەر وداعىنىڭ بارلىق تالاپتارى ورىندالىپ جاتىر. مەن جارىس جولىن ءوزىم تەكسەرىپ شىقتىم. تراسسا حالىقارالىق دەڭگەيدە جارىس وتكىزۋگە ساقاداي ساي»، - دەدى دجەك ۆاتسون.

بيىل وسىمەن ءۇشىنشى رەت وتكىزىلەيىن دەپ وتىرعان حالىقارالىق ۆەلوجارىسقا ەۋروپا مەن ازيا ەلدەرىنەن 20 كوماندا قاتىسادى. جارىس جولىنا بارلىعى 150 ۆەلوشاباندوز شىعادى. ولاردىڭ ىشىندە ەكى كاسىپقوي - «PRO Team Astana» جانە رەسەيلىك «Katusha» كوماندالارى بار. سونىمەن قاتار «Rusvelo» پروكونتينەنتتىك كومانداسى،  14 قۇرلىق  جانە قازاقستان، وزبەكستان جانە موڭعوليانىڭ ۇلتتىق قۇراما كوماندالارى قاتىسادى.

ءوز سوزىندە «قازاقستاننىڭ سپورت تەحنولوگيالارى» كومپانياسىنىڭ باس ديرەكتورى ارنۇر ىبىرايەۆ جۇلدەلىك قوردىڭ بيىل دا وزگەرىسسىز قالاتىندىعىن جەتكىزدى.

«جۇلدەلىك قور وتكەن جىلدارداعىداي بولىپ قالادى. ياعني، ءبىرىنشى ورىن العان كەلوشاباندوزعا 15 مىڭ ەۋرو، ەكىنشى ورىن العانعا 10 مىڭ جانە ءۇشىنشى ورىن العان ۆەلوشاباندوزعا 5 مىڭ ەۋرو تولەنەدى. بۇل باسقا حالىقارالىق دەڭگەيدەگى ۆەلوجدارىستارعا قاراعاندا قوماقتى سوما. ويتكەنى بۇل بىركۇندىك ۆەلوجارىس. سوعان بولا شەت ەلدەردەن، باسقا قۇرلىقتان ۇشىپ كەلۋ وڭاي ەمەس، ياعني ءتيىمدى بولا بەرمەيدى. سوندىقتان ءبىز قوماقتى جۇلدەلىك قورمەن قاتار، ۆەلوسيپەدشىلەردىڭ ۇشۋ بيلەتى مەن جۇكتەرى بويىنشا شىعىنداردى ءوز موينىمىزعا الىپ وتىرمىز. سونىمەن قاتار، جارىسقا قاتىسقانى ءۇشىن ۆەلوشاباندوزدارعا بەلگىلى مولشەردە وتەماقى تولەنەدى»، - دەدى ا. ىبىرايەۆ.

ايتا كەتەلىك، بيىل «الماتى تۋر-2015» حالىقارالىق ۆەلوجارىسىن 4 قازان كۇنى تىكەلەي ەفيردە كۇندىزگى ساعات 13:00-دەن 14:00-گە دەيىن «ەۋروسپورت-2» تەلەارناسى كورسەتەدى. ال ەلىمىزدە «قازاقستان»، «الماتى» جانە «قازسپورت» ارنالارى تولىق كولەمدە كورسەتەدى.

جارىس ۇستىمىزدەگى جىلى 4 قازان كۇنى الماتى قالاسىندا تاڭعى ساعات 09:00-دە باستالىپ، شامامەن ساعات 14:00-دە اياقتالادى. ماراپاتتاۋ ءراسىمى وسى ۋاقىتتا.

ۆەلوشاباندوزدار ءال-فارابي داڭعىلى بويىمەن 31 شاقىرىمنان تۇراتىن التى اينالىمدى باسىپ وتەدى، ياعني جارىس جولى 186 شاقىرىمدى قۇرايدى.