كوكشەتاۋ. قازاقپارات - بۇۇ 70 جىلدىق مەرەيتويلىق سەسسياسىندا ەلباسى كوتەرگەن باستامالار قازاقستاننىڭ الەمدىك ارەناداعى بەدەلىن ارتتىرادى.
اقمولا وبلىسىنداعى قوعام قايراتكەرى، جازۋشى عوسمان تولەعۇل وسىنداي پىكىر ءبىلدىردى.
ونىڭ ايتۋىنشا، ەلباسى ن.نازاربايەۆتىڭ بۇكىل الەم ەلدەرى باسشىلارىنىڭ الدىندا سويلەگەن سوزىندە بۇۇ-نىڭ ەكونوميكالىق جانە الەۋمەتتىك كەڭەسىن جاھاندىق دامۋ كەڭەسىنە اينالدىرۋ، ۇيىمىنىڭ ءجۇز جىلدىعىنا جاھاندىق ستراتەگيالىق باستاما - 2045 جوسپارىن، ءححى عاسىرداعى يادروسىز الەم قالىپتاستىرۋدىڭ جاڭا بولاشاقتىق تۇجىرىمداماسىن ازىرلەۋ، سونداي-اق، بۇۇ-نىڭ شتاب-پاتەرىن ازياعا كوشىرۋ ماسەلەسىن ويلاستىرۋدى ۇسىنعانى بۇل ەلىمىزدىڭ الەمدىك ارەناداعى بەدەلىن ارتتىرىپ قانا قويماي، ىشكى ساياسي تۇراقتىلىقتى نىعايتۋعا جانە ەكونوميكامىزدىڭ ودان ءارى قارىشتاپ دامۋىنا جول اشپاق.
«ەلباسىمىز نيۋ-يورك قالاسىندا وتكەن الەمدەگى ەڭ بەدەلدى ۇيىم بۇۇ باس اسسامبلەياسىنىڭ مەرەيتويلىق سەسسياسىندا دۇنيەجۇزى ەلدەرىنىڭ جاھاندىق دامۋىنا قاتىستى قاداۋ -قاداۋ مىندەتتەردى العا تارتىپ، بۇل جولى دا ءوزىنىڭ داناگويلىگىمەن الەم باسشىلارىن تاڭقالدىردى. اسىرەسە، ەۋرازيانىڭ كىندىگىندە ورنالاسقان قازاقستان ءۇشىن بۇل مىندەتتەر نەمەسە العا قويعان ماقساتتار اۋاداي قاجەت. قازىرگى كەزدە تاۋەلسىز قازاقستانداعى ءدىنارالىق، ەتنوسارالىق تاتۋلىق پەن تۇراقتىلىق، قوعامدىق كەلىسىم جانە الەۋمەتتىك-ەكونوميكالىق دامۋىنداعى جەتىستىكتەردى بۇكىل الەم مويىنداپ وتىر.
بۇۇ-نىڭ ەكونوميكالىق جانە الەۋمەتتىك كەڭەسىن جاھاندىق دامۋ كەڭەسىنە اينالدىرۋ، ۇيىمىنىڭ ءجۇز جىلدىعىنا جاھاندىق ستراتەگيالىق باستاما - 2045 جوسپارىن، ءححى عاسىرداعى يادروسىز الەم قالىپتاستىرۋدىڭ جاڭا بولاشاقتىق تۇجىرىمداماسىن ازىرلەۋ جونىندەگى ۇسىنىسى وعان مۇشە ەلدەر اراسىندا قولداۋ تاباتىنى انىق. ال، بۇۇ-نىڭ شتاب-پاتەرىن الەم حالقىنىڭ ۇشتەن ەكىسى ورنالاسقان ازياعا كوشىرۋ ماسەلەسىن ويلاستىرۋ بۇل اسا زور ستراتەگيالىق ماڭىزعا يە. ەلباسىنىڭ ازيا دەپ تۇرعانى ول ءبىزدىڭ سۇيىكتى، دۇنيەجۇزىلىك ساياسي ارەنادا ويىپ تۇرىپ ورىن الاتىن بۇۇ مەڭزەيتىن بەيبىتشىلىك پەن كەلىسىمنىڭ مەكەنىنە اينالعان استانا ەكەنى ءسوزسىز. بەدەلدى ۇيىمنىڭ شتاب پاتەرى كەلەشەكتە وسىندا كوشىرىلەتىن بولسا، وندا ونىڭ ءوڭىردىڭ دامۋىن، تۇراقتىلىعىن جانە قاۋىپسىزدىگىن قامتاماسىز ەتۋ ءۇشىن ماڭىزى زور بولار ەدى. سوندىقتان، بىرىككەن ۇلتتار ۇيىمىنىڭ 70 جىلدىق مەرەيتويلىق سەسسياسىندا ەلباسى ن.نازاربايەۆ كوتەرگەن باستامالار قازاقستاننىڭ الەمدىك ارەناداعى بەدەلىن ارتتىرىپ قانا قويماي، ىشكى ساياسي تۇراقتىلىقتى نىعايتۋعا جانە ەكونوميكامىزدىڭ ودان ءارى قارىشتاپ دامۋىنا جول اشاتىنى ءسوزسىز»، دەيدى ع.تولەعۇل.
